រដ្ឋមន្ត្រីការពារជាតិស៊ីរី បានអំពាវនាវឱ្យក្រុមប្រដាប់អាវុធតូចៗ ដែលមិនទាន់បានរួមបញ្ចូលគ្នាជាមួយទីភ្នាក់ងារសន្តិសុខ ឱ្យទៅចុះចូលជាមួយក្រសួងការពារជាតិរបស់ប្រទេសក្នុងពេល ១០ថ្ងៃ បើមិនដូច្នេះទេនឹងប្រឈមមុខនឹងវិធានការមិនជាក់លាក់ជាច្រើន ក្នុងគោលបំណងបង្រួបបង្រួមអំណាចរបស់រដ្ឋ រយៈពេល ៦ខែបន្ទាប់ពីរបបលោក Bashar al-Assad ត្រូវបានផ្តួលរំលំ។

ក្រុមប្រដាប់អាវុធដ៏ច្រើនសន្ធឹកសន្ធាប់នៅខាងក្រៅការគ្រប់គ្រងរបស់រដ្ឋាភិបាល បានបង្កបញ្ហាប្រឈមដល់កិច្ចខិតខំប្រឹងប្រែងរបស់ប្រធានាធិបតីបណ្តោះអាសន្ន លោក Ahmed al-Sharaa ក្នុងការបង្កើតការគ្រប់គ្រងរដ្ឋ ខណៈក្រុមដែលគាំទ្រ និងប្រឆាំងនឹងលោក នៅតែប្រដាប់ដោយអាវុធធុនធ្ងន់។

រដ្ឋមន្ត្រីការពារជាតិស៊ីរី លោក Murhaf Abu Qasra នៅក្នុងសេចក្តីថ្លែងការណ៍មួយកាលពីល្ងាចថ្ងៃសៅរ៍ បាននិយាយថា "អង្គភាពយោធា" ឥឡូវនេះត្រូវបានដាក់បញ្ចូលទៅក្នុង "ក្របខ័ណ្ឌស្ថាប័នបង្រួបបង្រួម" ដោយហៅថាជាសមិទ្ធិផលដ៏អស្ចារ្យ។

លោកបន្តថា "រដ្ឋាភិបាលសង្កត់ធ្ងន់លើតម្រូវការសម្រាប់ក្រុមយោធាតូចៗដែលនៅសេសសល់ ឱ្យចូលរួមជាមួយក្រសួងក្នុងរយៈពេលអតិបរមា ១០ថ្ងៃចាប់ពីថ្ងៃប្រកាសនេះ ដើម្បីបញ្ចប់កិច្ចខិតខំប្រឹងប្រែងនៃការបង្រួបបង្រួម និងអង្គការ" ដោយមិនបញ្ជាក់ថាក្រុមណាខ្លះ ឬប្រើវិធានការណ៍បែបណានោះទេ៕