រដ្ឋាភិបាលក្នុងតំបន់ការស្មៀរ (Kashmir)របស់ប្រទេសប៉ាគីស្ថាន បាននិយាយនៅថ្ងៃសៅរ៍សប្ដាហ៍នេះថា ជនស៊ីវិលចំនួន១១នាក់ ត្រូវបានសម្លាប់ ក្នុងការបាញ់ផ្លោងគ្រាប់កាំភ្លើងធំទាំងយប់របស់ប្រទេសឥណ្ឌា ជិតព្រំដែនដែលមានការយាមកាមដោយកងទ័ពយ៉ាងតឹងតែង។ 

រដ្ឋមន្ត្រីព័ត៌មានរដ្ឋបាលកាស្មៀរគ្រប់គ្រងដោយប៉ាគីស្ថាន  លោក Mazhar Saeed Shah បានប្រាប់សារព័ត៌មាន AFP ថា កាលពីយប់មិញ ការបាញ់ផ្លោងគ្រាប់កាំភ្លើងធំ ពីភាគីឥណ្ឌា  បានកើតឡើងជាង៥ទីតាំងផ្សេងៗគ្នា នៅតាមបណ្ដោយខ្សែរបន្ទាត់ព្រំដែន ដែលបានបណ្ដាលឲ្យមនុស្ស១១នាក់ រួមទាំងកុមារម្នាក់ និងស្រ្តី៤នាក់ ស្លាប់  និង៥៦នាក់រងរបួស។

គួររម្លឹកថាមនុស្សជាង៤០នាក់ ត្រូវបានសម្លាប់ក្នុងប្រទេសប៉ាគីស្ថាន ចាប់តាំងពីជម្លោះចុងក្រោយនេះបានផ្ទុះឡើងជាមួយប្រទេសឥណ្ឌាកាលពីថ្ងៃពុធសប្ដាហ៍នេះ ។ 

មន្ត្រីប្រទេសប៉ាគីស្ថាន បាននិយាយនៅថ្ងៃសៅរ៍ ទី១០ ខែឧសភា នេះ ថា ខ្លួនបានបើកប្រតិបត្តិការសងសឹកប្រឆាំងប្រទេសឥណ្ឌា ដោយបានដាក់គោលដៅលើទីតាំងផ្ទុកមីស៊ីលរបស់ឥណ្ឌា និងមូលដ្ឋានទ័ពអាកាសនៅក្រុង Pathankot និងក្រុង Udhampur៕