គ្រីឃីត៖ សហព័ន្ធកីឡាតេន្នីស គ្រីឃីតអន្ដរជាតិ (ITCF) បានបង្ហាញការគាំទ្រពេញទំហឹង ចំពោះគម្រោងរៀបចំការប្រកួតកីឡាគ្រីឃីតអន្ដរជាតិពានរង្វាន់សម្ដេចតេជោ ហ៊ុន សែន អាស៊ីសន្តិភាពគ្រីឃីតលើកទី១ នាខែវិច្ឆិកា ឆ្នាំ២០២២ ខាងមុខ។
នេះបើតាមការបញ្ជាក់របស់លោក សេន វិទ្យា ប្រធានសមាគមកីឡាគ្រីឃីតកម្ពុជា បន្ទាប់ពីលោក Kanhaiya Gujar នាយកប្រតិបត្តិសហព័ន្ធកីឡាតេន្នីស គ្រីឃីតអន្ដរជាតិ បានចូលជួបសម្ដែងការគួរសម និងពិភាក្សាការងារជាមួយឯកឧត្ដម យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជាកាលពីថ្ងៃទី២១ ខែមេសានេះ នៅមជ្ឈមណ្ឌលជាតិជនពិការកម្ពុជា។ លោក សេន វិទ្យា បានបញ្ជាក់ថា ជំនួបនេះផ្ដោតសំខាន់លើសំណើរបស់សមាគមកីឡាគ្រីឃីតកម្ពុជា ក៏ដូចជាសហព័ន្ធកីឡាតេន្នីសគ្រីឃីតអន្ដរជាតិ អំពីគោលបំណងរៀបចំការប្រកួតពានរង្វាន់សម្ដេចតេជោ ហ៊ុន សែន ទាំងប្រភេទកីឡាតេន្នីសគ្រីឃីត និងប៉ារ៉ាគ្រីឃីត ដោយលើកសំណើជូនសម្ដេចតេជោនាយករដ្ឋមន្ដ្រី ដើម្បីរៀបចំព្រឹត្តិការណ៍អន្តរជាតិនេះតាមរយៈឯកឧត្ដម យី វាសនា។
លោក Madhu Aman អនុប្រធានសមាគមកីឡាគ្រីឃីតកម្ពុជាបានបញ្ជាក់ថា គោលបំណងនៃការរៀបចំឲ្យមានព្រឹត្តិការណ៍ SAMDECH HUN SEN ASIA PEACE CRICKET CUP 2022 នេះគឺដើម្បីជួយបណ្ដុះបណ្ដាលធនធានកីឡាករ-កីឡាការិនី ពិសេសកីឡាគ្រីឃីតជនពិការកម្ពុជាឲ្យមានសមត្ថភាព និងសក្ដានុពលសម្រាប់ត្រៀមចូលរួមការប្រកួតអន្តរជាតិនានា។ ទន្ទឹមជាមួយគ្នា ឯកឧត្ដម យី វាសនា បានបង្ហាញពីឆន្ទៈ និងគោលបំណងរួមគ្នាដើម្បីជំរុញការផ្សព្វផ្សាយលើកកម្ពស់ និងអភិវឌ្ឍកីឡាគ្រីឃីតនៅកម្ពុជាឲ្យកាន់តែល្អប្រសើរបន្ថែមទៀត ពិសេសសម្រាប់ក្រុមកីឡាគ្រីឃីតជនពិការដែលជាវិញ្ញាសាថ្មីមួយ ដើម្បីផ្ដល់ឱកាសឲ្យកីឡាករ-កីឡាការិនីជនពិការកម្ពុជាបានចូលរួមហ្វឹកហាត់ និងមានឱកាសចូលរួមការប្រកួតលើឆាកអន្ដរជាតិ។
សូមបញ្ជាក់ថា ពានរង្វាន់សម្ដេចតេជោ ហ៊ុន សែន អាស៊ីសន្ដិភាព គ្រីឃីត លើកទី១ ឆ្នាំ២០២២ គ្រោងរៀបចំនាខែវិច្ឆិកាខាងមុខ ក្នុងនោះការប្រកួតតេន្នីសគ្រីឃីតគ្រោងមាន ៨ប្រទេសចូលរួមគឺមានឥណ្ឌា ប៉ាគីស្ថាន បង់ក្លាដេស នេប៉ាល់ អាហ្វហ្គានីស្ថាន ថៃ វៀតណាម ឡាវ និងម្ចាស់ផ្ទះកម្ពុជា ខណៈការប្រកួតប៉ារ៉ាគ្រីឃីត T-20 គ្រោងមានអត្តពលិក ៥ប្រទេសចូលរួមគឺមានប៉ាគីស្ថាន អាហ្វហ្គានីស្ថាន នេប៉ាល់ ឥណ្ឌូនេស៊ី និងម្ចាស់ផ្ទះកម្ពុជា៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
