អធិការបតីអូទ្រីស លោក Christian Stocker បានថ្លែងថា សហភាពអឺរ៉ុប នឹងបន្តដាក់សម្ពាធលើរុស្ស៊ី និងគាំទ្រអ៊ុយក្រែន ទោះបីជាមានកិច្ចខិតខំប្រឹងប្រែងផ្តោតលើសន្តិភាពរបស់សហរដ្ឋអាមេរិកក៏ដោយ។  

លោកបានសរសេរនៅលើបណ្តាញសង្គម X ថា៖ «ខ្ញុំស្វាគមន៍ចំពោះគំនិតផ្តួចផ្តើមទាំងអស់ ដែលនាំយើងឲ្យខិតជិតដល់បទឈប់បាញ់ និងសន្តិភាពយូរអង្វែងនៅអ៊ុយក្រែន។ ក្នុងរយៈពេលប៉ុន្មានថ្ងៃកន្លងមកនេះ សក្ដានុពលថ្មីមួយ បានលេចចេញជារូបរាងនៅក្នុងកិច្ចខិតខំប្រឹងប្រែងផ្នែកការទូត»។

ក្នុងពេលជាមួយគ្នានេះ លោក Stocker បានបន្ថែមថា សហភាពអឺរ៉ុប នឹងបន្តគាំទ្រអ៊ុយក្រែន និងដាក់សម្ពាធលើរុស្ស៊ី «គ្រប់កម្រិតទាំងអស់»។

លោកអធិការបតីអូទ្រីស បានលើកឡើងថា៖«ពុំចាំបាច់សង្ស័យទេ អ៊ុយក្រែន និងសហភាពអឺរ៉ុប ត្រូវមានវត្តមាន និងចូលរួមយ៉ាងសកម្មក្នុងការចរចា នៅពេលដែលសន្តិសុខនៃទ្វីបអឺរ៉ុបរបស់យើង កំពុងត្រូវបានពិភាក្សា»។

នៅថ្ងៃទី ២៣ ខែវិច្ឆិកា សហរដ្ឋអាមេរិក និងអ៊ុយក្រែន បានធ្វើកិច្ចពិគ្រោះយោបល់លើផែនការសន្តិភាពរបស់ទីក្រុងវ៉ាស៊ីនតោន។ រដ្ឋមន្ត្រីការបរទេសអាមេរិក លោក Marco Rubio បានហៅកិច្ចប្រជុំនេះថា«ផ្តល់អត្ថប្រយោជន៍ច្រើនបំផុត» នៅក្នុងជម្លោះទាំងមូល។ ក្រោយមក សារព័ត៌មាន Politico បានរាយការណ៍ដោយដកស្រង់ប្រភពមួយថា ការចរចានោះ មានភាពតានតឹង៕