ទីភ្នាក់ងារសារព័ត៌មានចិន Xinhua នៅថ្ងៃអង្គារ (ទី៦ ខែឧសភា) នេះ បានរាយការណ៍ថា លោកប្រធានាធិបតី ស៊ី ជីនពីង (Xi Jinping) បានលើកឡើងថា ប្រទេសចិនបានត្រៀមខ្លួនរួចជាស្រេច ក្នុងការធ្វើការជាមួយបណ្ដាមេដឹកនាំសហភាពអឺរ៉ុប (EU) ដើម្បីពង្រីកការបើកចំហរទៅវិញទៅមក និងដោះស្រាយជម្លោះ និងការយល់ឃើញខុសគ្នាឲ្យបានសមស្រប។

ការអត្ថាធិប្បាយនេះកើតមានឡើងនៅថ្ងៃប្រារព្ធខួបលើកទី៥០ នៃទំនាក់ទំនងការទូត រវាងប្រទេសចិន និង EU ខណៈដែលភាគីទាំង២ ធ្វើការផ្សះផ្សាទំនាក់ទំនង ស្របពេលមានភាពមិនប្រាកដប្រជានៃពាណិជ្ជកម្មសកលដែលជំរុញដោយអត្រាពន្ធដ៏ធ្ងន់ធ្ងររបស់សហរដ្ឋអាមេរិក។

លោក ស៊ី មិនបាននិយាយសំដៅទៅលើសហរដ្ឋអាមេរិកនោះទេ នៅក្នុងសុន្ទរកថារបស់លោក ប៉ុន្តែទីក្រុងប៉េកាំង បានផ្ដោតលើការបង្កើតទំនាក់ទំនងសេដ្ឋកិច្ច និងនយោបាយកាន់តែជិតស្និទ្ធជាមួយអឺរ៉ុប ដើម្បីកាត់បន្ថយផលប៉ះពាល់ដោយសារពន្ធគយរបស់ប្រធានាធិបតី លោក Donald Trump លើការនាំចេញភាគច្រើនទៅកាន់សហរដ្ឋអាមេរិក។

លោកបានលើកឡើងថា៖ «ទំនាក់ទំនងចិន-សហភាពអឺរ៉ុប ដែលមានភាពល្អប្រសើរ និងស្ថិរភាព មិនត្រឹមតែលើកកម្ពស់សមិទ្ធផលទៅវិញទៅមកប៉ុណ្ណោះទេ ប៉ុន្តែថែមទាំងបំភ្លឺដល់ពិភពលោកផងដែរ»។ ជាមួយគ្នានេះ លោក ស៊ី ក៏បានអំពាវនាវឲ្យ EU រួមគ្នាការពារភាពត្រឹមត្រូវ និងយុត្តិធម៌ ហើយប្រឆាំងនឹងការគំរាមកំហែងជាឯកតោភាគី ដោយពណ៌នាទំនាក់ទំនងរបស់ភាគីទាំង២ថា ជាការជះឥទ្ធិពលដ៏ខ្លាំងបំផុតមួយរបស់ពិភពលោក។

គួរបញ្ជាក់ថា ប្រទេសចិនបានឲ្យដឹងថា ខ្លួននឹងស្វាគមន៍ដំណើរទស្សនកិច្ចរបស់ប្រធានក្រុមប្រឹក្សាអឺរ៉ុប លោក Antonio Costa និងប្រធានគណៈកម្មការអឺរ៉ុប លោកស្រី Ursula von der Leyen នៅក្នុងពេលវេលាសមស្របមួយ ដើម្បីរៀបចំរួមគ្នានូវកិច្ចប្រជុំជុំថ្មីនៃមេដឹកនាំរបស់ភាគីទាំង២៕