រដ្ឋមន្ត្រីឧស្សាហកម្ម ថ្លែងថា AI ផ្តល់ឱ្យកម្ពុជានូវឱកាសដ៏កម្រមួយ ក្នុងការ​រំល​ង​ដំណាក់​កាល​អភិវឌ្ឍន៍​មួយ​ចំនួនដោយបង្កើន ល្បឿននវានុវត្តន៍ កែលម្អការផ្តល់សេវា បំពេញចន្លោះ​ប្រហោង​នៃ​ការ​អភិវឌ្ឍ និងពង្រឹងការធ្វើគោលនយោបាយ ផ្អែកលើភស្តុតាងនៅ គ្រប់វិស័យ។

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើក​ឡើង​នៅ​ក្នុងសិក្ខាសាលា ផ្សព្វផ្សាយ និងបើកសិក្ខាសាលាស្តីពីរបាយការណ៍បញ្ញាសិប្បនិម្មិត៖ ដើម្បី​កំណត់ទិសដៅនវានុវត្តន៍ ក្រមសីលធម៌ និងបរិយាបន្ន នៅថ្ងៃទី៧ ខែមេសា ឆ្នាំ២០២៦ នេះ​ថា ឥទ្ធិពលរបស់ AI បានធ្វើឱ្យពិភពលោកកំពុងផ្លាស់ប្តូររចនាសម្ព័ន្ធសេដ្ឋកិច្ច ជំរុញបរិវត្តកម្ម ឧស្សាហ​កម្ម និងកែប្រែអភិបាលកិច្ច។ សម្រាប់កម្ពុជាវិញ បញ្ហាសិប្បនិម្មិត AI បានផ្តល់​នូវ​ឱកាស​ដ៏​កម្រ​មួយ ក្នុងការរំលងដំណាក់ កាលអភិវឌ្ឍន៍មួយចំនួន ដោយបានបង្កើនល្បឿននវានុវត្តន៍ និង​ការ​កែលម្អលើការផ្តល់សេវា បំពេញចន្លោះប្រហោងនៃការអភិវឌ្ឍ និង ពង្រឹងការ​ធ្វើ​គោល​នយោបាយ​ផ្អែក​លើ​ភស្តុតាងនៅគ្រប់វិស័យ។

ឯកឧត្តមរដ្ឋមន្ត្រី បានរំលេចនូវអភិក្រមដែលផ្អែកលើសសរស្តម្ភចំនួន៣គឺ៖ នវានុវត្តន៍ ក្រម​សីលធម៌ និងបរិយាបន្ន និងបាន លើកឡើងថា ការអភិវឌ្ឍបច្ចេកវិទ្យាត្រូវតែយកមនុស្សជាស្នូល ហើយ​ក្រម​សីលធម៌មិនមែនជាឧបសគ្គចំពោះនវានុវត្តន៍ទេ ប៉ុន្តែជា មូលដ្ឋានគ្រឹះ ដែល​ធានា​ធម្មា​នុ​រូប និងចីរភាពនៃបច្ចេកវិទ្យា។

លោក Jonathan Tsuen Yip Wong ប្រធានផ្នែកនវានុវត្តន៍សហគ្រាស និងការវិនិយោគនៃ UN-ESCAP បានលើកឡើង ថា បរិយាបន្នគឺជាបញ្ហាចម្បងមួយព្រោះមនុស្សជាច្រើន និង​បណ្តា​ប្រទេសមួយចំនួន មិនអាចតាមទាន់នូវការវិវត្តរីកចម្រើនយ៉ាងឆាប់ រហ័សនៃ AI ។ ដូច្នេះ​កិច្ច​សហការ​រវាងរដ្ឋាភិបាល គ្រឹះស្ថានសិក្សា វិស័យឯកជន និងដៃគូអភិវឌ្ឍន៍ មានសារសំខាន់ណាស់ ប្រសិនបើ យើងចង់បង្កើតគោលនយោបាយដែលមានការគិតគូរល្អិតល្អន់ និងគ្រប់ជ្រុងជ្រោយ។

ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេក​វិទ្យា និងនវានុវត្តន៍ លើកឡើង ផងដែរថា បញ្ញាសិប្បនិម្មិត AI បានកំពុងចូលមកដល់ ក្នុង​ការ​បម្រើ​ដល់​សកម្មភាព និងកិច្ចការងារប្រចាំថ្ងៃ ក្នុងនោះការចាប់យក ក៏ដូចជាការស្រាវ​ជ្រាវ​បន្ត​លើ​បច្ចេក​វិទ្យា​នេះ គឺត្រូវការឱ្យមានការតម្រង់ទិសឱ្យបានច្បាស់លាស់ ដើម្បីធានាឱ្យបាន ប្រកប​ដោយ​បរិយាបន្ន និងនិរន្តរភាព និងការទទួលខុសត្រូវនៃការចាប់យកបច្ចេកវិទ្យានេះ។

សូមបញ្ជាក់ថា សិក្ខាសាលានេះបានប្រមូលផ្តុំអ្នកជំនាញ តំណាងក្រសួងស្ថាប័នរាជរដ្ឋាភិបាល ដៃគូ​អភិវឌ្ឍន៍ អ្នកស្រាវជ្រាវ និង តំណាងវិស័យឯកជន ដើម្បីពិភាក្សា​អំពី​ការ​ផ្លាស់​ប្តូរ​ពី​គោល​នយោបាយ​ទៅ​ការអនុវត្តជាក់ស្តែង។ អ្នកចូលរួមក៏បានលើកឡើងពីសារៈ សំខាន់ នៃកិច្ចសហការ ដើម្បី​ធានាថា AI ត្រូវបានអភិវឌ្ឍប្រកបដោយបរិយាបន្ន និងការទទួលខុសត្រូវ ខណៈ​ដែល​តួអង្គ​ពាក់ព័ន្ធ បានបង្ហាញការប្តេជ្ញាចិត្តក្នុងការកសាងប្រព័ន្ធអេកូឡូស៊ី AI មួយដែល​ដំណើរ​ការ​ដោយ​នវានុ​វត្តន៍ ដឹកនាំដោយក្រមសីលធម៌ និងមាន បរិយាបន្នសម្រាប់ប្រជាជនកម្ពុជាទាំងអស់៕អត្ថបទ៖ សុន រ៉ាឌី