ប្រទេសចិន នៅថ្ងៃអាទិត្យ (១៨ ឧសភា) នេះ បានប្រកាសពន្ធប្រឆាំងនឹងការលក់បង្ខូចតម្លៃ ក្នុងកម្រិតខ្ពស់ខ្លាំងដល់ទៅ ៧៤,៩% លើការនាំចូលផលិតផលប្រភេទប្លាស្ទិកវិស្វកម្ម ឬហៅថា POM ពីសហរដ្ឋអាមេរិក សហភាពអឺរ៉ុប ជប៉ុន និងកោះតៃវ៉ាន់។

ការរកឃើញរបស់ក្រសួងពាណិជ្ជកម្មចិន បានបញ្ចប់ការស៊ើបអង្កេតមួយ ដែលបានចាប់ផ្តើមនៅក្នុងខែឧសភា ឆ្នាំ២០២៤ ភ្លាមៗបន្ទាប់ពីសហរដ្ឋអាមេរិកបានដំឡើងពន្ធយ៉ាងខ្លាំងលើរថយន្តអគ្គិសនីរបស់ចិន បន្ទះឈីបកុំព្យូទ័រ និងការនាំចូលផ្សេងទៀត។ ក្រសួងបាននិយាយថា ផលិតផលប្លាស្ទិក POM អាចជំនួសផ្នែកខ្លះនៃលោហធាតុដូចជាទង់ដែង និងស័ង្កសី ហើយមានមុខងារផ្សេងៗរួមទាំងគ្រឿងបន្លាស់រថយន្ត គ្រឿងអេឡិចត្រូនិច និងឧបករណ៍វេជ្ជសាស្ត្រ។

នៅក្នុងខែមករា ក្រសួងនិយាយថា ការស៊ើបអង្កេតដំបូងបានកំណត់ថា ការលក់បង្ខូចតម្លៃកំពុងកើតឡើងខ្លាំង ហើយបានអនុវត្តវិធានការប្រឆាំងនឹងជំហានបែបនេះដែលចាប់ផ្តើមពីថ្ងៃទី២៤ ខែមករា។ ការប្រកាសក្នុងថ្ងៃអាទិត្យបង្ហាញថា អត្រាយកពន្ធប្រឆាំងការលក់បង្ខូចថ្លៃខ្ពស់បំផុតគឺ ៧៤,៩% ការនាំចូលពីសហរដ្ឋអាមេរិក ខណៈការដឹកជញ្ជូនរបស់អឺរ៉ុប នឹងត្រូវប្រឈមមុខនឹងពន្ធ ៣៤,៥%។

លើសពីនេះ ចិន បានយកពន្ធ ៣៥,៥% លើការនាំចូលរបស់ជប៉ុន លើកលែងតែក្រុមហ៊ុន Asahi Kasei Corp ដែលទទួលបានអត្រាជាក់លាក់របស់ក្រុមហ៊ុនចំនួន ២៤,៥% ហើយពន្ធទូទៅ ៣២,៦% ត្រូវបានដាក់លើការនាំចូលពីកោះតៃវ៉ាន់ ជាមួយនឹងអត្រាទាបជាងនេះផ្សេងទៀត៕