សមាគមគ្រិស្តសាសនានីហ្សេរីយ៉ា (CAN) បាននិយាយកាលពីថ្ងៃសៅរ៍ ថា សិស្សសាលាសរុបចំនួន ៣០៣នាក់ និងគ្រូបង្រៀន ១២នាក់ ត្រូវបានក្រុមខ្មាន់កាំភ្លើងចាប់ពង្រត់ក្នុងអំឡុងពេលវាយប្រហារសាលាកាតូលិក St Mary’s Catholic School នៅរដ្ឋនីហ្សេ (Niger) ភាគខាងជើងប្រទេសនីហ្សេរីយ៉ាកាលពីថ្ងៃសុក្រ ខណៈការភ័យខ្លាចសន្តិសុខកើនឡើងក្នុងប្រទេសដែលមានប្រជាជនច្រើនបំផុតនៅទ្វីបអាហ្វ្រិកមួយនេះ។

សាលារៀនទាំងអស់ត្រូវបានបិទ នៅក្នុងរដ្ឋ Niger ក្រោយមានហេតុការណ៍នោះ។   

ការវាយប្រហារនេះកើតឡើងត្រឹមតែប៉ុន្មានថ្ងៃបន្ទាប់ពីក្រុមបុរសប្រដាប់អាវុធបានសម្រុកវាយលុកសាលាមធ្យមសិក្សាមួយនៅភាគពាយ័ព្យប្រទេសនីហ្សេរីយ៉ា ដោយចាប់ពង្រត់ក្មេងស្រីសិស្សសាលាចំនួន ២៥នាក់ក្នុងកាលៈទេសៈស្រដៀងគ្នានៅក្នុងទីក្រុង Maga នៃរដ្ឋ Kebbi ជិតខាង ដែលមានចម្ងាយ ១៧០គីឡូម៉ែត្រ កាលពីព្រឹកព្រលឹមថ្ងៃចន្ទសប្ដាហ៍មុន។

 ក្រោយមកក្មេងស្រីម្នាក់ បានរត់គេចខ្លួនរួច ហើយ ២៤នាក់នៅតែបាត់ខ្លួន។

មិនទាន់មានក្រុមណាមួយអះអាងទទួលខុសត្រូវចំពោះការចាប់ពង្រត់ទាំងពីរនេះនៅឡើយទេ ហើយក្រុមអាជ្ញាធរបាននិយាយថា ក្រុមបច្ចេកទេស ត្រូវបានដាក់ពង្រាយរួមជាមួយក្រុមអ្នកប្រមាញ់ក្នុងស្រុក ដើម្បីជួយសង្គ្រោះកុមារទាំងនោះ៕