លោក Donald Trump នៅថ្ងៃអង្គារ (ទី១៣ ខែឧសភា) នេះ បានជួបជាមួយរជ្ជទាយាទអារ៉ាប៊ីសាអូឌីត Mohammed bin Salman (ម៉ូហាម៉េដ ប៊ីន សាល់ម៉ាន់) ខណៈរូបលោកចាប់ផ្តើមដំណើរទស្សនកិច្ចការទូតដ៏សំខាន់ជាលើកដំបូងនៃអាណត្តិទី២ ក្នុងនាមជាប្រធានាធិបតីអាមេរិក។

មេដឹកនាំអាមេរិក សង្ឃឹមថា នឹងទទួលបានកិច្ចសន្យាវិនិយោគថ្មីធំៗ នៅក្នុងសហរដ្ឋអាមេរិក អំឡុងដំណើរទស្សនកិច្ចរយៈពេល ៤ថ្ងៃទៅកាន់ប្រទេសអារ៉ាប៊ីសាអ៊ូឌីត កាតា និងអារ៉ាប់រួម។

ក្នុងអាណត្តិដំបូងរបស់លោក លោក Trump ក៏បានជ្រើសរើសអារ៉ាប៊ីសាអ៊ូឌីតជាដំណើរទស្សនកិច្ចដ៏សំខាន់លើកដំបូងរបស់លោកផងដែរ ដោយការធ្វើបែបនោះ គឺជាការមិនធ្វើតាមប្រពៃណីរបស់ប្រធានាធិបតីអាមេរិកដែលតែងតែធ្វើដំណើរទៅចក្រភពអង់គ្លេស កាណាដា ឬម៉ិកស៊ិក។

កិច្ចព្រមព្រៀងមួយ ដែលអារ៉ាប៊ីសាអ៊ូឌីត នឹងទិញអាវុធ និងគ្រឿងយុទ្ធោបករណ៍របស់សហរដ្ឋអាមេរិកតម្លៃជាង ១០០ពាន់លានដុល្លារ ត្រូវបានគេរាយការណ៍យ៉ាងទូលំទូលាយថា ស្ថិតក្នុងចំណោមកិច្ចព្រមព្រៀងដែលលោក Trump គ្រោងនឹងប្រកាសក្នុងដំណើរទស្សនកិច្ចនេះ។ មីស៊ីល ប្រព័ន្ធរ៉ាដា និងយន្តហោះដឹកជញ្ជូន ត្រូវបានគេរាយការណ៍ថា ជាផ្នែកមួយនៃកញ្ចប់កិច្ចព្រមព្រៀងនោះ។

សហរដ្ឋអាមេរិកជាអ្នកផ្គត់ផ្គង់អាវុធជាយូរមកហើយដល់អារ៉ាប៊ីសាអ៊ូឌីត ប៉ុន្តែទំនាក់ទំនងនោះ បានធ្លាក់ចុះនៅឆ្នាំ២០២១ នៅពេលដែលរដ្ឋបាលលោក Joe Biden បញ្ឈប់ការលក់អាវុធវាយលុកទៅឲ្យទីក្រុងរីយ៉ាដ (Riyadh) ដោយលើកឡើងពីកង្វល់ អំពីតួនាទីរបស់ប្រទេសនេះ ក្នុងសង្រ្គាមនៅក្នុងប្រទេសជិតខាងយេម៉ែន៕