​​គ្រី​ឃី​ត៖ សមាគម​សហព័ន្ធ​កីឡា​គ្រី​ឃី​ត​កម្ពុជាបាន​ចុះ​អនុស្សារណៈ​យោគយល់​គ្នា​ (MOU) ជាមួយ​គណៈកម្មាធិការជាតិ​ប៉ា​រ៉ា​ឡាំ​ពិ​ក​កម្ពុជា ដើម្បី​ឈានទៅរក​ការបង្កើត​ក្រុម​ជម្រើសជាតិ​សម្រាប់​ជនពិការ ហើយ​ចូលរួម​ការប្រកួត​អន្ដរជាតិ​នានា ពិសេស​ការប្រកួត​កីឡា​គ្រី​ឃី​ត​ជនពិការ​អាស៊ី T-20 Asia Cup នា​ដើមឆ្នាំ​២០២៣ ខាងមុខ។​

​ពិធី​ចុះ​អនុស្សារណៈ​យោគយល់​គ្នា​នេះបានធ្វើ​ឡើង​នៅ​អាគារ GIA កោះ​ពេជ្រកាលពី​ថ្ងៃទី​២៨ ខែកុម្ភៈ ក្រោម​វត្តមាន​ឯកឧត្តម យី វាសនា យី វាសនា អគ្គលេខាធិការនៃ​គណៈកម្មាធិការ​ជាតិ​ប៉ា​រ៉ា​ឡាំ​ពិ​ក​កម្ពុជា និង​លោក សែន វិទ្យា ប្រធាន​សមាគម​សហព័ន្ធ​កីឡា​គ្រី​ឃី​ត​កម្ពុជា។​ ​លោក សែន វិទ្យា បាន​បញ្ជាក់ថា កិច្ចសហការ​ជាមួយ​គណៈ​កម្មាធិការ​ជាតិ​ប៉ា​រ៉ា​ឡាំ​ពិ​ក​កម្ពុជា​នេះ ធ្វើឡើង​ក្នុង​គោលបំណង​ផ្សព្វផ្សាយលើកកម្ពស់ និង​អភិវឌ្ឍន៍​វិស័យ​កីឡា​គ្រី​ឃី​ត​នៅ​កម្ពុជា ពិសេស​ចូលរួម​បង្កើត​ឲ្យ​មាន​ក្រុមកីឡា​គ្រី​ឃី​ត​ជម្រើសជាតិ​សម្រាប់​ជនពិការ ដើម្បី​ចូលរួម​ការប្រកួត​អន្ដរជាតិ​នានា ស្របពេល​សមាគម​ទើប​ទទួលបាន​លិខិតអញ្ជើញ​ផ្លូវការ ដើម្បី​ចូលរួម​ការប្រកួត​ពាន​រង្វាន់ T-20 Asia Cup នៅ​ប្រទេស​ប៉ា​គី​ស្ថានអំឡុង​ខែមករាដល់​ខែកុម្ភៈ ឆ្នាំ​២០២៣ ខាងមុខ។​ ​ឯកឧត្តម យី វាសនា បានបង្ហាញ​នូវ​សុទិដ្ឋិនិយម​ខ្ពស់ចំពោះ​កិច្ចសហការ​មួយ​នេះ ដែល​នឹង​ផ្ដល់នូវ​អត្ថប្រយោជន៍ និង​ឱកាស​សម្រាប់​ជនពិការ​កម្ពុជា ពិសេស​អ្នក​ស្នេហា​វិស័យ​កីឡាក្នុងការ​ចូលរួម​លេង​កីឡា​គ្រី​ឃី​ត ដើម្បី​មានឱកាស​ជាប់​ជម្រើសជាតិ និង​ចូលរួម​ការប្រកួត​លើ​ឆាក​អន្ដរជាតិ។ ឯកឧត្តម​បាន​ប្ដេជ្ញា​គាំទ្រ និង​សហការ​ពេញទំហឹងដើម្បី​ជំរុញ និង​ស្វែងរក​កីឡា​ជនពិការ​លេង​កីឡា​គ្រី​ឃី​ត​នេះ។​

​គួរ​ដឹងថា ទន្ទឹម​ជាមួយ​ការចុះ​អនុស្សារណៈ​យោគយល់​គ្នា ជាមួយ​គណៈកម្មាធិការ​ជាតិ​ប៉ា​រ៉ា​ឡាំ​ពិ​ក​កម្ពុជា​នោះដែរ សមាគម​សហព័ន្ធ​កីឡា​គ្រី​ឃី​ត​កម្ពុជាក៏បាន​ប្រកាស​តែងតាំង​ឯកឧត្តម យី វាសនា ជា​ប្រធាន​ក្រុមប្រឹក្សាភិបាល​នៃ​សមាគម​សហព័ន្ធ​កីឡា​គ្រី​ឃី​ត​កម្ពុជា ដើម្បី​រួមចំណែក​ដឹកនាំ និង​អភិវឌ្ឍ​វិស័យ​កីឡា​មួយ​នេះ​ឲ្យ​កាន់តែ​រីកចម្រើន​នៅ​កម្ពុជា​ផងដែរ។​ ​បច្ចុប្បន្ន​សមាគម​សហព័ន្ធ​កីឡា​គ្រី​ឃី​ត​កម្ពុជាត្រូវបាន​ទទួលស្គាល់ និង​ចូល​ជា​សមាជិកភាព​ពេញសិទ្ធិ​តំណាងឱ្យ​កម្ពុជា​ របស់​សហព័ន្ធ​គ្រប់គ្រង​កីឡា​អាស៊ី​សម្រាប់​កីឡា​ជនពិការ ​(Asian Turf & Track Federation (ATTF) ហើយក៏​ត្រូវ​បានទទួល​ស្គាល់ និង​ចូល​ជា​សមាជិកភាព​ពេញសិទ្ធិ​តំណាងឱ្យ​កម្ពុជា របស់​ក្រុមប្រឹក្សា​កីឡា​គ្រី​ឃី​ត​ជនពិការ​អន្តរជាតិ (International Wheelchair Cricket Council (IWCC) ផងដែរ៕

​អត្ថបទ៖ លី ឈុន​ឡា