កម្ពុជាបើកការសន្ទនា​ជាមួយក្រសួង-ស្ថាប័នពាក់ព័ន្ធ ស្ថានទូតអូស្រ្តាលី និងអង្គការ​ដៃគូ ​ដើម្បី​រួម​គ្នា​លើ​​កកម្ពស់បរិយាបន្នហិរញវត្ថុ សម្រាប់ស្រ្តីនៅកម្ពុជា និងជាវេទិការ​ដ៏​មាន​សារៈ​សំខាន់​សម្រាប់​ការ​ពិភាក្សា ការផ្លាស់ប្តូរចំណេះដឹង និងបទពិសោធន៍ ដើម្បីបង្កើតនិងបន្ត កិច្ចសហ​ប្រតិបត្តិ​ការ​ក្នុង​ការ​អនុវត្តឱ្យកាន់តែប្រសើរ។

លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា លើកឡើងនៅក្នុងសិក្ខាសាលានិងកិច្ចពិភាក្សា ស្តីពីបរិយាបន្ន ហិរញ្ញវត្ថុសម្រាប់ស្ត្រីនៅកម្ពុជា នៅថ្ងៃទី២៧ ខែតុលា ឆ្នាំ២០២៦ នេះថា ប្រទេសកម្ពុជាសម្រេចបាននូវវឌ្ឍនភាពគួរ​ឱ្យ​កត់សម្គាល់​ក្នុងការអភិវឌ្ឍវិស័យហិរញ្ញវត្ថុ ការពង្រីកការទទួលបានសេវាហិរញ្ញវត្ថុ និងការលើកកម្ពស់សេវាហិរញ្ញវត្ថុឌីជីថល។ ការទូទាត់តាម ប្រព័ន្ធឌីជីថលសេវា​ធនាគារចល័ត និងប្រព័ន្ធទូទាត់ដែលប្រទាក់ក្រឡាគ្នា បានធ្វើឱ្យប្រតិបត្តិការហិរញ្ញវត្ថុកាន់តែមាន​ភាពងាយស្រួល និងជួយកាត់បន្ថយបន្ថយឧបសគ្គនានា ក្នុងការទទួលបានសេវាហិរញ្ញវត្ថុផ្លូវការ។ ចំពោះនៅក្នុង​សង្គម​កម្ពុជា ស្ត្រីដើរតួនាទីស្នូល​នៅ ក្នុងសេដ្ឋកិច្ច ដោយរាប់បញ្ចូល​តាំងពីការគ្រប់គ្រងហិរញ្ញវត្ថុគ្រួសារ រហូតដល់ការប្រកបអាជីវកម្ម និងការចូលរួមក្នុងវិស័យកសិកម្ម និង ពាណិជ្ជកម្មផងដែរ។

លោកជំទាវបណ្ឌិត បន្តថា ដើម្បីរក្សា និងពង្រឹងការចូលរួមចំណែក ស្ត្រីចាំបាច់ត្រូវ​មាន​លទ្ធភាព​​ទទួលបានសេវាហិរញ្ញវត្ថុ ដែលសមស្រប​ទៅនឹងតម្រូវការ និងគាំទ្រដល់សកម្មភាពសេដ្ឋកិច្ចរបស់ពួកគាត់. ទោះជាយ៉ាងណា ការទទួលបានសេវាតែមួយមុខ គឺ មិនទាន់គ្រប់គ្រាន់នោះទេ។ បរិយាបន្នហិរញ្ញវត្ថុ មានអត្ថន័យគ្រប់គ្រាន់ ដោយទាមទារឱ្យស្ត្រីអាចប្រើប្រាស់សេវាទាំងនេះដោយ មានប្រសិទ្ធភាពមានលទ្ធភាព ធ្វើការសម្រេចចិត្តផ្នែកហិរញ្ញវត្ថុដោយផ្អែកលើព័ត៌មានច្បាស់លាស់ ចេះគ្រប់គ្រងហានិភ័យហិរញ្ញវត្ថុ និងបង្កើតនូវសុខុមាលភាពហិរញ្ញវត្ថុឱ្យកាន់តែរឹងមាំសម្រាប់ខ្លួនឯង និងគ្រួសារ។

