ព្យុះត្រូពិកដែលបានជំរុញឱ្យមានការលុបចោលជើងហោះហើរ និងនាវាចម្លងនៅកោះតៃវ៉ាន់ ត្រូវបានគេព្យាករណ៍ថានឹងបង្កើនឥទ្ធិពលដល់កម្លាំងជាព្យុះទីហ្វុង មុនពេលវាយប្រហារឆ្នេរសមុទ្រភាគខាងត្បូងប្រទេសចិននៅថ្ងៃអាទិត្យ២០ កក្កដា។      

ព្យុះមុននេះបានឆ្លងកាត់ប្រទេសហ្វីលីពីន ជាកន្លែងដែលរថយន្តដឹកទំនិញមួយគ្រឿងបានចត ត្រូវបានកំទេចដោយរចនាសម្ព័ន្ធផ្ទាំងប៉ាណូមួយដែលត្រូវបានដួលរលំដោយខ្យល់បក់ខ្លាំងនៅក្នុងទីក្រុង ក្វេស៊ុន (Quezon) ភាគខាងជើងនៃទីក្រុងម៉ានីល ប្រទេសហ្វីលីពីន។    

ទីភ្នាក់ងារព័ត៌មានកណ្តាលរបស់កោះតៃវ៉ាន់ បាននិយាយថាព្យុះទីហ្វុង Wipha មានកម្លាំងខ្យល់អតិបរមា ១០១ គីឡូម៉ែត្រក្នុងមួយម៉ោង និងខ្យល់បក់រហូតដល់១២៦ គីឡូម៉ែត្រក្នុងមួយម៉ោង នៅពេល បានឆ្លងកាត់ភាគខាងត្បូងនៃកោះតៃវ៉ាន់កាលពីថ្ងៃសៅរ៍។

ទីភ្នាក់ងារសារព័ត៌មានបាននិយាយថា កម្រិតទឹកភ្លៀងជាង២០សង់ទីម៉ែត្រត្រូវបានកត់ត្រានៅក្នុងស្រុក ហ៊ួលៀន (Hualien) និងតៃទុង (Taitung) នៅលើឆ្នេរសមុទ្រភាគខាងកើតរបស់កោះតៃវ៉ាន់។ ជើងហោះហើរក្នុងស្រុកជាច្រើនត្រូវបានលុបចោល ហើយសេវានាវាចម្លងចំនួន ១៤ គ្រឿងត្រូវបានផ្អាក ដោយសារសមុទ្រមានខ្យល់បក់ខ្លាំង ។

ព្យុះទី ៦ នៃរដូវកាលនៅតំបន់មហាសមុទ្រប៉ាស៊ីហ្វិកភាគខាងលិចត្រូវបានគេព្យាករណ៍ថានឹងឈានដល់កម្លាំងព្យុះទីហ្វុង មុនពេលឆ្លងកាត់ជិតទីក្រុងហុងកុងពេញមួយយប់។ ព្យុះនេះត្រូវបានគេរំពឹងថានឹងនាំមកនូវភ្លៀងធ្លាក់ខ្លាំងនៅតាមឆ្នេរសមុទ្រភាគខាងត្បូងរបស់ប្រទេសចិន ហើយបន្ទាប់មកចុះខ្សោយកម្លាំងនៅពេលឆ្ពោះទៅទិសខាងលិច ទៅកាន់ប្រទេសវៀតណាម និងឡាវ៕