អ្នកនាំពាក្យយោធាក្រុមហ៊ួទី លោក Yahya Saree បាននិយាយថា សមាជិកនៃចលនាឧទ្ទាម Ansar Allahហ៊ួទី) នៅប្រទេសយេម៉ែន បានវាយប្រហារមូលដ្ឋានអ៊ីស្រាអែល នៅក្នុងទីក្រុងតែលអាវីវ ( Tel Aviv) និងទីក្រុង Ashkelon ដោយយានដ្រូនចំនួន ៤គ្រឿង។

លោកបានប្រាប់ទូរទស្សន៍ Al Masirah ដែលគ្រប់គ្រងដោយក្រុមហ៊ួទីថា៖«កងកម្លាំងប្រដាប់អាវុធនៃប្រទេសយេម៉ែន បានធ្វើប្រតិបត្តិការទ្វេរដង ដោយបានបញ្ជូនយានដ្រូន Yaffaចំនួនបីគ្រឿង ទៅវាយប្រហារទីតាំងយោធាសំខាន់ៗរបស់សត្រូវ នៅក្នុងតំបន់ Jaffa (ទីក្រុងTel Aviv) ហើយថែមទាំងវាយប្រហារទីតាំងដ៏សំខាន់មួយ នៅក្នុងទីក្រុង Ashkelon ជាមួយយានដ្រូន Yaffa មួយគ្រឿង»។

នាពេលកន្លងមក កងកម្លាំងការពារអ៊ីស្រាអែល បានរាយការណ៍ថា ខ្លួនបានស្ទាក់ចាប់យានដ្រូន ដែលកំពុងចូលទៅជិតដែនអាកាសរបស់ប្រទេសពីភាគខាងកើត។ យោងតាមរបាយការណ៍ យានដ្រូននោះ ត្រូវបានស្ទាក់ចាប់ មុនពេលទៅដល់ដែនអាកាសអ៊ីស្រាអែល។ ស៊ីរ៉ែនការពារជនស៊ីវិល មិនបានបញ្ចេញសំឡេងទេ «អនុលោមតាមនីតិវិធី»។

បន្ទាប់ពីការកើនឡើងនៃជម្លោះប៉ាឡេស្ទីន - អ៊ីស្រាអែលនៅតំបន់ហ្កាហ្សាស្ទ្រីប ក្នុងឆ្នាំ ២០២៣ ក្រុមហ៊ួទី បានព្រមានថា ពួកគេនឹងបើកការវាយប្រហារលើទឹកដីអ៊ីស្រាអែល ខណៈពេលដែលរារាំងនាវាដែលពាក់ព័ន្ធជាមួយរដ្ឋជ្វីហ្វ មិនឲ្យឆ្លងកាត់សមុទ្រក្រហមនិងច្រកសមុទ្រ Bab el-Mandeb រហូតដល់ទីក្រុង Tel Aviv បញ្ឈប់ប្រតិបត្តិការយោធារបស់ខ្លួនប្រឆាំងនឹងក្រុមហាម៉ាស នៅក្នុងដែនដីប៉ាឡេស្ទីន។ ក្រុមហ៊ួទី បានវាយប្រហារលើនាវាស៊ីវិលរាប់សិបគ្រឿង នៅក្នុងសមុទ្រក្រហម និងឈូងសមុទ្រ Aden។