រូបភាពវីដេអូឃ្លីបឃើញក្រុមអ្នកស្រុកជួបជុំគ្នានៅលើផ្លូវស្ថិតនៅស្រុក Libon តំបន់ភាគកណ្តាល Bicol ប្រទេសហ្វីលីពីន ពេលបំណាក់ដីកើតឡើង និងបានធ្វើឲ្យខូចខាតអគាររស់នៅរបស់អ្នកស្រុក ។

បំណាក់ដីនេះ បានកើតមានឡើង ក្រោយព្យុះត្រូពិក Trami នាំមកជាមួយភ្លៀងធ្លាក់ខ្លាំង ដោយបានសម្លាប់មនុស្សយ៉ាងហោច ២៦នាក់ និងបង្ខំឲ្យមនុស្សជាង ១៥ម៉ឺននាក់ រត់ភៀសខ្លួនចេញពីផ្ទះសម្បែងរបស់ពួកគេ ។

ក្រុមមន្រ្តីនិយាយថា ភាគច្រើននៃអ្នកស្លាប់ដោយសារព្យុះកាលពីរយៈពេលប៉ុន្មានថ្ងៃកន្លងមកនេះ បណ្តាលមកពីការលង់ទឹក និងបំណាក់ដីនៅឧបទ្វីប Bicol ។

ព្យុះ Trami បានបោកបក់ដល់ដីគោកនៅថ្ងៃព្រហស្បតិ៍នេះ នៅតំបន់ឆ្នេរភាគឦសានកោះ Luzon ដែលជាកោះមានមនុស្សរស់នៅច្រើនបំផុតរបស់ហ្វីលីពីន ហើយនិងបណ្តាលឲ្យកើតមានទឹកជំនន់ និងបំណាក់ដីទ្រង់ទ្រាយធំ ។

ឧបទ្វីប Bicol រងផលប៉ះពាល់ធ្ងន់ធ្ងរជាងគេ ជាទីដែលទឹកជំនន់ធ្វើឲ្យពលរដ្ឋ ចាកចេញពីផ្ទះសម្បែងរបស់ពួកគេ ។

មន្ទីរឧតុនិយមហ្វីលីពីន និយាយថា ព្យុះទីហ្វុង គឺជារឿងធម្មតាទេនៅក្នុងប្រទេសហ្វីលីពីននៅអំឡុងពេលនេះ ប៉ុន្តែភ្លៀងបង្កឡើងដោយសារព្យុះ Trami បានធ្លាក់ខ្លាំងខុសពីប្រក្រតី ។

ពលរដ្ឋដែលជាប់ខ្លួននៅតាមដំបូលផ្ទះ បានបង្ហោះរូបភាពនៅលើបណ្តាញព័ត៌មានសង្គម ដើម្បីអំពាវនាវសុំជំនួយ បង្ខំឲ្យក្រុមឆ្មាំល្បាតឆ្នេរចេញប្រតិបត្តិការទូកពោងរបស់ពួកគេ ។

លោក Karen Tabagan មកពីទីក្រុង Bato ដែលរងការជន់លិចខ្លាំង និយាយប្រាប់ទីភ្នាក់ងារព័ត៌មាន AFPថា វាពិតជាគ្រោះថ្នាក់ខ្លាំងណាស់ ។ ពួកយើងបានរង់ចំាក្រុមជួយសង្រ្គោះយ៉ាងយូរ ៕