ភ្នំពេញ៖ សាកលវិទ្យាល័យបច្ចេកវិទ្យា និងវិទ្យាសាស្ត្រកម្ពុជា (ខេមតិច) សហការជាមួយក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ ហៅកាត់ថា ក.ស.វ. (ECOSOCC) នៃទីស្ដីការគណៈរដ្ឋមន្រ្តី និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) បានរៀបចំវេទិកាស្តីពីបញ្ញាសិប្បនិម្មិតលើកទី៣ (3rd AI Forum) ដោយមានអ្នកចូលរួមមកពីរដ្ឋាភិបាល វិស័យឯកជន គ្រឹះស្ថានអប់រំ និងអ្នកស្រាវជ្រាវទាំងក្នុង និងក្រៅប្រទេស។
វេទិកាបញ្ញាសិប្បនិម្មិតលើកទី៣នេះ ត្រូវបានរៀបចំឡើង កាលពីរសៀលថ្ងៃទី២២ ខែមីនា ឆ្នាំ២០២៤ ក្នុងគោលបំណងស្វែងយល់និងពិភាក្សាអំពីសក្តានុពល និងអភិបាលកិច្ចបញ្ញាសិប្បនិម្មិត(AI Governance) នៅក្នុងបរិបទរបស់ប្រទេសកម្ពុជា។
នៅក្នុងវេទិការនេះ វាគ្មិនកិត្តិយសបានលើកឡើងអំពីសក្តានុពលក្នុងការប្រើប្រាស់បញ្ញាសិប្បនិម្មិត(AI) ដើម្បីចូលរួមជំរុញការអភិវឌ្ឍក្នុងវិស័យសាធារណៈនិងឯកជន រួមមានការប្រើប្រាស់បញ្ញាសិប្បនិម្មិតដើម្បីការព្យាករណ៍ព្រឹត្តិការណ៍ដែលនឹងកើតឡើង ការប្រើChatbotជាជំនួយការ ស្វែងរកការក្លែងបន្លំផ្សេងៗ វាយតម្លៃហានិភ័យដែលអាចកើតមាន វិភាគគោលនយោបាយជាដើម។ បញ្ញាសិប្បនិម្មិតត្រូវបានប្រើប្រាស់ក្នុងវិស័យឯកជន ដូចជាការធ្វើស្វ័យប្រវត្តិកម្មនៃការវិភាគដោយផ្អែកលើទិន្នន័យ។ល។ ក្រៅពីនេះបញ្ញាសិប្បនិម្មិត ក៏ត្រូវបានប្រើប្រាស់ដើម្បីជាជំនួយដល់ការងារប្រចាំថ្ងៃផងដែរ។
ទន្ទឹមនឹងអត្ថប្រយោជន៍របស់បញ្ញាសិប្បនិម្មិតក្នុងវេទិកាពិភាក្សា វាគ្មិនកិត្តយសក៏បានលើកឡើងអំពីចំណុចសំខាន់ៗមួយចំនួនដែលគួរតែធ្វើការពិចារណា ដើម្បីអោយការប្រើប្រាស់បញ្ញាសិប្បនិម្មិតប្រកបដោយប្រសិទ្ធភាព និងកាត់បន្ថយផលប៉ះពាល់ដល់សង្គមអោយនៅតិចបំផុត។ ចំណុចដែលគួរពិចារណាទាំងនោះ រួមមានការលើកកម្ពស់ការយល់ដឹងអំពីក្រមសីលធម៌ក្នុងការប្រើប្រាស់បញ្ញាសិប្បនិម្មិត ការការពារសុវត្ថិភាពទិន្នន័យទូទៅនិងទិន្នន័យឯកជន និង អភិបាលកិច្ចបញ្ញាសិប្បនិម្មិត ព្រោះថាបច្ចេកវិទ្យាបាននិងកំពុងតែចូលរួមយ៉ាងសកម្មក្នុងសកម្មភាពប្រចាំថ្ងៃរបស់យើង។
គួរបញ្ជាក់ផងដែរថា វេទិកាស្តីពីបញ្ញាសិប្បនិម្មិតរៀបចំឡើងជារៀងរាល់ឆ្នាំដោយសាកលវិទ្យាល័យខេមតិចក្នុងគោលបំណងបង្កើតឱកាសក្នុងការជួបជុំ និងពិភាក្សាលើការវិវឌ្ឍថ្មីៗរបស់បញ្ញាសិប្បនិម្មិត ក៏ដូចជាការជំរុញអោយប្រើប្រាស់បញ្ញាសិប្បនិម្មិតដោយភាពវិជ្ជមានសម្រាប់សង្គម៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
