អភិបាលក្រុងញូវយ៉ក លោក Eric Adams បាននិយាយថា នាវារបស់កងទ័ពជើងទឹកម៉ិកស៊ិកមួយគ្រឿង បានបើកបុកស្ពាន Brooklyn ដ៏វែងរបស់សហរដ្ឋអាមេរិក កាលពីយប់ថ្ងៃសៅរ៍ (១៧ ឧសភា) បណ្ដាលឱ្យក្ដោងដ៏ខ្ពស់របស់នាវាបានបាក់ សម្លាប់មនុស្ស ២នាក់ និងបង្ករបួសដល់មនុស្សជាច្រើននាក់ផ្សេងទៀត។

វីដេអូតាមអ៊ិនធឺណិតបានបង្ហាញពីនាវាដែលកំពុងស្ថិតក្នុងការហ្វឹកហ្វឺនឈ្មោះ Cuauhtémoc បើកចូលទៅជិតស្ពាននិមិត្តរូបនៃទន្លេ East River ជិតនឹងផ្នែកនៃតំបន់ Manhattan ដែលតភ្ជាប់ជាមួយតំបន់ Brooklyn ដ៏ល្បីរបស់ក្រុងញូវយ៉ក។ បង្កោលក្ដោងប្រវែង ៤៥ម៉ែត្រ របស់នាវាខ្ពស់ខ្លាំងពេកមិនអាចគេចផុតពីស្ពាននៅចំណុចកោងឆ្លងកាត់បាន ហើយក៏បុករួចបាក់រលំ នៅពេលនាវាបើកពីក្រោមស្ពាន Brooklyn។

កងទ័ពជើងទឹកម៉ិកស៊ិក បាននិយាយលើប្រព័ន្ធផ្សព្វផ្សាយសង្គមកាលពីល្ងាចថ្ងៃសៅរ៍ថា មនុស្ស ២២នាក់ បានរងរបួសនៅលើនាវា ដែលក្នុងនោះ ១៩នាក់កំពុងព្យាបាលនៅមន្ទីរពេទ្យ ដោយក្នុងចំណោមនោះមាន ៣នាក់របួសធ្ងន់ ហើយមិនមានប្រតិបត្តិការជួយសង្គ្រោះទេព្រោះពុំមានមនុស្សធ្លាក់ចូលក្នុងទឹកឡើយ។

នៅព្រឹកព្រលឹមថ្ងៃអាទិត្យ លោក Adams បាននិយាយនៅលើបណ្ដាញសង្គម X ថា មនុស្ស ២នាក់ក្នុងចំណោម ២៧៧នាក់ នៅលើនាវានៅពេលនោះ បានស្លាប់ ហើយពីរនាក់ទៀតស្ថិតក្នុងស្ថានភាពធ្ងន់ធ្ងរ។ មន្ត្រីនិយាយថា បញ្ហាគ្រឿងម៉ាស៊ីនប្រហែលជាបណ្តាលឱ្យមានឧប្បត្តិហេតុនេះ ដោយមិនផ្តល់ព័ត៌មានលម្អិតបន្ថែមទេ។

មន្ត្រីដឹកជញ្ជូនក្រុងញូវយ៉កនិយាយថា ស្ពាននេះមិនខូចខាតអ្វីធំដុំទេ ហើយចរាចរណ៍បានបើកឡើងវិញក្នុងទិសដៅទាំងពីរ បន្ទាប់ពីការត្រួតពិនិត្យបឋម។ គួរឱ្យដឹងថា ស្ពានមួយនេះជាកន្លែងទាក់ទាញទេសចរណ៍ដ៏ពេញនិយម និងជាខ្សែផ្លូវតភ្ជាប់រវាងតំបន់ Manhattan និង Brooklyn ដែលត្រូវបានបញ្ចប់ការសាងសង់នៅឆ្នាំ១៨៨៣ ហើយធ្លាប់ជាស្ពានយោលខ្សែកាប្លិ៍ដ៏ធំបំផុតនៅលើពិភពលោក៕