ចរន្តអគ្គិសនីបានចាប់ផ្ដើមមានឡើងវិញហើយដោយភាគច្រើន នៅប្រទេសអេស្ប៉ាញ និងព័រទុយហ្គាល់ នាព្រឹកថ្ងៃអង្គារ (ទី២៩ ខែមេសា) បន្ទាប់ពីបានដាច់នៅទូទាំងប្រទេស តែអាជ្ញាធរនៅតែប្រឹងប្រែងស្វែងរកមូលហេតុដែលបណ្តាលឲ្យដាច់ថាមពលអគ្គិសនីភ្លាមៗនេះ។

នៅអេស្ប៉ាញ សាលារៀន និងការិយាល័យ បានបើកដំណើរការឡើងវិញ ការដឹកជញ្ជូនសាធារណៈ បានចាប់ផ្តើមឡើងវិញ បន្ទាប់ពីបានពន្យាពេលយ៉ាងយូរ ការស្ទះចរាចរណ៍បានធូរស្រាល ហើយមន្ទីរពេទ្យជាច្រើនមានអគ្គិសនីប្រើប្រាស់ឡើងវិញ ខណៈដែលកន្លែងផ្សេងទៀតបន្តដំណើរការដោយម៉ាស៊ីនភ្លើង។

ប្រតិបត្តិករបណ្តាញអគ្គិសនីរបស់អេស្ប៉ាញ គឺក្រុមហ៊ុន Red Electrica បានប្រាប់ឲ្យដឹងថា ខ្លួនអាចផ្គត់ផ្គង់ស្ទើរតែទាំងអស់នៃតម្រូវការអគ្គិសនីរបស់ប្រទេស នៅព្រឹកថ្ងៃទី២៩ ខែមេសានេះ ខណៈដែលក្រុមហ៊ុនរបស់ប្រទេសព័រទុយហ្គាល់ គឺ REN បានប្រាប់ថា គិតត្រឹមយប់ថ្ងៃទី២៨ ខែមេសា ខ្លួនបានធ្វើឲ្យដំណើរការឡើងវិញនូវអនុស្ថានីយអគ្គិសនីទាំងអស់ចំនួន ៨៩កន្លែង នៅក្នុងប្រទេស។

តែយ៉ាងណាក្ដី ក្នុងពេលដែលមូលហេតុពិតប្រាកដមិនទាន់ត្រូវបានរកឃើញ ឥឡូវនេះ អាជ្ញាធរនៃក្រុមហ៊ុនទាំងនៅអេស្ប៉ាញ និងព័រទុយហ្គាល់ កំពុងស្ថិតនៅក្រោមសម្ពាធឲ្យពន្យល់អំពីអ្វីដែលបណ្តាលឲ្យមានការដាច់ចរន្តអគ្គិសនីដ៏ធំបំផុត នៅក្នុងប្រទេសនៃទ្វីបអឺរ៉ុបនេះ៕