ភ្លើងឆេះព្រៃនៅរដ្ឋ New Jersey អាចនឹងបញ្ចប់ទៅក្នុងនាមជាភ្លើងឆេះព្រៃធំបំផុតក្នុងរដ្ឋរបស់សហរដ្ឋអាមេរិកមួយនេះ នារយៈពេល ២០ឆ្នាំ ។

ក្រុមមន្រ្តីរដ្ឋ New Jersey និយាយកាលពីថ្ងៃពុធថា ភ្លើងឆេះព្រៃដែលកំពុងឆាបឆេះនៅទីក្រុង Pinelands អាចនឹងក្លាយជាគ្រោះមហន្តរាយភ្លើងឆេះព្រៃដ៏អាក្រក់បំផុតនៅក្នុងប្រវត្តិសាស្រ្តរបស់រដ្ឋ ។

ភ្លើងឆេះព្រៃ Jones Road បានលេបត្របាក់ដីព្រៃចំនួនជាង ៥ពាន់ហិចតា ហើយភ្លើងឆេះព្រៃចំនួន ៤០ភាគរយប៉ុណ្ណោះ ត្រូវបានទប់ស្កាត់ គិតត្រឹមរសៀលថ្ងៃពុធ ។

លោក Bill Donnelly គឺជាប្រធានសេវាកម្មភ្លើងឆេះព្រៃរដ្ឋ New Jersey និយាយថា អ្នកដឹងស្រាប់ហើយថា រដ្ឋ New Jersey មានដីព្រៃងាយឆាបឆេះខ្លាំងបំផុត ។ អ្នករាល់គ្នាធ្លាប់ឃើញរដ្ឋ California ហើយរឿងគឺដូចគ្នាទេ ព្រៃដែលកំពុងឆាបឆេះ រីករាលដាលខ្លាំងតាមតំបន់ភ្នំ ។

លោក Donnelly បន្តថា មកទល់នឹងពេលនេះក្នុងឆ្នាំនេះ រដ្ឋ New Jersey កើតមានភ្លើងឆេះព្រៃ ២លើកខុសពីធម្មតា ។

ភ្លើងឆេះព្រៃចុងក្រោយនេះដែរ បានចាប់ផ្តើមកាលពីថ្ងៃអង្គារ នៅតំបន់គ្រប់គ្រងសត្វព្រៃ Greenwood ស្ថិតក្នុងស្រុក Ocean នៅចម្លោះទីក្រង Asbury Park និងទីក្រុង Atlantic City ។ 

ភ្លើងឆេះព្រៃនេះ ត្រូវបានគេរំពឹងថា នឹងបន្តឆាបឆេះរយៈពេលច្រើនថ្ងៃទៀត រហូតដល់មានភ្លៀងធ្លាក់នៅថ្ងៃសុក្រ ឬថ្ងៃសៅរ៍ ។ ទោះបីជាយ៉ាងណាក៏ដោយ វាពុំបានគំរាមកំហែងដល់តំបន់មានមនុស្សរស់នៅនោះទេ ៕