យោងតាមសេចក្តីថ្លែងការណ៍របស់សេតវិមានបានឲ្យដឹងថា ប្រធានាធិបតីសហរដ្ឋអាមេរិក លោក Donald Trump កាលពីថ្ងៃសុក្រ ទី១៥ ខែមករា បានតែងតាំងលោក Marco Rubio រដ្ឋមន្ត្រីការបរទេស និងអតីតនាយករដ្ឋមន្ត្រីអង់គ្លេស លោក Tony Blair ជាសមាជិកស្ថាបនិកនៃ «ក្រុមប្រឹក្សាសន្តិភាព» នៅតំបន់ហ្កាហ្សា។ លោក Trump ក៏បានតែងតាំងលោក Steve Witkoff បេសកជនពិសេសរបស់លោក លោកJared Kushner កូនប្រសារ និងលោក Ajay Banga ប្រធានធនាគារពិភពលោក ក្នុងចំណោមអ្នកដែលស្ថិតនៅក្នុង «ក្រុមប្រឹក្សាប្រតិបត្តិស្ថាបនិក» ដែលមានសមាជិកចំនួន៧នាក់។

លោក Trump ផ្ទាល់នឹងធ្វើជាប្រធានក្រុមប្រឹក្សានេះ ហើយសមាជិកបន្ថែមទៀតនឹងត្រូវប្រកាសនៅក្នុងសប្តាហ៍ខាងមុខ។ 

លោក Trump បានប្រកាសពីការបង្កើត «ក្រុមប្រឹក្សាសន្តិភាព» កាលពីថ្ងៃព្រហស្បតិ៍ ជាសមាសភាពសំខាន់ដំណាក់កាលទីពីរនៃផែនការគាំទ្រដោយសហរដ្ឋអាមេរិក ដើម្បីបញ្ចប់សង្គ្រាមនៅតំបន់ហ្កាហ្សា។ ប្រធានាធិបតីសហរដ្ឋអាមេរិករូបនេះបាននិយាយថា វាគឺជា «ក្រុមប្រឹក្សាដ៏អស្ចារ្យ និងសំខាន់បំផុតដែលមិនធ្លាប់មានពីមុនមក នៅពេលណា និងកន្លែងណាមួយ»។

ការបង្កើតក្រុមប្រឹក្សានេះ ធ្វើឡើងឡើងភ្លាមៗបន្ទាប់ពីការប្រកាសអំពីគណៈកម្មាធិការជំនាញប៉ាឡេស្ទីនដែលមានសមាជិក១៥រូប ទទួលបន្ទុកគ្រប់គ្រងអភិបាលកិច្ចតំបន់ហ្កាហ្សាក្រោយសង្គ្រាមដែលត្រូវបានបំផ្លិចបំផ្លាញ។