បើតាមរដ្ឋមន្ត្រីក្រសួងកិច្ចការឌីជីថល នៅថ្ងៃអង្គារ (ទី៦ ខែឧសភា) នេះ បានប្រាប់ឲ្យដឹងថា ប្រទេសប៉ូឡូញកំពុងប្រឈមនឹងការប៉ុនប៉ងជ្រៀតជ្រែកដែលមិនធ្លាប់មានពីមុនមកពីប្រទេសរុស្ស៊ី នៅក្នុងការបោះឆ្នោតប្រធានាធិបតី ខណៈដែលការធ្វើយុទ្ធនាការឃោសនា បានឈានចូលដល់ដំណាក់កាលចុងក្រោយ នៅមុនការបោះឆ្នោតជុំទី១ នាថ្ងៃទី១៨ ខែឧសភា។

ប៉ូឡូញលើកឡើងថា តួនាទីរបស់ខ្លួន ក្នុងនាមជាមជ្ឈមណ្ឌល សម្រាប់ផ្ដល់ជំនួយដល់អ៊ុយក្រែន បានធ្វើឲ្យខ្លួនក្លាយជាគោលដៅដ៏ធំ សម្រាប់ការបំផ្លិចបំផ្លាញ ការវាយប្រហារតាមអ៊ីនធឺណិត និងកិច្ចប្រឹងប្រែងផ្ដល់ព័ត៌មានមិនពិត ហើយទីក្រុងវ៉ាសូវីបានប្រុងប្រយ័ត្នខ្ពស់ ចំពោះការជ្រៀតជ្រែក ជាពិសេសបន្ទាប់ពីប្រទេសរ៉ូម៉ានីបានលុបចោលលទ្ធផលបោះឆ្នោតប្រធានាធិបតី កាលពីខែធ្នូ ដោយសារមានការចោទប្រកាន់ពីការជ្រៀតជ្រែករបស់រុស្ស៊ី។

រុស្ស៊ីបានបដិសេធម្តងហើយម្តងទៀតនូវការចោទប្រកាន់ ដែលថា ខ្លួនជ្រៀតជ្រែកក្នុងការបោះឆ្នោតបរទេស និងបានរិះគន់ការសម្រេចលុបចោលការបោះឆ្នោត នៅប្រទេសរ៉ូម៉ានី។

លោក Krzysztof Gawkowski បានប្រាប់សន្និសីទការពារជាតិថា៖ «អំឡុងការបោះឆ្នោតប្រធានាធិបតីបច្ចុប្បន្ន នៅក្នុងប្រទេសប៉ូឡូញ យើងកំពុងប្រឈមនឹងការប៉ុនប៉ងដែលមិនធ្លាប់មានពីមុនមកពីភាគីរុស្ស៊ី ដើម្បីជ្រៀតជ្រែកក្នុងដំណើរការបោះឆ្នោត»។ 

លោកបានបន្ថែមថា៖ «កិច្ចការនេះកំពុងត្រូវបានធ្វើឡើង ដោយការផ្សព្វផ្សាយព័ត៌មានមិនពិត រួមផ្សំជាមួយនឹងការវាយប្រហារចម្រុះ លើហេដ្ឋារចនាសម្ព័ន្ធសំខាន់ៗរបស់ប៉ូឡូញ ដើម្បីរំខានដល់ដំណើរការធម្មតារបស់រដ្ឋ»។ 

លោកបានប្រាប់ទៀតថា ការវាយប្រហារបានកំណត់គោលដៅលើក្រុមហ៊ុនទឹក និងទឹកស្អុយ រោងចក្រកម្ដៅ និងថាមពល ព្រមទាំងស្ថាប័នរដ្ឋបាលរបស់រដ្ឋ។ លោកបានសង្កត់ធ្ងន់ថា កម្រិតនៃសកម្មភាពរបស់រុស្ស៊ី ទាក់ទងនឹងការវាយប្រហារតាមប្រព័ន្ធអ៊ិនធឺណិត នៅក្នុងប្រទេសប៉ូឡូញ បានកើនឡើងទ្វេដង បើធៀបនឹងឆ្នាំមុន៕