ប្រធានាធិបតីអាមេរិកលោក Donald Trump បាននិយាយថាលោកគិតថាសមភាគីអ៊ុយក្រែនលោក Volodymyr Zelensky មានឆន្ទៈក្នុងការប្រគល់តំបន់គ្រីម៉េ (Crimea)ទៅឱ្យប្រទេសរុស្ស៊ីជាផ្នែកនៃកិច្ចព្រមព្រៀងសន្តិភាព ទោះបីជាទីក្រុង Kyiv បដិសេធសំណើណាមួយពីមុនក៏ដោយ។

នៅពេលសួរថាតើលោកគិតថាប្រធានាធិបតីអ៊ុយក្រែនបានត្រៀមខ្លួនរួចជាស្រេចដើម្បីប្រគល់ការគ្រប់គ្រងឧបទ្វីបភាគខាងត្បូងរបស់ខ្លួន ដែលត្រូវបានបញ្ចូលជាឧបសម្ព័ន្ធដោយរុស្ស៊ីក្នុងឆ្នាំ ២០១៤ ឬយ៉ាងណានោះ លោក Trump បានឆ្លើយតបថា លោកគិតដូច្នេះ ។

លោក Trump ក៏បានជំរុញប្រធានាធិបតីរុស្ស៊ីលោក Vladimir Putin ឱ្យបញ្ឈប់ការបាញ់ប្រហារ និងចុះហត្ថលេខាលើកិច្ចព្រមព្រៀងមួយផងដែរ ដើម្បីបញ្ចប់ការប្រយុទ្ធគ្នា ដោយបានលើកឡើងថា កិច្ចព្រមព្រៀងនោះ អាចសម្រេចបានក្នុងរយៈពេលពីរសប្តាហ៍។

លោកបានធ្វើអត្ថាធិប្បាយទៅកាន់អ្នកសារព័ត៌មាន ក្រោយវិលត្រឡប់ពីបុរីវ៉ាទីកង់វិញ ជាកន្លែងដែលលោកបានជួបជាមួយលោក Zelensky មុនពេលព្រះរាជពិធីបុណ្យសពសម្ដេច Pope Francis ។

លោក Trump បាននិយាយថាកិច្ចប្រជុំបានដំណើរការល្អ ហើយលោកទាំងពីរបានពិភាក្សាគ្នារយៈពេលខ្លីប៉ុណ្ណោះអំពីតំបន់គ្រីម៉េ ។

អ៊ុយក្រែនបានច្រានចោលម្តងហើយម្តងទៀតការធ្វើសម្បទានទឹកដីដោយសង្កត់ធ្ងន់ថាបញ្ហាដីធ្លីនេះគួរតែត្រូវពិភាក្សានៅពេលដែលបទឈប់បាញ់ត្រូវបានព្រមព្រៀងរួច៕