លោកជំទាវ ទ្រី សុខណា សមាជិកាក្រុមប្រឹក្សាភិបាលសមាគមសហគ្រិនស្រ្តីកម្ពុជា លើកឡើងថា សិក្ខាសាលានេះពិតជាមាន សារៈសំខាន់ណាស់ ដែលភាគីពាក់ព័ន្ធបានរួមគ្នាស្វែងរកវិធីសាស្ត្រ ដើម្បីប្រែក្លាយបរិយាបន្នហិរញ្ញវត្ថុ និងគោលនយោបាយនានា ដែលបានដាក់ចេញ ឱ្យទៅជាសកម្មភាពជាក់ស្តែង ដើម្បីឆ្លើយតបឱ្យបានកាន់តែប្រសើរ ស្របតាមតម្រូវការរបស់ស្ត្រី រួមទាំងស្ត្រីដែល មានពិការភាព ក្នុងគោលដៅជំរុញឱ្យពួកគាត់មានលទ្ធភាពក្នុងការចូលរួមយ៉ាងសកម្ម និងមានប្រសិទ្ធភាពនៅក្នុងវិស័យហិរញ្ញវត្ថុ។

លោកជំទាវកិតិ្តបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី លើកឡើងថា បរិយាបន្នហិរញ្ញវត្ថុជាអាទិភាពស្នូលមួយ ដែល ត្រូវបានកំណត់នៅក្នុងផែនការយុទ្ធសាស្ត្រនារីរតនៈទី៦។ សម្រាប់ក្រសួងកិច្ចការនារី បរិយាបន្នហិរញ្ញវត្ថុមានអត្ថន័យលើសពីការដែល ស្ត្រីគ្រាន់តែអាចបើកគណនីធនាគារ, ការទទួលបានឥណទាន ឬការប្រើប្រាស់សេវាទូទាត់ឌីជីថល។ អ្វីដែលសំខាន់ជាងនេះ តើស្រ្តី មានចំណេះដឹង ឱកាស ផលិតផល និងសេវាហិរញ្ញវត្ថុសមស្រប ព្រមទាំងមានសិទ្ធិ និងភាពអង់អាចក្នុងការសម្រេចចិត្ត ដើម្បីប្រើ ប្រាស់ហិរញ្ញវត្ថុក្នុងការលើកកម្ពស់ជីវភាព, ការពង្រីកអាជីវកម្ម, ការបង្កើតទ្រព្យសម្បត្តិ, ការបង្កើនភាពធន់របស់គ្រួសារចំពោះវិបត្តិ សេដ្ឋកិច្ច និងរៀបចំផែនការអនាគតរបស់ខ្លួនដោយមានទំនុកចិត្តដែរឬទេ?។

លោកជំទាវកិតិ្តបណ្ឌិត បានគូសបញ្ជាក់នូវសារមួយថា «គោលដៅរបស់ក្រសួង មិនត្រឹមតែនាំស្រ្តីឱ្យចូលទៅក្នុងប្រព័ន្ធ ហិរញ្ញវត្ថុប៉ុណ្ណោះទេ ប៉ុន្តែត្រូវធ្វើឱ្យប្រព័ន្ធហិរញ្ញវត្ថុអាចឆ្លើយតប និងបម្រើស្ត្រីបានកាន់តែប្រសើរ» មានន័យថា គឺត្រូវបន្តដំណើរ ពីការទទួលបានសេវាហិរញ្ញវត្ថុ ឆ្ពោះទៅបរិយាបន្នហិរញ្ញវត្ថុប្រកបដោយអត្ថន័យ និងឈានទៅរកការពង្រឹងភាពអង់អាចផ្នែកសេដ្ឋកិច្ច របស់ស្ត្រី និងក្រុមគ្រួសាររបស់ពួកគេ៕ អត្ថបទ៖ សុន រ៉ាឌី