អង្គការសប្បុរសធម៌ផ្នែកវេជ្ជសាស្ត្រ គ្រូពេទ្យគ្មានព្រំដែន ដែលត្រូវបានហាមប្រាមមិនឱ្យចូលតំបន់ហ្កាហ្សា ជាមួយនឹងស្ថាប័នជំនួយចំនួន ៣៦ ផ្សេងទៀត បាននិយាយកាលពីថ្ងៃសៅរ៍ ៣ មករា ថា ខ្លួននឹងត្រូវបញ្ចប់ប្រតិបត្តិការរបស់ខ្លួននៅទីនោះនៅក្នុងខែមីនាខាងមុខ ប្រសិនបើអ៊ីស្រាអែលមិនផ្លាស់ប្តូរការសម្រេចចិត្តរបស់គេទេនោះ។   

អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវកាលពីថ្ងៃសុក្រឱ្យអ៊ីស្រាអែលបញ្ចប់ការហាមប្រាមលើភ្នាក់ងារមនុស្សធម៌ដែលផ្តល់ជំនួយនៅក្នុងតំបន់ហ្កាហ្សា ដោយនិយាយថា លោកមានការព្រួយបារម្ភយ៉ាងខ្លាំងចំពោះស្ថានភាពដែលចេះតែធ្ងន់ធ្ងរ។

អ៊ីស្រាអែលបានបញ្ជាក់កាលពីថ្ងៃព្រហស្បតិ៍ថា ខ្លួនកំពុងហាមប្រាមអង្គការមនុស្សធម៌អន្តរជាតិធំៗចំនួន ៣៧ មិនឱ្យចូលទៅក្នុងតំបន់ហ្កាហ្សា ដោយចោទប្រកាន់ពួកគេថាមិនបានផ្តល់បញ្ជីឈ្មោះបុគ្គលិករបស់ពួកគេ ដែលឥឡូវនេះត្រូវបានទាមទារជាផ្លូវការសម្រាប់ហេតុផលសន្តិសុខ។

អង្គការគ្រូពេទ្យគ្មានព្រំដែនបានហៅការទាមទារនេះថាជា ការឈ្លានពានដ៏ធ្ងន់ធ្ងរ ប៉ុន្តែអ៊ីស្រាអែលនិយាយថា វាចាំបាច់ក្នុងការបញ្ឈប់ក្រុមជីហាដ មិនឲ្យមានឱកាសជ្រៀតចូលទៅក្នុងរចនាសម្ព័ន្ធមនុស្សធម៌៕