អ៊ីរ៉ង់ បានបើកការវាយប្រហារតាមអាកាសសងសឹកវិញទៅលើអ៊ីស្រាអែល កាលពីយប់ថ្ងៃសុក្រ ទី១៣ មិថុនា ដោយការផ្ទុះត្រូវបានលាន់ឮនៅក្នុងទីក្រុងហ្សេរុយសាឡឹម និងទីក្រុងតែល អាវីវ ជាទីក្រុងធំបំផុតចំនួនពីររបស់ប្រទេសអ៊ីស្រាអែល បន្ទាប់ពីការវាយប្រហារដោយយោធាទ្រង់ទ្រាយធំបំផុតមិនធ្លាប់មានរបស់អ៊ីស្រាអែលទៅលើសត្រូវជាយូរអង្វែងរបស់ខ្លួន។

ស៊ីរ៉ែនវាយឆ្មក់តាមអាកាស បានរោទិ៍ឡើងនៅទូទាំងប្រទេសអ៊ីស្រាអែល ខណៈអាជ្ញាធរបានជំរុញសាធារណជនឲ្យស្វែងរកទីជ្រកគេចពីគ្រាប់។ មីស៊ីលត្រូវបានគេមើលឃើញលើអាកាសខាងលើទីក្រុង Tel Aviv។ យោធារបស់អ៊ីស្រាអែល បាននិយាយថា អ៊ីរ៉ង់បានបាញ់មីស៊ីលជាង១០០គ្រាប់ ហើយភាគច្រើនត្រូវបានស្ទាក់ចាប់ ឬបានធ្លាក់ភ្លាមៗ។ មន្ត្រីសហរដ្ឋអាមេរិកពីររូប បាននិយាយថា យោធាអាមេរិក បានជួយបាញ់ទម្លាក់មីស៊ីលរបស់អ៊ីរ៉ង់ ដែលសំដៅទៅរកដែនដីអ៊ីស្រាអែល។

ប្រព័ន្ធផ្សព្វផ្សាយប៉ុស្តិ៍លេខ១២ របស់អ៊ីស្រាអែល បាននិយាយថា មនុស្សពីរនាក់បានរងរបួសធ្ងន់ និង៤២នាក់រងរបួសមធ្យមនិងស្រាលដោយសារគ្រាប់ផ្លោង។ អគារជាច្រើនកន្លែងត្រូវបានរងការវាយប្រហារ រួមទាំងប្លុកលំនៅឋានមួយកន្លែងក្បែរទីក្រុង Tel Aviv។ 

ការវាយប្រហាររបស់អ៊ីស្រាអែលលើអ៊ីរ៉ង់ ហើយការសងសឹកវិញរបស់អ៊ីរ៉ង់ បានបង្កើនការព្រួយបារម្ភថាជម្លោះកាន់តែរីកធំនៅក្នុងតំបន់ ទោះបីជាសម្ព័ន្ធមិត្តរបស់អ៊ីរ៉ង់ក្រុមហាម៉ាសនៅតំបន់ហ្កាហ្សា និងក្រុមហេសបូឡា នៅលីបង់ ត្រូវបានបំផ្លាញយ៉ាងច្រើនដោយអ៊ីស្រាអែលក៏ដោយ។

ទីភ្នាក់ងារសារព័ត៌មានរដ្ឋអ៊ីរ៉ង់ IRNA បានរាយការណ៍ថា ទីក្រុងតេអេរ៉ង់ បានបាញ់មីស៊ីលបាលីស្ទីករាប់រយគ្រាប់ទៅកាន់ដែនដីអ៊ីស្រាអែល បន្ទាប់ពីអ៊ីស្រាអែល បានបំផ្ទុះទីតាំងនុយក្លេអ៊ែរក្រោមដី Natanz ដ៏ធំរបស់អ៊ីរ៉ង់ និងបានសម្លាប់មេបញ្ជាការយោធាជាន់ខ្ពស់របស់ខ្លួន។ អ៊ីរ៉ង់ និយាយថា កម្មវិធីនុយក្លេអ៊ែររបស់ខ្លួនគឺសម្រាប់តែគោលបំណងសន្តិភាពប៉ុណ្ណោះ។