បើតាមសេចក្ដីរាយការណ៍របស់សារព័ត៌មាន The Wall Street Journal (WSJ) បានឲ្យដឹងថា ប្រធានាធិបតីអាមេរិក លោក Donald Trump និងបណ្ដាមេដឹកនាំពិភពលោក មានការព្រួយបារម្ភកាន់តែខ្លាំងឡើង អំពីសង្គ្រាមដែលកំពុងបន្តមានរបស់រុស្ស៊ី នៅអ៊ុយក្រែន តែទន្ទឹមនឹងនោះ ប្រធានាធិបតីរុស្ស៊ី លោក Vladimir Putin កំពុងពង្រីកមូលដ្ឋានយោធា និងត្រៀមដាក់ពង្រាយទាហានបន្ថែម នៅក្បែរព្រំដែនអឺរ៉ុប។

រុស្ស៊ីកំពុងពង្រីកមូលដ្ឋានយោធារបស់ខ្លួន នៅទីក្រុង Petrozavodsk និងតំបន់ផ្សេងទៀតក្បែរព្រំដែនហ្វាំងឡង់។ អ្នកជំនាញយោធាយល់ឃើញថា នេះជាផ្នែកមួយនៃការរៀបចំរបស់ក្រុងមូស្គូ ដើម្បីត្រៀមសម្រាប់លទ្ធភាពនៃការមានជម្លោះជាមួយអង្គការសន្ធិសញ្ញាអាត្លង់ទិកខាងជើង ឬអង្គការណាតូ (NATO)។

កងកម្លាំងយោធាថ្មីភាគច្រើន នឹងត្រូវប្តូរទៅទីតាំងតំបន់យោធា Leningrad ដែលមានព្រំប្រទល់ជាប់ប្រទេសអេស្តូនី ឡាតវី និងហ្វាំងឡង់ ដែលជាផ្នែកនៃផែនការបង្កើនបុគ្គលិកយោធារុស្ស៊ីដល់ ១,៥លាននាក់។ ហើយកងពលតូចនឹងត្រូវបំប្លែងទៅជាអង្គភាពមានពលទាហាន ១០.០០០នាក់ ក្នុងអង្គភាពនីមួយៗ។

លោក Emil Kastehelmi មកពីក្រុមហ៊ុនវិភាគហ្វាំងឡង់ OSINT បាននិយាយប្រាប់សារព័ត៌មានថា រុស្ស៊ីក៏កំពុងសាងសង់ឃ្លាំង និងបន្ទាយថ្មីៗ សម្រាប់កងទ័ពរបស់ខ្លួន ដោយសាងសង់ផ្លូវដែកថ្មី នៅតាមព្រំដែនជាមួយអេស្តូនី ហ្វាំងឡង់ និងន័រវេស ក៏ដូចជាការពង្រីកហេដ្ឋារចនាសម្ព័ន្ធផ្លូវដែកដែលមានស្រាប់ នៅក្នុងតំបន់៕