ក្រុមហ៊ុន Boeing បានរៀបចំស្វែងរកអតិថិជនផ្សេងជំនួស ដើម្បីលក់យន្តហោះដែលដើមឡើយត្រៀមបញ្ជូនទៅប្រទេសចិន តែត្រូវបានជាប់គាំង ដោយសារមានជម្លោះពាណិជ្ជកម្មជាមួយសហរដ្ឋអាមេរិក ខណៈដែលក្រុមហ៊ុនផលិតយន្តហោះមួយនេះ ប្រឺងប្រែងកាត់បន្ថយផលប៉ះពាល់ដល់ការចែកចាយយន្តហោះ និងប្រមែប្រមូលប្រាក់ចំណូលរបស់ខ្លួនឡើងវិញ។

នៅក្នុងបទសម្ភាសន៍ជាមួយទូរទស្សន៍ CNBC កាលពីថ្ងៃពុធ (ទី២៣ ខែមេសា) នាយកប្រតិបត្តិ លោក Kelly Ortberg បានបញ្ជាក់ថា ប្រទេសចិនបានឈប់ទទួលយកការចែកចាយពីក្រុមហ៊ុន Boeing ដោយការអះអាងនេះ ត្រូវបានធ្វើឡើងបន្ទាប់ពីក្រុមហ៊ុនបានរាយការណ៍ពីលទ្ធផលដ៏ល្អប្រសើរជាងការរំពឹងទុក។

គួរបញ្ជាក់ថា ចំណាត់ការនេះ ដែលត្រូវបានរាយការណ៍ជាលើកដំបូងកាលពីសប្តាហ៍មុនដោយសារព័ត៌មាន Bloomberg News បានធ្វើឲ្យមានការសង្ស័យ អំពីជោគវាសនារបស់យន្តហោះប្រហែល ៥០គ្រឿង ដែលត្រូវបានគ្រោងបញ្ជូនទៅប្រទេសចិន នៅឆ្នាំ២០២៥។

អំឡុងការប្រកាសពីប្រាក់ចំណូលរបស់ក្រុមហ៊ុន Boeing លោក Ortberg បានប្រាប់ឲ្យដឹងថា៖ «យើងកំពុងទំនាក់ទំនងយ៉ាងជិតស្និទ្ធជាមួយអតិថិជនចិនរបស់យើង ហើយយើងកំពុងវាយតម្លៃយ៉ាងសកម្មនូវជម្រើសនានា ដើម្បីលក់យន្តហោះដែលបានផលិតរួចហើយ ឬកំពុងដំណើរការផលិត»។

ការជាប់គាំងនេះ បានគូសបញ្ជាក់ពីស្ថានភាពដ៏លំបាកដែលក្រុមហ៊ុន Boeing ប្រឈមជាមួយ ក្នុងនាមជាក្រុមហ៊ុននាំចេញទំនិញឧស្សាហកម្មដ៏ធំបំផុតរបស់សហរដ្ឋអាមេរិក បន្ទាប់ពីប្រធានាធិបតីអាមេរិក លោក Donald Trump បានប្រកាសពីអត្រាពន្ធគយជាមួយដៃគូពាណិជ្ជកម្មភាគច្រើនរបស់អាមេរិក។

រហូតមកដល់ពេលនេះ មានតែប្រទេសចិនប៉ុណ្ណោះដែលបានសងសឹកជាមួយនឹងការដំឡើងពន្ធគយនេះ ដោយបានដកក្រុមហ៊ុន Boeing ចេញពីទីផ្សារក្រុមហ៊ុនអាកាសចរណ៍របស់ប្រទេសនេះ៕