ភ្នំពេញ ៖ អ្នកវិភាគបានបង្ហាញសុទិដ្ឋនិយមថា ដំណើរទស្សនកិច្ចផ្លូវការរបស់នាយករដ្ឋមន្ត្រីវៀតណាម អញ្ជើញមកព្រះរាជាណាចក្រកម្ពុជា ពីថ្ងៃទី៩-១០ ខែតុលា ឆ្នាំ២០២៦ គឺពិតជាមានសំខាន់នៃទំនាក់ទំនងរវាងប្រទេសទាំងពីរ និងការពង្រឹងវិស័យទំនាក់ទំនង វិស័យការពារជាតិ វិស័យសន្តិសុខសណ្តាប់ធ្នាប់ និងពង្រីកវិសាលភាពលើវិស័យពាណិជ្ជកម្ម ការធ្វើពិពិធកម្មសេដ្ឋកិច្ច។

លោក ហេង ម៉េងលី អ្នកវិភាគបានថ្លែងថា ដំណើរទស្សនកិច្ចផ្លូវការរបស់នាយករដ្ឋមន្ត្រីនៃសាធារណរដ្ឋសង្គមនិយមវៀតណាម ឯកឧត្តម ឡេ មិញហ៊ឹង អញ្ជើញមកកាន់ព្រះរាជាណាចក្រកម្ពុជា នៅថ្ងៃទី៩ និងថ្ងៃទី១០ ខែតុលា ឆ្នាំ២០២៦ នេះ ខ្ញុំមើលឃើញថាគឺជារឿងសំខាន់នៃទំនាក់ទំនងរវាងប្រទេស ដែល​អតីតកាលជាបងប្អូន និងមានអនាគតយូរអង្វែងជាមួយគ្នា ខណៈដែលឯកឧត្តមក៏ត្រូវបានសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់ប្រោសប្រទានអនុញ្ញាតដល់ឯកឧត្តម ក្រាបថ្វាយបង្គំសម្តែងនូវសេចក្តីគោរពស្រឡាញ់រាប់អានក្នុងមិត្តភាពដ៏ខ្លាំងក្លា។ ឯកឧត្តម នាយករដ្ឋមន្ត្រីសាធារណរដ្ឋសង្គមនិយមវៀតណាម ក៏នឹងជួបជាមួយនិងសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចប្រធានរដ្ឋសភា នៅក្នុងអង្គនីតិបញ្ញត្តិ ដែលខ្ញុំជឿថាជំនួបនេះ នឹងមានកិច្ចពិភាក្សាអំពីយន្តការច្បាប់ ដើម្បីធ្វើយ៉ាងណាឱ្យរដ្ឋនីមួយៗនៅក្នុងតំបន់ ក៏ដូចជាពិភពលោក គោរពនិងអនុវត្តច្បាប់អន្តរជាតិឱ្យបានមុតមាំ ហើយជាពិសេស គឺក្នុងនាមជាសមាជិកនៃប្រទេសអាស៊ានដែលមានធម្មនុញ្ញរបស់ខ្លួនផងនោះ ខ្ញុំរឹតតែជឿថា ជំនួបរវាងនាយករដ្ឋមន្ត្រីនៃសាធារណរដ្ឋសង្គមនិយមវៀតណាម ជាមួយនិងសម្តេចតេជោ ក៏ដូចជាសម្តេចប្រធានរដ្ឋសភា នឹងជំរុញឱ្យមានការគោរពធម្មនុញ្ញអាស៊ាន ដើម្បីរក្សានូវសន្តិសុខតំបន់អាស៊ានរបស់ខ្លួន និងតំបន់នៅក្នុងពិភពលោកផងដែរ។

