ក្រសួងសន្តិសុខម៉ិកស៊ិក និយាយថា កងកម្លាំងសន្តិសុខម៉ិកស៊ិក បានឃាត់ខ្លួនសមាជិកសង្ស័យ ចំនួន ៩នាក់របស់ក្រុមអន្ធពាល និងបានសម្លាប់មនុស្ស ១២នាក់ផ្សេងទៀត នៅក្នុងប្រតិបត្តិការវាយឆ្មក់ទីតាំងរបស់ពួកគេនៅតំបន់ភាគនិរតីប្រទេស កាលពីថ្ងៃសៅរ៍ ។

នៅក្នុងសារបង្ហោះលើបណ្តាញព័ត៌មានសង្គម រដ្ឋមន្រ្តីក្រសួងសន្តិសុខម៉ិកស៊ិកលោក Omar Harfuch បញ្ជាក់ថា សមាជិកកងទ័ពជើងទឹកម៉ិកស៊ិក ៣នាក់ បានរងរបួសនៅក្នុងប្រតិបត្តិការនេះ ដែលបានធ្វើឡើងនៅទីក្រុង Huitzontla រដ្ឋ Michoacan ។

លោក Harfuch និយាយថា ជនដែលត្រូវបានឃាត់ខ្លួន ជាប់ពាក់ព័ន្ធនឹងករណីឧក្រិដ្ឋកម្មជាច្រើន រួមទាំងឃាតកម្ម ការជំរិតទារប្រាក់ និងការចាប់ជំរិត ។

ក្រសួងសន្តិសុខនិយាយនៅក្នុងសេចក្តីថ្លែងការណ៍ថា ក្រុមឧក្រិដ្ឋជនមួយនេះ មានការជាប់ពាក់ព័ន្ធនឹងការជួញដូរគ្រឿងញៀនតាមសមុទ្រ ហើយកងទ័ពជើងទឹក បានរកឃើញអាវុធ និងគ្រឿងតាក់ទិកជាច្រើនទៀតនៅទីតាំងរបស់ពួកគេ ។

កាសែត El Universal និង La Jornada របស់ម៉ិកស៊ិក រាយការណ៍ថា ក្រុមអន្ធពាលខាងលើ គឺជាផ្នែកមួយរបស់ក្រុមមេខ្លោងគ្រឿងញៀន Jalisco New Generacion ដែលជាក្រុមមួយក្នុងចំណោមក្រុមមេខ្លោងគ្រឿងញៀនដ៏ធំបំផុតរបស់ម៉ិកស៊ិក ហើយកាលពីខែកុម្ភៈកន្លងទៅ សហរដ្ឋអាមេរិក បានចាត់ទុកក្រុមមួយនេះថាជាអង្គការភេរវកម្ម ៕