ភ្នំពេញ៖ លោក ជូ ណាក់យ៉ាំង (Joo Nak-young) អភិបាលក្រុងឃ្យុងជូ នៃសាធារណរដ្ឋកូរ៉េ បានលើកឡើងថា ប្រទេសកូរ៉េអត្រាកំណើត របស់ពលរដ្ឋមានការថយចុះ ហើយមនុស្ស​ចាស់មានការកើនឡើង ដែលធ្វើឲ្យខ្វះខាតកម្លាំងពលកម្ម ខណៈភាគីកូរ៉េ កំពុងពិភាក្សាជាមួយក្រសួងការងារ និងបណ្ដុះបណ្ដាលវិជ្ជាជីវៈកម្ពុជា លើការងារបញ្ជូនពលករបន្ថែម ។

ក្នុងជំនួបជាមួយលោកជំទាវកិត្តិសង្គហបណ្ឌិត ឃួន សុដារី អនុប្រធានទី២ នៃរដ្ឋសភាជាតិ នៅថ្ងៃទី១៩ ខែតុលា ឆ្នាំ២០២២ លោក ជូ ណាក់យ៉ាំង បានឲ្យដឹងថា ចំណងទាក់ទងទ្វេភាគី កូរ៉េ-កម្ពុជា មានកិច្ចសហប្រតិបត្តិការទៅលើវិស័យជាច្រើន និងពិតជាមានការរីកចម្រើន រួមមានការទូត វប្បធម៌ ទេសចរណ៍ ឧស្សាហកម្ម ពាណិជ្ជកម្មជាដើម ។

លោកបន្តថា នៅប្រទេសកូរ៉េ អត្រាមនុស្សកើតថយចុះ រីឯអត្រាមនុស្សចាស់កើនឡើង ដែលធ្វើឱ្យប្រទេសកូរ៉េកំពុងជួបវិបត្តិខ្វះកម្លាំងពលកម្ម ហើយទីក្រុងឃ្យុងយូ ក៏ជួបបានបញ្ហានេះដែរ ។ អំឡុងពេលនៃដំណើរទស្សនកិច្ចនៅកម្ពុជា ប្រតិភូក្រុងឃ្យុងយូ បានធ្វើការងារជាច្រើនជាមួយក្រសួងការងារកម្ពុជា ពាក់ព័ន្ធការបញ្ជូនពលករទៅបម្រើការនៅកូរ៉េ ដើម្បីបង្កលក្ខណៈងាយ​ស្រួលទាំងមុនពេលទៅ អំឡុងពេលនៅកូរ៉េ និងត្រលប់មកកម្ពុជាវិញ ។

លោកអភិបាលក្រុងថា ពលករខ្មែរធ្វើបម្រើការងារនៅកូរ៉េ គឺមានភាពឧស្សាហ៍ព្យាយាម និងស្មោះត្រង់ ដែលធ្វើឱ្យក្រុមហ៊ុន ឧស្សាហកម្មានានា ត្រូវការពលកម្មពី​ប្រទេសកម្ពុជា​ជាច្រើន​ទាំងការងារតាមរដូវ និងរយៈពេលវែង ។

ក្នុងឱកាសនោះលោកជំទាវកិត្តិសង្គហបណ្ឌិត បានថ្លែងអំណរគុណយ៉ាងជ្រាលជ្រៅ ដល់សាធារណរដ្ឋកូរ៉េ ដែលបានបង្កលក្ខណៈងាយស្រួល ប្រកបដោយភាពយកចិត្តទុកដាក់​ដល់ពលករខ្មែរដែលទៅបម្រើការងារនៅកូរ៉េ ។ លោកជំទាវបន្តថា ពលករខ្មែរមានការយកចិត្តទុកដាក់ផ្សេងៗ រួមមានការថែទាំសុខភាព ការបំពាក់បំប៉នចំណេះជំនាញបន្ថែម ជាមួយនឹងប្រាក់កម្រៃពលកម្មសមរម្យ បានធ្វើឱ្យពលករខ្មែរ អាចបន្តអាណត្តិការងាររបស់គេ នៅប្រទេសកូរ៉េ និងបានជួយឱ្យជីវភាពគ្រួសាររបស់គេកាន់តែប្រសើរឡើង ។

លោកជំទាវ ឃួន សុដារី បានបន្ថែមថា អតីតពលករខ្មែរនៅកូរ៉េមួយចំនួន បានប្រែក្លាយជីវភាពរស់នៅសព្វថ្ងៃកាន់តែប្រសើរឡើង ដោយសារវិជ្ជាជីវៈ បច្ចេកវិទ្យាថ្មីៗ និងភាពច្នៃប្រឌិតដែលបានរស់នៅរៀនសូត្រ អំឡុងពេលបំពេញការងារនៅទីនោះ ព្រមទាំងបានរួមចំណែកដល់ការអភិវឌ្ឍន៍សេដ្ឋកិច្ចសង្គមរបស់កម្ពុជាផងដែរ ៕អត្ថបទ ៖ បាន សុខរិទ្​