អ្នកស្រី Maria Zakharova គឺជាអ្នកនាំពាក្យក្រសួងការបរទេសរុស្ស៊ី និយាយថា ឱកាសនៃការឈានដលដំណោះស្រាយសន្តិភាពនៅអ៊ុយក្រែននឹងត្រូវបកក្រោយ បើសិនជាលោកខាងលិចនៅតែបន្តផ្គត់ផ្គង់អាវុធដល់ទីក្រុងគីវ ។

អ្នកស្រីបានធ្វើសេចក្តីអត្ថាធិប្បាយបែបនេះ ក្រោយគេសួរពីសេចក្តីរាយការណ៍របស់ទីភ្នាក់ងារព័ត៌មានរ៉យទ័រថា សម្ព័ន្ធមិត្តលោកខាងលិចរបស់អ៊ុយក្រែន កំពុងពិភាក្សាលើការផ្គត់ផ្គង់ប្រព័ន្ធការពារដែនអាកាស Patriot បន្ថែមទៀតដល់ទីក្រុងគីវ ហើយនិងមានគោលដៅឈានដល់កិច្ចព្រមព្រៀងមុនកិច្ចប្រជុំកំពូលអង្គការណាទូនាដំណាច់ខែមិថុនា ។

អ្នកស្រី Zakharova និយាយថា ការបន្តផ្គត់ផ្គង់ដល់របបក្រុងគីវ នឹងពន្យាពេលទស្សនីយភាពសម្រាប់ដំណោះស្រាយជម្លោះ ហើយមានតែនាំឲ្យស្ថានភាពកើនឡើង និងការកាប់សម្លាប់គ្នាប៉ុណ្ណោះ ។

អ្នកស្រីថា ដូច្នេះហើយអ្នកដែលផ្គត់ផ្គង់ដល់របបក្រុងគីវ ត្រូវតែខ្វាយខ្វល់ពីពលរដ្ឋអ៊ុយក្រែន ពួកគេនឹងសម្លាប់ពលរដ្ឋអ៊ុយក្រែន ដោយសារការផ្គត់ផ្គង់ទាំងនេះ ។

សូមបញ្ជាក់ថា អ៊ុយក្រែន ចង់បានប្រព័ន្ធការពារដែនអាកាស Patriot បន្ថែមទៀត ក្នុងនោះលោកប្រធានាធិបតី Volodymyr Zelenskiy និយាយប្រាប់ទូរទស្សន៍ CBS កាលពីខែមុនថា រដ្ឋាភិបាលរបស់លោកត្រៀមខ្លួនរួចរាល់ក្នុងការទិញប្រព័ន្ធការពារដែនអាកាសផលិតនៅសហរដ្ឋអាមេរិកមួយនេះ ចំនួន ១០គ្រឿង ដែលវាចាំបាច់ ដើម្បីបាញ់ទម្លាក់មីស៊ីលបាលីស្ទិករុស្ស៊ី ៕