មេដឹកនាំសហភាពអឺរ៉ុប (EU) បានជួបជុំគ្នា នៅទីក្រុង Copenhagen (កូប៉ិនហាក) នាថ្ងៃពុធ (ទី១ ខែតុលា) នេះ ក្រោមសម្ពាធឲ្យបង្កើនការការពារនៅអឺរ៉ុប បន្ទាប់ពីមានការលុកលុយជាបន្តបន្ទាប់របស់រុស្ស៊ីចូលទៅក្នុងដែនអាកាសរបស់ EU និងប៉ុន្មានថ្ងៃបន្ទាប់ពីយានដ្រូនបានដាក់គោលដៅលើអាកាសយានដ្ឋានរបស់ប្រទេសដាណឺម៉ាក។

ការលុកលុយទាំងនោះបានក្លាយជាការប៉ះពាល់ធ្ងន់ធ្ងរបំផុត សម្រាប់ប្រទេសនៅប៉ែកខាងកើតរបស់ EU ដូចជាប៉ូឡូញ និងអេស្តូនីជាដើម។ រដ្ឋជាសមាជិកចំនួន ១០ បានគាំទ្រផែនការឲ្យមាន «ខែលការពារយានដ្រូន» ពហុស្រទាប់ ដើម្បីអាចចាប់បានយ៉ាងឆាប់រហ័ស បន្ទាប់មកតាមដាន និងបំផ្លាញយានដ្រូនរបស់រុស្ស៊ី។

ដាណឺម៉ាកបានពង្រឹងសន្តិសុខយ៉ាងតឹងរ៉ឹង នៅមុនកិច្ចប្រជុំកំពូល ដោយបានហាមឃាត់រាល់បង្ហោះយានដ្រូនជនស៊ីវិល រហូតដល់ថ្ងៃសុក្រ និងដាក់ការរឹតបន្តឹងយ៉ាងខ្លាំងលើចរាចរណ៍ នៅទីក្រុង Copenhagen។ បើទោះបីជាមានការរឹតបន្តឹងសន្តិសុខនេះក៏ដោយ ក៏ហាក់ឃើញសញ្ញាតិចតួចដែលបង្ហាញពីការមានក្ដីបារម្ភ នៅកណ្តាលរដ្ឋធានីមួយនេះ មុនកិច្ចប្រជុំកំពូល។

ដាណឺម៉ាកក៏នឹងធ្វើជាម្ចាស់ផ្ទះនៃកិច្ចប្រជុំកំពូលសហគមន៍នយោបាយអឺរ៉ុបដ៏ទូលំទូលាយមួយ នៅថ្ងៃព្រហស្បតិ៍ ហើយសម្ព័ន្ធមិត្តអន្តរជាតិបានផ្តល់ជាជំនួយគាំទ្រ ដើម្បីធានាបានថា ព្រឹត្តិការណ៍ទាំង២ បានកន្លងផុតទៅ ដោយគ្មានឧបទ្ទវហេតុអ្វីកើតឡើង។ ក្នុងនាមជាម្ចាស់ផ្ទះទទួលមេដឹកនាំអឺរ៉ុបរាប់សិបនាក់ ក្នុងរយៈពេល ២ថ្ងៃនេះ ដាណឺម៉ាកចង់ទប់ទល់ហេតុការណ៍ដ៏គួរឲ្យភ្ញាក់ផ្អើលណាមួយ នៅក្នុងដែនអាកាសរបស់ខ្លួន។

បណ្ដាមេដឹកនាំ EU នឹងត្រូវបានបង្ហាញផែនការ សម្រាប់ «ផែនទីបង្ហាញផ្លូវ» ក្នុងគោលបំណងពង្រឹងវិស័យការពារជាតិ និងការអភិវឌ្ឍឧស្សាហកម្មការពារជាតិរបស់អឺរ៉ុប នៅចុងទសវត្សរ៍នេះ ដើម្បីផលិតគ្រឿងយុទ្ធោបករណ៍ទំនើបៗ។ ហើយបន្ទាប់មកផែនការនោះ នឹងត្រូវបានធ្វើការជាមួយអង្គការណាតូ (NATO) មុនពេលមេដឹកនាំ EU ជួបគ្នាម្តងទៀតនៅចុងខែនេះ៕