អ្នកវិភាគរូបនេះបានបន្តទៀតថា ជំនួបរវាងឯកឧត្តម ឡេ មិញហ៊ឹង ជាមួយនិងសម្តេចមហាបវរធិបតី នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការដឹកនាំនីតិប្រតិបត្តិ ក៏នឹងមានកិច្ចពិភាក្សាសំខាន់ៗជាច្រើន ដែលពាក់ព័ន្ធជាមួយនិងការពង្រឹងវិស័យទំនាក់ទំនង វិស័យការពារជាតិ វិស័យសន្តិសុខសណ្តាប់ធ្នាប់ និងពង្រីកវិសាលភាពលើវិស័យពាណិជ្ជកម្ម ការធ្វើពិពិធកម្មសេដ្ឋកិច្ច ដោយមានកិច្ចព្រមព្រៀងធុរកិច្ចសំខាន់ៗមួយចំនួន ដើម្បីធានាថាប្រជាជននៃប្រទេសទាំងពីរ មានភាពធន់ក្នុងសុខុមាលភាពនៃកំណើនជីវភាពរស់នៅ បានល្អប្រសើរ។ដូច្នេះហើយ ដំណើរទស្សនកិច្ចរបស់នាយករដ្ឋមន្ត្រីនៃសាធារណរដ្ឋសង្គមនិយមវៀតណាម មកកម្ពុជានេះ គឺខ្ញុំរឹតតែមើលឃើញថា គឺជានិមិត្តរូប មិនត្រឹមតែជាការពង្រឹងទំនាក់ទំនងរវាងរដ្ឋនិងរដ្ឋប៉ុណ្ណោះទេ ប៉ុន្តែគឺជាការពង្រឹងទំនាក់ទំនងទៅលើវិស័យសំខាន់ៗមួយចំនួនដូចរៀបរាប់ខាងលើ ដើម្បីធ្វើជាប្រយោជន៍ ជំរុញឱ្យមានការគោរពច្បាប់អន្តរជាតិ និងគោរពនូវដែនអធិបតេយ្យភាពរបស់ផងគ្នា ក្នុងការធានាបាននូវសន្តិសុខ សណ្តាប់ធ្នាប់ តំបន់អាស៊ីអាគ្នេយ៍ទាំងមូល ឱ្យបានល្អប្រសើរ និងធ្វើឱ្យប្រជាជនរបស់យើងទាំងពីរ ក៏ដូចជាប្រជាជននៅក្នុងតំបន់អាស៊ីអាគ្នេយ៍នេះទាំងមូល អាចប្រកបរបររកស៊ីជាមួយគ្នា ជាពិសេសគឺប្រទេសជិតខាង ជាប់ភូមិផងរបងជាមួយគ្នានេះ មានទំនាក់ទំនងស្អិតរមួតក្នុងការអភិវឌ្ឍជីវភាពប្រចាំថ្ងៃ។

សូមជម្រាបថា តបតាមការអញ្ជើញរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ឯកឧត្តម ឡេ មិញហ៊ឹង នាយករដ្ឋមន្ត្រីវៀតណាម នឹងអញ្ជើញមកបំពេញទស្សនកិច្ចផ្លូវការនៅកម្ពុជាពីថ្ងៃទី៩-១០ ខែតុលា ឆ្នាំ២០២៦។ ក្នុងឱកាសបំពេញទសន្សនិច្ចនេះឯកឧត្តម ឡេ មិញហ៊ឹង នឹងចូលគាល់ព្រះមហាក្សត្រ និងសម្តេចព្រះមហាក្សត្រី ព្រះវររាជមាតាជាតិខ្មែរជាទីសក្ការៈដ៏ខ្ពង់ខ្ពស់បំផុតនៅក្នុងព្រះបរមរាជវាំង។ ឯកឧត្តមក៏មានជំនួបសម្តែងការគួរសមដាច់ដោយឡែកពីគ្នាចំពោះសម្តេចតេជោ ហ៊ុន​ សែន ប្រធានព្រឹទ្ធសភា និងសម្តេចប្រធានរដ្ឋសភា និងជួបពិភាក្សាទ្វេភាគីជាមួយសម្តេចធិបតី ហ៊ុន​ ម៉ាណែត៕ អត្ថបទ៖ វង្ស សុភាព