កំពង់ឆ្នាំង៖ នៅក្នុងកិច្ចប្រជុំស្តីពីការលើកកម្ពស់សមភាពយេនឌ័រ និង​សមត្ថភាពស្ត្រី​មាន​ពិការភាព នាព្រឹកថ្ងៃទី២០ ខែមិថុនា ឆ្នាំ២០២២នេះ លោកស្រី ប៊ន សុភី អភិបាលរង​ខេត្តកំពង់ឆ្នាំង បានជំរុញអោយមានការចូលរួមពីស្ថាប័ន ដៃគូអភិវឌ្ឍ វិស័យឯកជន អង្គការ​ជន​មាន​ពិការភាព អង្គការមិនមែនរដ្ឋាភិបាលនានា ឈនទៅ​សម្រេច​បាន​នូវ​គុណភាព​ជីវិត​របស់​ជន​មាន​ពិការភាពប្រកបដោយចិរភាព ដើម្បីធ្វើអោយជនមានពិការភាព និងក្រុម​គ្រួសារ​មាន​គុណភាព​ជីវិតល្អ ចូលរួមយ៉ាងសកម្មពេញលេញ ស្មើភាពគ្នាក្នុងសង្គមដែលមានការគោរពសិទ្ធិ និង​សេចក្តីថលៃថ្នូរ ព្រមទាំងមានការធ្វើបរិយាបន្នពិការភាពក្នុងគ្រប់វិស័យ និងការអភិវឌ្ឍន៍។

 លោកស្រី ប៊ន សុភី បានថ្លែងបន្តថា៖ នៅព្រះរាជាណាចក្រកម្ពុជា ការងារពិការភាព គឺជាបញ្ហាប្រឈមមួយដែលត្រូវយកចិត្តទុកដាក់ខ្ពស់ ដើម្បីធានា​ដល់​ការ​អភិវឌ្ឍន៍​ប្រកប​ដោយ​បរិយាបន្ន និងចីរភាព។ ឆ្លើយតបនឹងបញ្ហានេះ រាជរដ្ឋាភិបាលកម្ពុជា បាននិងកំពុង​ដោះស្រាយ​យ៉ាង​យក​ចិត្តទុកដាក់តាមរយៈការរៀបចំកសាង អនុវត្តគោលនយោបាយយុទ្ធសាស្ត ផែនការ​សកម្មភាព បង្កើតយន្តការ និងកម្មវិធីគាំទ្រនានាជាច្រើន។ ផែនការយុទ្ធសាស្ត្រជាតិស្តីពីពិការភាព២០១៩-២០២៣ គឺជាសមិទ្ធផល និង​ជា​ប្រវត្តិសាស្ត្រ​ថ្មី​មួយ​ទៀត​ ក្នុងវិស័យពិការភាព បន្ទាប់ពីការ​អនុវត្ត​ផែនការ​យុទ្ធសាស្ត្រ​ជាតិ​ស្តីពី​ពិការភាព​ ២០១៤-២០១៨ បានបញ្ចប់ទៅដោយមានប្រសិទ្ធភាព ក្រោមការ​ដឹកនាំ​ដ៏​ឈ្លាសវៃ​ និង​ប្រកប​ដោយ​គតិ​បណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធាន​កិត្តិយសក្រុមប្រឹក្សាសកម្មភាពជនពិការ។ រាជរដ្ឋាភិបាលបាន​ដាក់​ចេញ​នូវ​គោល​នយោបាយ​ជា​អាទិភាព ទិសដៅជាយុទ្ធសាស្ត្រ និងសកម្មភាព​សំខាន់ៗ​សម្រាប់​ឆ្លើយ​តប​ទៅ​នឹង​តម្រូវ​ការ និងបញ្ហាប្រឈមនានាក្នុងវិស័យពិការភាព សំដៅលើកកម្ពស់សមត្ថភាពក្រសួងស្ថាប័ន ពង្រឹង​ហេដ្ឋារចនា សម្ព័ន្ធសង្គមនិងសេដ្ឋកិច្ច ក្នុងទិសដៅ​បង្កើត​កាលានុវត្តភាព​ជីវភាព​សម​ស្រប​សម្រាប់​ជនមានពិការភាព ក្នុងការកាត់​បន្ថយ​ភាពក្រីក្រ​ និង​ការ​ចូលរួម​របស់​ជន​មាន​ពិការ​ភាព​ដោយ​ពេញ​លេញនៅក្នុងសង្គម។

លោកស្រីអភិបាលរងខេត្ត បានថ្លែងអំណរគុណដល់អង្គការ«សាអូរី» ដែលមានស្នាក់​ការ​នៅក្នុង​ខេត្ត​កំពង់ឆ្នាំង ដែលបាន និងកំពុងយកចិត្តទុកដាក់លើការលើកកម្ពស់សមភាពយេនឌ័រ និងសមត្ថភាព​ស្ត្រីមានពិការភាព ដើម្បីពង្រឹងសមត្ថភាពស្ត្រីមានពិការភាព និងលើកកម្ពស់​បរិយាបន្ន​សង្គម​ក្នុងគោលបំណង ចងក្រងបណ្តាញ​ស្ត្រីមាន​ពិការភាព​ក្នុង​សហគមន៍​អោយ​មាន​ឱកាស​ពង្រឹងសមត្ថភាពរបស់ខ្លួន ក៏ដូចជាការផ្សព្វផ្សាយ​ពីការប​ង្ក​លក្ខណៈ​ងាយស្រួលតា​ម​បទដ្ឋាន​បច្ចេកទេសពីថ្នាក់ជាតិដោយគ្មានរបាំងសម្រាប់ជនមានពិការភាព៕ អត្ថបទ៖ ហុង វាស្នា