ក្រសួងការពារជាតិរុស្ស៊ី បាននិយាយកាលពីថ្ងៃចន្ទ (២៩ កញ្ញា) ថា កងកម្លាំងរបស់ទីក្រុងមូស្គូ បានគ្រប់គ្រងទីតាំងលំនៅ ក្នុងតំបន់ជួរមុខចំនួន ២កន្លែងបន្ថែមទៀត ក្នុងផ្នែកសំខាន់ៗនៃតំបន់ Donetsk ភាគខាងកើតអ៊ុយក្រែន។

មន្ត្រីអ៊ុយក្រែនមិនបានលើកឡើងពីសេចក្តីប្រកាសរបស់រុស្ស៊ី ទាក់ទងនឹងភូមិទាំងពីរនេះទេ ប៉ុន្តែលោកប្រធានាធិបតីអ៊ុយក្រែន Volodymyr Zelenskyy បាននិយាយថា ប្រតិបត្តិការវាយលុករបស់ទីក្រុងគីវ នៅជិតទីក្រុង Dobropillia ក្នុងតំបន់ Donetsk ទទួលបានផលល្អណាស់។

ក្រសួងការពារជាតិរុស្ស៊ី និយាយថា កងកម្លាំងរបស់ខ្លួនឥឡូវនេះ កំពុងគ្រប់គ្រងលើភូមិ Shandryholove និងភូមិ Zarichne ដែលទាំងពីរនេះនៅភាគឦសាននៃទីក្រុង Sloviansk ដែលជាមជ្ឈមណ្ឌលមួយក្នុងចំណោមទីតាំងដែលទីក្រុងមូស្គូសង្ឃឹមថា នៅទីបំផុតនឹងវាយយកបាន នៅក្នុងទិសដៅឆ្ពោះទៅទិសខាងលិច ឆ្លងកាត់តំបន់ Donetsk ។

រុស្ស៊ី បាននឹងកំពុងវាយរុលបន្តិចម្តងៗតាមខ្សែបន្ទាត់ជួរមុខ ឆ្លងកាត់តំបន់ភាគខាងកើត និងភាគខាងត្បូងនៃទឹកដីអ៊ុយក្រែន ដោយបានប្រកាសពីការវាយយកបានភូមិថ្មីៗស្ទើរតែរាល់ថ្ងៃ។ រុស្ស៊ី មិនបញ្ចេញតួលេខអ្នកស្លាប់ឬរបួសទេ ប៉ុន្តែក្រុមវិភាគយោធាអ៊ុយក្រែន និងលោកខាងលិច និយាយថា ការមានប្រៀបបែបនេះបានមកដោយការចំណាយខ្ពស់ខ្លាំងលើកម្លាំងទ័ព និងយុទ្ធោបករណ៍៕