ប្រធានាធិបតីចិន លោក ​ Xi Jinping បានប្រាប់សមភាគីអាមេរិករបស់លោក គឺលោក Donald Trump នៅ​​ថ្ងៃព្រហស្បតិ៍​ ១៤​ឧសភា នេះ ថា ទីក្រុងវ៉ាស៊ីនតោន និងទីក្រុងប៉េកាំង   គួរតែជា «ដៃគូ មិនមែនជាគូប្រជែង»ឡើយ​​ ខណៈមេដឹកនាំទាំងពីរ បានជួបគ្នានៅក្នុងរដ្ឋធានីចិន។ 

លោក Xi ​បានថ្លែងនៅក្នុងសុន្ទរកថាបើកនៅមហា​សាលប្រជាជន ដែលជាអគាររដ្ឋរបស់ប្រទេសចិន ថា​ ទាំង​ប្រទេស​ចិន ​ទាំង​​​​សហរដ្ឋអាមេរិក​​​​​​​​​​​​ ត្រូវ​​ឈរជាមួយ​គ្នា​​ដើម្បី​ទទួល​បាន​​​ផលប្រយោជន៍​ពី​កិច្ចសហប្រតិបត្តិការ​  និង​​បោះបង់ចោល​ការប្រឈម​ដាក់គ្នា​​​​​ ​ដោយ​លោក​បាន​បន្ថែមថា កិច្ចប្រជុំនេះបានទាក់ទាញចំណាប់អារម្មណ៍ទូទាំងពិភពលោក។​​

លោកថា ប្រទេស​ទាំងពីរ​គួរតែជួយគ្នាទៅវិញទៅមកឱ្យទទួលបានជោគជ័យ រីកចម្រើនជាមួយគ្នា និងស្វែងរកមធ្យោបាយត្រឹមត្រូវសម្រាប់ប្រទេសធំៗដើម្បីរួម​រស់​​ជាមួយគ្នាក្នុងយុគសម័យថ្មី​។​

លោក Xi បានលើកឡើង​ថា លោក «តែងតែជឿ» ថាប្រទេសទាំងពីរមាន «ផលប្រយោជន៍រួមច្រើនជាងការខ្វែងគំនិតគ្នា» ដោយបន្ថែមថា ភាពជោគជ័យរបស់ប្រទេសមួយតំណាងឱ្យ «ឱកាសសម្រាប់ប្រទេសមួយទៀត» ហើយថា ចំណងមិត្តភាពទ្វេភាគីដែលមានស្ថិរភាពគឺមានប្រយោជន៍សម្រាប់ពិភពលោក។ 

លោក​​បាន​​បន្ត​ទៀត​​ថា លោក​ទន្ទឹង​រង់ចាំ​ការ​ពិភាក្សា​បន្ថែម​ទៀត​លើ​បញ្ហា​សំខាន់ៗ​សម្រាប់​ប្រទេស​ទាំង​ពីរ និង​សហគមន៍​អន្តរជាតិ​ដ៏​ទូលំទូលាយ ព្រមទាំង​ការ​ធ្វើការ​ជាមួយ​លោក Trump «​ដើម្បី​កំណត់​មាគ៌ា​​​ និង​ដឹកនាំ​នាវា​​ដ៏​ធំ​នៃ​ទំនាក់ទំនង​ចិន-អាមេរិក» ដោយ​មាន​គោលបំណង​ធ្វើ​ឱ្យ​ឆ្នាំ​២០២៦​នេះ​ ​​ក្លាយ​​​ជា «ឆ្នាំ​ប្រវត្តិសាស្ត្រ​ដ៏​សំខាន់» ដែល​បើក «ជំពូក​ថ្មី» ក្នុង​ទំនាក់ទំនង​ទ្វេភាគី៕