រដ្ឋមន្ត្រីការបរទេសអ៊ីរ៉ង់ បានថ្លែងសង្ខេបដល់សមាជិកជាន់ខ្ពស់នៃគណៈកម្មាធិការកណ្តាលរបស់ប្រទេសចិននិងសមភាគីរបស់លោក លោក Wang Yi ដោយសន្យាថានឹងធ្វើអ្វីៗគ្រប់យ៉ាងដើម្បីធានាបានសុវត្ថិភាពរបស់ពលរដ្ឋចិននៅក្នុងប្រទេសអ៊ីរ៉ង់ ក្នុងពេលមានសង្គ្រាមដែលបង្កឡើងដោយសហរដ្ឋអាមេរិក និងអ៊ីស្រាអែល។

យោងតាមសេចក្តីថ្លែងការណ៍របស់ក្រសួងការបរទេសនៅទីក្រុងប៉េកាំងបានឲ្យដឹងថា រដ្ឋមន្ត្រីការបរទេស លោក Abbas Araghchi បានធ្វើអត្ថាធិប្បាយបែបនេះនៅក្នុងការសន្ទនាតាមទូរស័ព្ទ កាលពីថ្ងៃចន្ទជាមួយលោក Wang ដែលផ្តោតសំខាន់លើស្ថានភាពនៅក្នុងប្រទេសអ៊ីរ៉ង់ ខណៈទីក្រុងតេអេរ៉ង់ បានការពារខ្លួនក្នុងគ្រប់តម្លៃណាក៏ដោយ។

ក្រសួងការបរទេសបាននិយាយនៅក្នុងសេចក្តីថ្លែងការណ៍ថា «លោក Seyed Abbas Araghchi បាននិយាយថា ភាគីអ៊ីរ៉ង់នឹងខិតខំប្រឹងប្រែងឱ្យអស់ពីសមត្ថភាពដើម្បីធានាសុវត្ថិភាព និងសន្តិសុខរបស់បុគ្គលិក និងស្ថាប័នរបស់ចិន»។ លោក Araghchi បានប្រាប់លោក Wang ថា ទីក្រុងវ៉ាស៊ីនតោន «បានចាប់ផ្តើមសង្គ្រាមប្រឆាំងអ៊ីរ៉ង់ ជាលើកទីពីរ ក្នុងអំឡុងពេលចរចារបស់ខ្លួន» ទោះបីជាភាគីទាំងពីរ «មានវឌ្ឍនភាពជាវិជ្ជមាននៅក្នុងការចរចាជុំចុងក្រោយ» ក៏ដោយ។ សហរដ្ឋអាមេរិក និងអ៊ីស្រាអែល បានចាប់ផ្តើមការវាយប្រហារគួរឱ្យភ្ញាក់ផ្អើលទៅលើប្រទេសអ៊ីរ៉ង់កាលពីថ្ងៃសៅរ៍ បន្ទាប់ពីរដ្ឋមន្ត្រីការបរទេសអូម៉ង់ ដែលបានសម្របសម្រួលការចរចាដោយប្រយោលនៅជុំចុងក្រោយរវាងទីក្រុងវ៉ាស៊ីនតោន និងទីក្រុងតេអេរ៉ង់ បាននិយាយថា កិច្ចព្រមព្រៀងសន្តិភាពកាន់តែខិតជិតដល់ជាងពេលណាៗទាំងអស់។

លោក Araghchi បានប្រាប់សមភាគីចិនរបស់លោកថា ទីក្រុងតេអេរ៉ង់ គ្មានជម្រើសអ្វីក្រៅពីការពារខ្លួនទេ ហើយលោកសង្ឃឹមថាទីក្រុងប៉េកាំងនឹងដើរតួនាទីក្នុងការទប់ស្កាត់ការរីកធំបន្ថែមទៀតនៃជម្លោះនៅក្នុងតំបន់។