សាក្សីសារព័ត៌មានរ៉យទ័របាននិយាយថា ក្រុមកុបករ បានវាយប្រហារនគរបាលដោយប្រើគ្រាប់បែកសាំង ដុំថ្ម និងកាំជ្រួច នៅក្នុងទីប្រជុំជន Portadown នៃដែនដីអៀរឡង់ខាងជើង របស់ចក្រភពអង់គ្លេស កាលពីថ្ងៃព្រហស្បតិ៍ (១២ មិថុនា) ខណៈដែលយប់ទីបួននៃអំពើហិង្សាប្រឆាំងជនអន្តោប្រវេសន៍ បានរីករាយដាលយ៉ាងអាក្រក់ទៅផ្នែកផ្សេងនៃដែនដីដែលគ្រប់គ្រងដោយចក្រភពអង់គ្លេសមួយនេះ។

អំពើហិង្សាបានផ្ទុះឡើងជាលើកដំបូងកាលពីថ្ងៃចន្ទដើមសប្ដាហ៍នេះ បន្ទាប់ពីក្មេងប្រុសអាយុ ១៤ឆ្នាំពីរនាក់ ត្រូវបានចាប់ខ្លួន និងបង្ហាញខ្លួននៅក្នុងតុលាការ ដោយចោទប្រកាន់ពីបទរំលោភផ្លូវភេទយ៉ាងធ្ងន់ធ្ងរលើក្មេងស្រីជំទង់ម្នាក់នៅក្នុងទីប្រជុំជននេះ។ BBC រាយការណ៍ថា បទចោទត្រូវបានអានតាមរយៈអ្នកបកប្រែជនជាតិរ៉ូម៉ានីទៅកាន់ក្មេងប្រុសទាំងពីរ ខណៈមេធាវីរបស់ពួកគេប្រាប់តុលាការថា ជនត្រូវចោទបដិសេធបទចោទប្រកាន់ទាំងនេះ។

ការតវ៉ាប្រឆាំងអន្តោប្រវេសន៍មួយក្នុងចំណោមការតវ៉ាមួយចំនួនផ្សេងទៀតកាលពីថ្ងៃព្រហស្បតិ៍ ត្រូវបានធ្វើឡើងនៅទីក្រុង Portadown ចម្ងាយ ៥០គីឡូម៉ែត្រពីក្រុង Belfast ។ ប្រតិបត្តិការនគរបាលដ៏ធំមួយរបស់មន្ត្រីប្រដាប់អាវុធកុបកម្ម និងរថយន្តក្រុងពាសដែកខ្នាតតូចបានបិទផ្លូវជាច្រើនជាមុន។ កម្ទេចកម្ទីបានរាយប៉ាយពាសពេញផ្លូវ ហើយធុងសំរាមត្រូវបានដុតបំផ្លាញ។

ប្រព័ន្ធផ្សព្វផ្សាយក្នុងស្រុករាយការណ៍ថា ការតវ៉ាផ្សេងទៀតបានកន្លងផុតទៅដោយពុំមានឧបទ្ទវហេតុធំដុំទេ រួមទាំងនៅទីប្រជុំជន Ballymena ដែលជាចំណុចសំខាន់នៃអំពើហឹង្សាដ៏ខ្លាំងក្លានៅពីរយប់ដំបូង៕