នាយករដ្ឋមន្ត្រីកណ្តាល-ស្តាំនិយមរបស់​ប្រទេសឡាតវី លោកស្រី Evika Silina បាននិយាយថា លោកស្រីនឹងលាលែងពីតំណែង នៅថ្ងៃព្រហស្បតិ៍ (ទី១៤ ខែឧសភា ឆ្នាំ២០២៦) នេះ​ ជា​អ្វី​ដែលបង្កឲ្យ​មានការដួលរលំនៃរដ្ឋាភិបាលចម្រុះរបស់លោកស្រី ពោល​គឺ​ត្រឹមតែប៉ុន្មានខែមុនការបោះឆ្នោតនៅខែតុលា។

លោកស្រីបានថ្លែងនៅក្នុងសេចក្តីថ្លែងការណ៍តាមទូរទស្សន៍ថា៖ «ខ្ញុំលាលែងពីតំណែង ប៉ុន្តែខ្ញុំមិនបោះបង់ចោលទេ»។

ប្រធានាធិបតីឡាតវី លោក Edgars Rinkevics ដែលត្រូវបានប្រគល់ភារកិច្ចដោយ​រដ្ឋធម្មនុញ្ញឲ្យ​ជ្រើសរើសមេដឹកនាំរដ្ឋាភិបាលនោះ​ នឹងជួបជាមួយគណបក្សនៅ​សភាទាំងអស់ នា​ថ្ងៃសុក្រ។

លោកស្រី Silina មកពីគណបក្សកណ្តាល-ស្តាំនិយម New Unity បាន​ស្ថិត​នៅក្នុង​សភាដែលគា្មន​​សំឡេង​ភាគច្រើន កាលពីថ្ងៃពុធ បន្ទាប់ពីគណបក្សឆ្វេងនិយម Progressives បានបញ្ជាក់​ថា ខ្លួនកំពុងដកការគាំទ្រ។

ការសម្រេចចិត្តនេះ បានកើតឡើងបន្ទាប់ពីមាន​ការបណ្តេញរដ្ឋមន្ត្រីការពារជាតិរបស់គណបក្ស Progressives លោក Andris Spruds ចេញពីតំណែង កាល​ចុងសប្តាហ៍ ជុំវិញការដោះស្រាយឧប្បត្តិហេតុ ពាក់ព័ន្ធនឹងយានដ្រូន​អ៊ុយក្រែនដែលហោះចូលទៅក្នុងប្រទេសឡាតវីចេញពី​ទឹកដី​រុស្ស៊ី៕