ការស្ទង់មតិ បានបង្ហាញកាលពីថ្ងៃពុធ (ទី៧ ខែឧសភា) ថា បេក្ខជនប្រធានាធិបតីខាងក្រុមស្តាំនិយមជ្រុលរបស់រូម៉ានី លោក George Simion នឹងឈ្នះការបោះឆ្នោតជុំទី២ នៅថ្ងៃទី១៨ ខែឧសភា ដែលត្រូវតទល់ជាមួយអភិបាលក្រុង Bucharest លោក Nicusor Dan ខណៈដែលអ្នកទាំង២ បានប៉ះទង្គិចគ្នា ជុំវិញទស្សនៈពិភពលោក និងឱនភាព ក្នុងកម្មវិធីជជែកដេញដោល។

លោក Simion ដែលមាននិន្នាការប្រឆាំងអឺរុប បានឈ្នះការបោះឆ្នោតជុំទី១ កាលពីថ្ងៃអាទិត្យចុងសប្ដាហ៍កន្លងមក ដោយទទួលសំឡេងឆ្នោតប្រហែល ៤១ភាគរយ ជាលទ្ធផលដែលនាំឲ្យមានការលាលែងពីតំណែងរបស់នាយករដ្ឋមន្ត្រីឆ្វេងនិយម លោក Marcel Ciolacu និងការដួលរលំរដ្ឋាភិបាលចម្រុះដែលគាំទ្រលោកខាងលិច។

លោក Dan ដែលកំពុងឈរឈ្មោះ ក្នុងនាមជាបេក្ខជនឯករាជ្យ បានទទួលបានសំឡេងឆ្នោត ២១ភាគរយ ហើយក្រុមអ្នកវិភាគ បានលើកឡើងថា លោកនឹងជួបការលំបាក ក្នុងការទាក់ទាញអ្នកបោះឆ្នោតពីលោក Crin Antonescu ជាបេក្ខជនកណ្តាលនិយមគាំទ្រដោយរដ្ឋាភិបាលដែលឈ្នះលំដាប់ទី៣ និងពីអ្នកឈ្នះលំដាប់ទី៤ គឺលោក Victor Ponta ជាអតីតនាយករដ្ឋមន្ត្រីឆ្វេងនិយមដែលប្ដូរទៅជាអ្នកជាតិនិយមខាងក្រុមអភិរក្សនិយម។

ការស្ទង់មតិដែលធ្វើឡើងដោយវិទ្យាស្ថានបោះឆ្នោត Verifield និងដែលត្រូវបានចាត់តាំងឡើងដោយលោក Dan បានបង្ហាញថា លោក Simion កំពុងតែស្ថិតនៅលើផ្លូវឆ្ពោះទៅរកការទទួលបានសន្លឹកឆ្នោត ៥៤,៨ភាគរយ ធៀបនឹង ៤៥,២ភាគរយរបស់លោក Dan នៅក្នុងការប្រកួតប្រជែងជុំទី២។ ស្ថាប័ននេះបានស្ទង់មតិលើមនុស្ស ៩៤៤នាក់ កាលពីថ្ងៃទី៦ ខែឧសភា ហើយមានកម្រិតល្អៀង ៣,១៩ភាគរយ។ ស្ទើរតែ ១ភាគ៣ នៃអ្នកដែលត្រូវបានស្ទង់មតិ បាននិយាយថា ពួកគេទាំងមិនបានបោះឆ្នោត មិនបានសម្រេចជ្រើសរើស រវាងបេក្ខជនទាំង២ ឬបដិសេធមិនឆ្លើយតប៕