យោងតាមសេចក្តីថ្លែងការណ៍ដ៏ម៉ឺងម៉ាត់មួយចេញពីទីក្រុងប៉េកាំង សមយុទ្ធយោធារបស់ចិននៅជិតកោះតៃវ៉ាន់កាលពីថ្ងៃចន្ទដើមសប្ដាហ៍នេះ គឺជាការដាក់ទណ្ឌកម្មចំពោះការបន្តជំរុញការបំបែកខ្លួនរបស់មេដឹកនាំកោះតៃវ៉ាន់ ។

ប្រទេសចិន ដែលពុំបោះច្រានចោលការប្រើប្រាស់កម្លាំងដើម្បីក្រសោបយកកោះតៃវ៉ាន់ បានបង្កើនសម្ពាធផ្នែកយោធា និងនយោបាយ លើកោះនេះក្នុងរយៈពេលប៉ុន្មានឆ្នាំចុងក្រោយនេះ។

អាជ្ញាធរការពារជាតិកោះតៃវ៉ាន់បាននិយាយថា ប្រទេសចិនបានអនុវត្តការល្បាតត្រៀមប្រយុទ្ធរួមគ្នាមួយនៅពេលព្រឹក និងមួយនៅពេលរសៀល ដោយបានបញ្ជូនយន្តហោះចម្បាំងចិនចំនួន៥៤ គ្រឿង រួមទាំងយន្តហោះ J-10 និងយានដ្រូនជាច្រើនគ្រឿង ទៅកាន់តំបន់ក្បែរកោះតៃវ៉ាន់។

កោះនេះបាននិយាយថា យន្តហោះរបស់ចិនបានហោះហើរក្នុងដែនអាកាសទៅភាគខាងជើង ខាងលិច និរតី និងខាងកើតនៃកោះតៃវ៉ាន់ ហើយកងកម្លាំងដែនអាកាស និងកងទ័ពជើងទឹករបស់កោះតៃវ៉ាន់ត្រូវបានបញ្ជូនដើម្បីឃ្លាំមើល។

ប្រភពខាងលើបន្តថា ក្នុងចំណោមយន្តហោះទាំងនោះ មានយន្តហោះចំនួន ៤២ គ្រឿងបានឆ្លងកាត់ខ្សែបន្ទាត់មេដ្យានរបស់ច្រកសមុទ្រតៃវ៉ាន់ ដែលជាបន្ទាត់ក្រៅផ្លូវការរវាងភាគីទាំងពីរ។

អ្នកនាំពាក្យរបស់ការិយាល័យទទួលបន្ទុកកិច្ចការកោះតៃវ៉ាន់របស់ចិន បាននិយាយនៅក្នុងសេចក្តីថ្លែងការណ៍ថា ប្រសិនបើរដ្ឋបាលលោក ឡៃ ឆីង-ទ័រ ហ៊ានបង្ករឿង និងលេងជាមួយភ្លើង នោះនឹងនាំមកនូវការបំផ្លិចបំផ្លាញខ្លួនឯង៕