ប្រធានាធិបតីម៉ិកស៊ិក លោកស្រី Claudia Sheinbaum កាលពីថ្ងៃចន្ទបាននិយាយថា លោកស្រីសង្ឃឹមថាសហរដ្ឋអាមេរិកនឹងបង្ហាញ «ការពិចារណា» ចំពោះប្រទេសម៉ិកស៊ិក បន្ទាប់ពីការសម្រេចរបស់សហរដ្ឋអាមេរិកក្នុងការដាក់ពន្ធថ្មីលើការនាំចូលរថយន្តធុនធ្ងន់។

លោកស្រី Sheinbaum បាននិយាយក្នុងសន្និសីទសារព័ត៌មានប្រចាំថ្ងៃថា «យើងបានពិភាក្សារួចហើយ ដោយសង្ឃឹមថានឹងមានការពិចារណាចំពោះប្រទេសម៉ិកស៊ិក» ហើយការដំឡើងពន្ធអាចមានភាពស្មុគស្មាញសម្រាប់ប្រទេសទាំងពីរ។ ប្រធានាធិបតីអាមេរិកលោក Donald Trump បានប្រកាសការដំឡើងពន្ធថ្មីមួយចំនួន រួមទាំងពន្ធ២៥ភាគរយលើរថយន្តធុនធ្ងន់ដែលនាំចូលចាប់ពីថ្ងៃទី១ ខែតុលា ជាផ្នែកមួយនៃគោលនយោបាយរបស់លោកក្នុងការពង្រឹងឧស្សាហកម្មក្នុងស្រុក។

លោកស្រី Sheinbaum បានលើកឡើងថា នៅក្រោមកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា ស្តីពីពាណិជ្ជកម្មសេរី ការនាំចេញរបស់ប្រទេសម៉ិកស៊ិក មានវឌ្ឍនភាពក្នុងវិស័យដែលពុំមែនជាគោលដៅដំឡើងពន្ធ ជាពិសេសទំនិញដែលមិនរាប់បញ្ចូលយានយន្តសម្រេច ដែកថែបឬទង់ដែង ដែលទទួលបានអត្ថប្រយោជន៍ពីគម្រោង «ពន្ធកម្រិតសូន្យ» នៃកិច្ចព្រមព្រៀងនេះ។