សម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បាន​បញ្ជាក់​ប្រាប់​ថ្នាក់ដឹកនាំវៀតណាម ថា រាជរដ្ឋាភិបាលកម្ពុជា នៅតែប្រកាន់​ជំហរ​ដោះ​ស្រាយ​ជម្លោះ​ព្រំដែន​ជាមួយប្រទេសថៃ ដោយសន្ដិវិធីផ្អែកលើច្បាប់ បើទោះបីថៃ បន្ត​បង្ក​អរិភាព​ក៏​ដោយ​។

ឯកឧត្ដម កែវ ពិសិដ្ឋ នាយកខុទ្ទកាល័យ និងជាអ្នកនាំពាក្យសម្ដេចប្រធានរដ្ឋសភា បាន​ថ្លែង​ប្រាប់​អ្ន​​កសារព័ត៌មាន ឱ្យដឹងថា កាលពីយប់ថ្ងៃទី២៩ ខែកក្កដា ឆ្នាំ២០២៦ ថាសម្ដេច​ប្រធាន​រដ្ឋសភា​ បានប្រាប់ថ្នាក់ដឹកនាំវៀតណាម ពាក់ព័ន្ធការ​រក្សា​ជំហរ​ដោះ​ស្រាយ​ជម្លោះ​ព្រំដែន​ជាមួយ​ប្រទេស​ថៃ​ដោយសន្ដិវិធី ក្នុងដំណើរទស្សនកិច្ចផ្លូវការទៅកាន់ប្រទេសវៀតណាម ចាប់ពីថ្ងៃទី២៧ ដល់​ថ្ងៃទី២៩ ខែកក្កដា ឆ្នាំ២០២៦។ មេដឹកនាំកំពូលរបស់វៀតណាម ដែលប្រធានរដ្ឋសភា បាន​ជួបរួមមាន ឯកឧត្ដម តូ ឡឹម អគ្គលេខាធិការបក្សកុម្មុយសនី និងជាប្រធានរដ្ឋវៀតណាម , ឯកឧត្ដម ជិន ថាញ់មិញ ប្រធានរដ្ឋសភា និងឯកឧត្ដម ឡេ មិញហ៊ុង នាយករដ្ឋមន្រ្ដីវៀតណាម។

ឯកឧត្ដម អ្នកនាំពាក្យ បានបញ្ជាក់ថា នៅក្នុងជំនួបជាមួយថ្នាក់ដឹកនាំកំពូលវៀតណាម សម្ដេច​ប្រធាន​រដ្ឋសភាកម្ពុជា បានលើកយកបញ្ហាជម្លោះព្រំដែន ដែលថៃឈ្លានពានកម្ពុជា ប្រា​ប់​ថ្នាក់​ដឹក​នាំ​វៀតណាម ថា បើទោះបីថៃ នៅតែបន្តបង្កអរិភាព តែរាជរដ្ឋាភិបាល នៅតែប្រកាន់​ខ្ជាប់​ជំហរ​ដោះ​ស្រាយ​ជម្លោះ ដោយសន្ដិវិធីផ្អែកលើច្បាប់។ ហើយកម្ពុជា ប្រឆាំងដាច់ខាត ចំពោះការ​ប្រើ​ប្រាស់​កម្លាំង ក្នុងការកែប្រែខ្សែបន្ទាត់ព្រំដែនអន្ដរជាតិ។ ជាការឆ្លើយតប ថ្នាក់ដឹកនាំវៀតណាម បាន​ជម្រាបប្រធានរដ្ឋសភាកម្ពុជា ថា វៀតណាម នឹងបន្តតាមដានដោយយកចិត្តទុកដាក់បំផុត ជុំវិញ​ជម្លោះព្រំដែនកម្ពុជា និងថៃ ហើយសង្ឃឹមថា ប្រទេសទាំងពីរ នឹងរកបាន​ដំណោះ​ស្រាយ​ដោយ​សន្ដិវិធី ដើម្បីស្ថិរភាព និងសន្ដិសុខតំបន់។

សូមជម្រាបជូនថា យោធាថៃ បានឈ្លានពានកម្ពុជា ចំនួន២លើក កាលពីឆ្នាំ២០២៥។ ហើយ​បើ​ទោះ​បី​ពេលនេះប្រទេសកម្ពុជា និងថៃ រកបានបទឈប់បាញ់ គ្មានការវាយ​ប្រយុទ្ធ​គ្នា​ទ្រង់​ទ្រាយ​ធំ​នៅ​តា​មព្រំដែន ប៉ុន្ដែយោធាថៃ នៅតែបន្តបង្កអរិភាព ដោយយកទូកុងតឺន័រ លួសបន្លា ព័ទ្ធយកដី យក​ផ្ទះ​របស់ពលរដ្ឋខ្មែរ រារាំងដល់ពលរដ្ឋប្រមាណ២ម៉ឺននាក់ មិនទាន់អាច​វិល​ទៅ​កាន់​លំនៅ​ឋាន​វិញ​។ បើទោះបីយោធាថៃ បង្កអរិភាពបែបនេះក្ដី តែកម្ពុជានៅតែប្រកាន់ជំហរ ដោះស្រាយ​ជម្លោះ​ព្រំដែន ​ដោយសន្ដិវិធី ផ្អែកលើច្បាប់អន្ដរជាតិ​៕ អត្ថបទ៖ លៀ ស៊ីណា