លោកស្រី Penny Wong រដ្ឋមន្ត្រីការបរទេសអូស្ត្រាលី នៅថ្ងៃសុក្រ (១៣ មិថុនា) នេះ បានជំរុញឱ្យមានភាពស្ងប់ស្ងាត់ បន្ទាប់ពីយោធាអ៊ីស្រាអែល និយាយថា ខ្លួនបានបើកការវាយប្រហារ "មុន" លើទីតាំងរាប់សិបកន្លែងក្នុងប្រទេសអ៊ីរ៉ង់ ស្របពេលមានការព្រួយបារម្ភពីកម្មវិធីនុយក្លេអ៊ែររបស់ប្រទេសនេះ។ ប្រព័ន្ធផ្សព្វផ្សាយក្នុងស្រុករាយការណ៍ថា ការផ្ទុះជាច្រើនត្រូវបានលាន់ឮនៅក្នុងរដ្ឋធានីតេអេរ៉ង់ របស់អ៊ីរ៉ង់ នៅព្រឹកព្រលឹមថ្ងៃសុក្រនេះ (ម៉ោងក្នុងស្រុក)។

លោកស្រី Wong លើកឡើងថា អូស្ត្រាលី មានការភ្ញាក់ផ្អើលជាខ្លាំង ចំពោះកំណើនភាពតានតឹងយ៉ាងក្ដៅគគុកឆាប់រហ័សរវាងអ៊ីស្រាអែល និងអ៊ីរ៉ង់ ហើយសកម្មភាពនេះ “ប្រថុយនឹងអស្ថិរភាពបន្ថែមទៀត” នៅមជ្ឈិមបូព៌ា ដែលងាយនឹងកើតមានហិង្សារួចទៅហើយ។ លោកស្រីបន្ថែមថា "អូស្រ្តាលី សូមអំពាវនាវដល់គ្រប់ភាគីទាំងអស់ឱ្យចៀសវាងសកម្មភាព និងវោហាសាស្ត្រដែលនឹងធ្វើឱ្យភាពតានតឹងកាន់តែធ្ងន់ធ្ងរ"។

លោកស្រីក៏ជំរុញឱ្យប្រជាជនអូស្ត្រាលីនៅក្នុងតំបន់ "សូមតាមដានប្រព័ន្ធជូនដំណឹង Smartraveller ឱ្យដិតដល់សម្រាប់ការណែនាំពីការធ្វើដំណើរចុងក្រោយបំផុតនៅមជ្ឈិមបូព៌ា"។

រដ្ឋាភិបាលអ៊ីស្រាអែល បានប្រកាសដាក់ប្រទេសក្នុងភាពអាសន្នដើម្បីរង់ចាំការសងសឹករបស់អ៊ីរ៉ង់។ នៅព្រឹកថ្ងៃសុក្រនេះ យោធាអ៊ីស្រាអែលនិយាយថា ខ្លួនបានបើកការវាយលុកជាមុន ដែលបង្កការខូចខាតខ្លាំង និងមានលក្ខណៈរួមបញ្ចូល ដើម្បីវាយប្រហារកម្មវិធីនុយក្លេអ៊ែររបស់អ៊ីរ៉ង់៕