មនុស្សចាស់វ័យចាប់ពី ៦០ ឆ្នាំឡើង ដែលមានបណ្ណសមធម៌ ត្រូវទៅឃុំ-សង្កាត់ ដើម្បី​ធ្វើ​បច្ចុប្បន្ន​ភាព​ជា​ចាំបាច់ ដើម្បីអាចបន្តបើកសាច់ប្រាក់ប្រចាំខែ នៅឆ្នាំ ២០២៥ខាងមុខ។ ការទៅធ្វើ​បច្ចុប្បន្ន​ភាព​នេះ ត្រូវភ្ជាប់ជាមួយបណ្ណសមធម៌ អត្តសញ្ញាណបណ្ណសញ្ជាតិខ្មែរ ឬសំបុត្រ​កំណើត​។

មូលនិធិជាតិជំនួយសង្គម បានជូនដំណឹងឱ្យមនុស្សចាស់វ័យចាប់ពី ៦០ឆ្នាំឡើង ដែល​រស់​នៅ​ក្នុង​គ្រួសារ​ក្រីក្រ​មានបណ្ណសមធម៌ ត្រូវទៅធ្វើបច្ចុប្បន្នភាពនៅឃុំ-សង្កាត់ដែលខ្លួនរស់នៅ។ ការធ្វើ​បច្ចុប្បន្ន​ភាព​នេះ គឺចាប់ផ្ដើមពីថ្ងៃទី ១ រហូតដល់ថ្ងៃទី ៣០ ខែធ្នូ ឆ្នាំ ២០២៤ ដើម្បីអាច​បន្ត​បើក​សា​​ច់ប្រាក់​ប្រចាំខែនៅឆ្នាំ ២០២៥ខាងមុខ។ ការ​ខកខាន​ទៅ​ធ្វើ​បច្ចុប្បន្ន​ភាព​តាម​ពេល​វេលា​កំណត់​ខាងលើការបើកសាច់ប្រាក់ឧបត្ថម្ភជាប្រចាំខែនៅឆ្នាំ ២០២៥ នឹងត្រូវផ្អាកជា​បណ្ដោះ​អាសន្ន ដោយរង់ចាំការមកធ្វើបច្ចុប្បន្នភាព ឬការជូនដំណឹងពីពីស្ថានភាពអ្នកទទួលផល រយៈ​ពេល ៣ខែ បើពុំនោះទេអ្នកទទួលផលនឹងត្រូវលុបឈ្មោះចេញពីកម្មវិធីដោយស្វ័យប្រវត្តិ។

ពាក់ព័ន្ធ​នឹងការងារនេះដែរ សម្រាប់មន្ត្រីមូលដ្ឋាននៅសង្កាត់ស្ទឹងមានជ័យទី ២ បានចាត់​ទុក​ការងារ​គាំពារសង្គមដែលផ្ដល់អត្ថប្រយោជន៍ដល់គ្រួសារក្រីក្រជាការងារអាទិភាព។ លោក ទូច សំអុល ជាចៅសង្កាត់ស្ទឹងមានជ័យទី ២ លើកឡើងថា មន្ត្រីសង្កាត់​មាន​ការ​យក​ចិត្ត​ទុក​ដាក់​លើ​ការងារ​ទាំង​នេះ ដោយបច្ចុប្បន្នមានទាំងការចុះបញ្ជីឈ្មោះសិស្សអាហាររូបករណ៍ចូលក្នុងប្រព័ន្ធ កា​រ​ធ្វើបច្ចុប្បន្នជនមានពិការភាពរស់នៅក្នុងគ្រួសារក្រីក្រ និងការធ្វើការធ្វើបច្ចុប្បន្នភាពពលរដ្ឋវ័យ ៦០​ឡើងក្នុងគ្រួសារក្រីក្រ។ សង្កាត់បានទាំងផ្សព្វផ្សាយព័ត៌មានជូនពលរដ្ឋ និងបានធ្វើ​បច្ចុប្បន្ន​ជូន​ពួក​គាត់ស្ទើគ្រប់ក្រុមគោលដៅទៅហើយ។

មនុស្សចាស់វ័យចាប់ពី ៦០ ឆ្នាំឡើង ជាក្រុមគោលដៅដែលត្រូវទទួលបានថវិកាបន្ថែម ពីកម្ម​វិធី​ជាតិ​ជំនួយ​សង្គមក្នុងកញ្ចប់គ្រួសារ។ កម្មវិធីជាតិជំនួយសង្គមក្នុងកញ្ចប់គ្រួសារនេះ ជា​កម្ម​វិធី​របស់​រាជ​រដ្ឋាភិបាល ដែលផ្ដល់ថវិកាប្រចាំខែជូនគ្រួសារក្រីក្រមានបណ្ណសមធម៌។ ថវិកាគោល​ចំពោះ​គ្រួសារ​មាន​បណ្ណសមធ៌មនីមួយៗ គឺទទួលបាន ៣៤ ០០០រៀល ក្នុង១ខែ។ ចំពោះក្រុម​គោល​ដៅ​បន្ថែម​ដូច​ជា ជនមានពិការភាព ជនចាស់ជរាអាយុចាប់ពី ៦០ឆ្នាំឡើង ជនមានពិការភាព និង​អ្នក​ផ្ទុក​​មេរោគអេដស៍ និងជំងឺអេដស៍ ទទួលបាន ២៨ ០០០រៀលបន្ថែមក្នុងរៀងរាល់ខែផងដែរ។

សូម​ជម្រាប បច្ចុប្បន្ននៅតាមឃុំសង្កាត់នីមួយៗ បន្តការចុះឈ្មោះ សិស្សក្រីក្រ សម្រាប់​កម្ម​វិ​ធី​អាហា​រូបករណ៍សិស្សក្រីក្រ ដែលរាជរដ្ឋាភិបាលផ្ដល់ជាថវិកាជូនជាប្រចាំខែ និងការបន្ត​ធ្វើ​បច្ចុប្បន្ន​ភាព​ជន​មានពិការភាព និងចាស់ជរា ផងដែរ៕ អត្ថបទ៖ គឹមហុក