ប្រព័ន្ធផ្សព្វផ្សាយជាច្រើនបានរាយការណ៍កាលពីថ្ងៃចន្ទ (២៤ វិច្ឆិកា) ថា ផែនការសន្តិភាព ២៨ចំណុច ដែលស្នើឡើងដោយសហរដ្ឋអាមេរិក ក្នុងគោលបំណងបញ្ចប់វិបត្តិអ៊ុយក្រែន ត្រូវបន្ថយទៅជាក្របខណ្ឌ ១៩ចំណុច ដែលព្រាងដោយអាមេរិកនិងអ៊ុយក្រែន កាលពីចុងសប្តាហ៍នៅទីក្រុងហ្សឺណែវ។

កាសែត Washington Post បានស្រង់សម្តីលោក Oleksandr Bevz ជាមន្ត្រីអ៊ុយក្រែនដែលបានចូលរួមក្នុងកិច្ចចរចាទីក្រុងហ្សឺណែវថា៖ "ជំហរចម្រូងចម្រាសជាច្រើនត្រូវបានបន្ទន់ ឬយ៉ាងហោចណាស់កែប្រែឡើងវិញ" ដើម្បីបង្ខិតទៅជិតជំហររបស់អ៊ុយក្រែន ឬកាត់បន្ថយការទាមទារលើអ៊ុយក្រែន។ មន្រ្តីរូបនេះបន្ថែមថា ឱសានវាទថ្ងៃព្រហស្បតិ៍ ទី២៧ ខែវិច្ឆិកា ដែលកំណត់ដោយប្រធានាធិបតីអាមេរិក Donald Trump ឱ្យមានកិច្ចព្រមព្រៀងមួយ ឥឡូវនេះ ហាក់ដូចជាបត់បែនជាងពីមុនទៅទៀត។

អនុរដ្ឋមន្ត្រីការបរទេសទីមួយរបស់អ៊ុយក្រែន លោក Sergiy Kyslytsya បានប្រាប់កាសែត Financial Times ថា សេចក្តីព្រាងថ្មីនេះ ស្រដៀងគ្នាតិចតួចទៅនឹងកំណែ ២៨ចំណុច ដែលបានលេចធ្លាយដែរ។ របាយការណ៍ប្រព័ន្ធផ្សព្វផ្សាយជាច្រើនបានឱ្យដឹងថា សេចក្តីព្រាងថ្មីនេះបន្សល់ទុកនូវបញ្ហាដ៏ចម្រូងចម្រាសបំផុតសម្រាប់លោក Trump និងលោកប្រធានាធិបតីអ៊ុយក្រែន Volodymyr Zelenskyy ក្នុងការសម្រេចចិត្ត។

កំណែ ២៨ចំណុចមុន អាចនឹងតម្រូវឱ្យអ៊ុយក្រែន ប្រគល់ទឹកដីភាគខាងកើតរបស់ខ្លួន បន្ថយទំហំយោធា និងបោះបង់មហិច្ឆិតាសមាជិកណាតូ។ ផែនការបែបនេះ បានឆ្លងបន្ទាត់ក្រហមជាច្រើនរបស់អ៊ុយក្រែន ដែលទាក់ទាញការរិះគន់ពីអ៊ុយក្រែន និងទូទាំងទ្វីបអឺរ៉ុប នេះបើយោងតាមរបាយការណ៍៕