ភ្នំពេញ៖ អង្គភាពអ្នកនាំពាក្យរាជរដ្ឋាភិបាលនៅថ្ងៃទី ២៥ ខែកក្កដា ឆ្នាំ២០២៦នេះ បានប្រគល់ពានរង្វាន់ដល់សិស្សនិស្សិតជ័យលាភីចំនួន ៦រូប ចាប់ពីលេខ១ ដល់ លេខ ៥ ដែលបានឈ្នះការប្រកួតក្នុងកម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យ (ជ័យលាភីលេខ៥ មាននិស្សិតឈ្នះពីរនាក់) ក្រោមប្រធានបទ «តើយុវជនត្រូវត្រៀមខ្លួនយ៉ាងដូចម្តេចដើម្បីចូលរួមសម្រេចចក្ខុវិស័យកម្ពុជាឆ្នាំ២០៥០ ក្លាយជាប្រទេសមានចំណូលខ្ពស់?»។
កម្មវិធីនេះមានការអញ្ជើញចូលរួមជាគណៈអធិបតីពី ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល និងការនិមន្តនិងអញ្ជើញចូលរួមពីថ្នាក់ដឹកនាំ គណៈគ្រប់គ្រងសាកលវិទ្យាល័យ សាស្ត្រាចារ្យ លោកគ្រូ អ្នកគ្រូ សមណនិស្សិត-និស្សិត និងភ្ញៀវកិត្តិយស សរុបប្រមាណ ៦០០ អង្គ/នាក់ នៅទីស្តីការគណៈរដ្ឋមន្ត្រី នាព្រឹកថ្ងៃទី២៥ ខែកក្កដា ឆ្នាំ២០២៦។
ឯកឧត្តម ប៉ែន បូណា បានថ្លែងក្នុងកម្មវិធីនេះថា រាជរដ្ឋាភិបាល នីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានដាក់ចេញ«យុទ្ធសាស្រ្តបញ្ចកោណដំណាក់កាលទី១» ដោយសម្លឹងឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០ ក្លាយជាប្រទេសមានប្រាក់ចំណូលខ្ពស់។
ឯកឧត្តម ថ្លែងទៀតថា ដើម្បីសម្រេចបានគោលដៅនេះ ការចូលរួមរបស់ប្រជាពលរដ្ឋគ្រប់មជ្ឈដ្ឋាន ជាពិសេសយុវជនមានសារសំខាន់ចាំបាច់មិនអាចខ្លះបាន ហើយ ការអភិវឌ្ឍន៍មូលធនមនុស្ស ត្រូវបានរាជរដ្ឋាភិបាលកំណតជាអាទិភាពខ្ពស់បំផុត និងត្រូវបានចាត់ទុកជាមូលដ្ឋានគ្រឹះនៃការអភិវឌ្ឍប្រទេស ពីព្រោះមនុស្សគឺជាទ្រព្យសម្បត្តិដ៏មានតម្លៃបំផុតរបស់ជាតិ ប៉ុន្តែ ដើម្បីក្លាយជាទ្រព្យសម្បត្តិដ៏មានតម្លៃសម្រាប់ជាតិ ទាល់តែពលរដ្ឋគ្រប់រូប ផ្តើមចេញពីយុវជនជាមនុស្សដែលមានគុណភាពគឺមូលធនមនុស្សពិតប្រាកដ។
កញ្ញា ឆាន ភាតរៈ និស្សិតមកពីសាកលវិទ្យាល័យ ខេត្តស្វាយរៀង បានឈ្នះជ័យលាភីលេខ១ បានលើកឡើងពីប្រធានបទ«ការពង្រឹងប្រព័ន្ធគាំពារសង្គម និងប្រព័ន្ធស្បៀង» ខណៈដែល កញ្ញា ហី ចាន់នី និស្សិតឈ្នះជ័យលាភីលេខ២ មកពីសាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច(RULE) បានបកស្រាយលើប្រធានបទ«ការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន»។
ក្រុមនិស្សិតឈ្នះជ័យលាភីទាំងពីរនេះ បានបង្ហាញក្តីរីករាយ និងប្តេជ្ញាចិត្ត នឹងចូលរួមជាមួយរាជរដ្ឋាភិបាលក្នុងការសម្រេចចក្ខុវិស័យកម្ពុជាឆ្នាំ២០៥០ តាមរយៈការខិតខំអភិវឌ្ឍន៍ឱ្យរីកចម្រើន ដើម្បីក្លាយជាធនធានមនុស្សប្រកបដោយគុណភាព។
ចំពោះ និស្សិតឈ្នះជ័យលាភីលេខ ៣ បានទៅ កញ្ញា ធា ចាន់រ៉ា មកពីសាកលវិទ្យាល័យសុខាភិបាល, និស្សិតជ័យលាភីលេខ ៤ បានទៅកញ្ញា សែម វីណា មកពី ពុទ្ធិកសាកលវិទ្យាល័យ សម្តេចអគ្គមហាសេនាបតី តេជោ ហ៊ុន សែន កំពង់ចាម និង ជ័យលាភីលេខ ៥ បានទៅនិស្សិតពីររូប គឺលោក សាមិត្ត វិរៈបុត្រ មកសាកលវិទ្យាល័យជាតិគ្រប់គ្រង (NUM) និងកញ្ញា យ៉ុម ពិដោ មកពី សាកលវិទ្យាល័យកម្ពុជា (UC)។
សូមបញ្ជាក់ថា កម្មវិធីប្រកួតប្រជែងនិយាយជាសាធារណៈនេះ មាននិស្សិតចូលរួមសរុបចំនួន ៤៩ រូប ចាប់ពីវគ្គជម្រុះ រហូតដល់វគ្គផ្តាច់ព្រ័ត្រដែលពួកគេមកពីសាកលវិទ្យាល័យចំនួន ១៥ នៃរាជធានី-ខេត្ត ។ និស្សិតដែលទទួលបានជ័យលាភី នៅវគ្គផ្តាច់ព្រ័ត្រ ទទួលបានវិញ្ញាបនបត្រតាមលំដាប់មេដាយពីលេខ១ ដល់លេខ៥ រួមទាំងរង្វាន់ជាថវិកាលើកទឹកចិត្តមួយចំនួនផងដែរ៕ អត្ថបទ៖ ធូ វិរៈ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
