បើយោងតាមបុគ្គល ៣រូបដែលដឹងអំពីផែនការនេះ បានឲ្យដឹងថា ប្រធានាធិបតី Donald Trump នៅថ្ងៃព្រហស្បតិ៍ (ទី៨ ខែឧសភា) ត្រូវបានគេរំពឹងថា នឹងប្រកាសថា សហរដ្ឋអាមេរិក នឹងឈានដល់កិច្ចព្រមព្រៀងពាណិជ្ជកម្មជាមួយចក្រភពអង់គ្លេស។

លោក Trump បានព្រលយពីកិច្ចព្រមព្រៀងពាណិជ្ជកម្មថ្មីមួយ តាមរយៈការបង្ហោះ នៅលើបណ្ដាញសង្គម កាលពីពេលយប់ថ្ងៃពុធ (ទី៧ ខែឧសភា) តែលោកមិនបានបញ្ជាក់នោះឡើយថា ប្រទេសណាជាផ្នែកនៃកិច្ចព្រមព្រៀងនេះ។

នៅក្នុងការបង្ហោះនោះ លោកបានសរសេរថា៖ «សន្និសីទព័ត៌មានដ៏ធំ នាព្រឹកស្អែក នៅវេលាម៉ោង ១០ព្រឹក ការិយាល័យប្រធានាធិបតី Oval Office ទាក់ទងនឹងកិច្ចព្រមព្រៀងពាណិជ្ជកម្មសំខាន់ៗជាមួយតំណាងនៃប្រទេសធំៗ និងជាទីគោរពដ៏ខ្ពង់ខ្ពស់បំផុត។ ជាកិច្ចព្រមព្រៀងដំបូង ក្នុងចំណោមកិច្ចព្រមព្រៀងជាច្រើន!!!»។

អ្នកនាំពាក្យរបស់សេតវិមាន បានបដិសេធមិនធ្វើអត្ថាធិប្បាយអ្វីឲ្យលើសពីការបង្ហោះរបស់លោក Trump នោះឡើយ។ អ្នកនាំពាក្យស្ថានទូតអង់គ្លេសប្រចាំទីក្រុងវ៉ាស៊ីនតោន មិនបានឆ្លើយតបនោះទេ ទៅនឹងសំណើសុំការអត្ថាធិប្បាយ។

កិច្ចព្រមព្រៀងនេះនឹងក្លាយជាកិច្ចព្រមព្រៀងដំបូងដែលបានប្រកាសចាប់តាំងពីលោក Trump បានដាក់អត្រាពន្ធដ៏ធ្ងន់ធ្ងរលើដៃគូពាណិជ្ជកម្មរាប់សិបរបស់សហរដ្ឋអាមេរិក។ ក្រោយមកលោកបានផ្អាកជាបណ្ដោះអាសន្ន ដើម្បីអនុញ្ញាតឲ្យប្រទេសផ្សេងទៀតឈានដល់កិច្ចព្រមព្រៀងជាមួយអាមេរិក។

ការឈានដល់កិច្ចព្រមព្រៀង រវាងសហរដ្ឋអាមេរិក និងអង់គ្លេស អាចជាជោគជ័យដ៏ធំ សម្រាប់ប្រទេសទាំង២ ដែលបានស្វែងរកកិច្ចសហប្រតិបត្តិការសេដ្ឋកិច្ចកាន់តែជិតស្និទ្ធជាយូរមកហើយ។ ព័ត៌មានលម្អិតនៃកិច្ចព្រមព្រៀងនេះមិនទាន់មានភាពច្បាស់លាស់នៅឡើយទេ៕