ប្រធានាធិបតីអាមេរិក លោក Donald Trump បាននិយាយកាលថ្ងៃសុក្រ (ទី២៤ ខែតុលា) ថា កូរ៉េខាងជើង គឺ «ចាត់ចូលកម្រិតប្រទេសមហាអំណាចនុយក្លេអ៊ែរ» ហើយ ដោយការលើកឡើងនេះកើតមាននៅពេលដែលលោកបានចាកចេញពីសហរដ្ឋអាមេរិកទៅកាន់តំបន់អាស៊ី ជាការធ្វើដំណើរដែលអាចមានរួមបញ្ចូលទាំងការជួបជាមួយមេដឹកនាំទីក្រុងព្យុងយ៉ាង លោក Kim Jong Un ផងដែរ។

នៅពេលត្រូវបានសួរនៅលើយន្តហោះ Air Force One ថា តើលោកបើកចំហ ចំពោះការទាមទាររបស់កូរ៉េខាងជើង ក្នុងការទទួលស្គាល់ថា ជារដ្ឋនុយក្លេអ៊ែរជាលក្ខខណ្ឌមុន សម្រាប់ការសន្ទនាជាមួយទីក្រុងវ៉ាស៊ីនតោនដែរ ឬទេ លោក Trump បានឆ្លើយតបថា៖ «មែន ខ្ញុំគិតថា ពួកគេត្រូវបានចាត់ចូលជាកម្រិតប្រទេសមហាអំណាចនុយក្លេអ៊ែរហើយ»។

លោកបានបញ្ជាក់បន្ថែមថា៖ «នៅពេលដែលអ្នកនិយាយថា ពួកគេត្រូវតែត្រូវបានទទួលស្គាល់ថា ជាមហាអំណាចនុយក្លេអ៊ែរនោះ មែនហើយ ពួកគេមានអាវុធនុយក្លេអ៊ែរច្រើនគ្រាប់ ខ្ញុំនឹងនិយាយបែបនោះ

គួរបញ្ជាក់ថា លោក Trump ត្រូវបានគេរំពឹងថា នឹងស្ថិតនៅប្រទេសកូរ៉េខាងត្បូង នាថ្ងៃពុធសប្ដាហ៍ក្រោយ ដើម្បីចូលរួមវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC)។

ប្រព័ន្ធផ្សព្វផ្សាយអាមេរិកបានរាយការណ៍នៅមុននេះថា មន្ត្រីមកពីរដ្ឋបាលរបស់លោក បានពិភាក្សាជាលក្ខណៈឯកជន អំពីការរៀបចំឲ្យមានជំនួប រវាងលោក Trump និងមេដឹកនាំកូរ៉េខាងជើង ដែលលោកបានជួបពិភាក្សាជាមួយចុងក្រោយ ក្នុងឆ្នាំ២០១៩។

លោក Trump បាននិយាយថា លោកសង្ឃឹមថា នឹងបានជួបជាមួយលោក Kim ម្តងទៀត ដោយប្រហែលជានៅឆ្នាំនេះ។ លោក Kim បាននិយាយកាលពីខែមុនថា លោកមាននូវ «ការចងចាំដ៏ល្អ» អំពីលោក Trump ហើយបើកចំហ សម្រាប់កិច្ចពិភាក្សា ប្រសិនបើសហរដ្ឋអាមេរិកទម្លាក់ចោលការទាមទារ «មិនត្រឹមត្រូវ» របស់ខ្លួនឲ្យទីក្រុងព្យុងយ៉ាងបោះបង់អាវុធនុយក្លេអ៊ែរ៕