លោក Marco Rubio រដ្ឋមន្ត្រីការបរទេសអាមេរិក បានធានាដល់ក្រុមមេដឹកនាំអឺរ៉ុបថា សហរដ្ឋអាមេរិកមិនមានគម្រោងបោះបង់ចោលសម្ព័ន្ធភាពអន្តរអាត្លង់ទិកនោះទេ ដោយនិយាយថា វាសនារបស់ខ្លួន «នឹងជាប់ទាក់ទងគ្នាជានិច្ច» ជាមួយទ្វីបអឺរ៉ុប។

រដ្ឋមន្ត្រីការបរទេសអាមេរិករូបនេះបានប្រាប់សន្និសីទសន្តិសុខទីក្រុង Munich ប្រទេសអាល្លឺម៉ង់ថា «ពួកលោកពុំបានស្វែងរកការបំបែកខ្លួនទេ ផ្ទុយទៅវិញគឺដើម្បីរស់ឡើងវិញនូវមិត្តភាពចាស់ និងបន្តអរិយធម៌ដ៏អស្ចារ្យបំផុតនៅក្នុងប្រវត្តិសាស្ត្រមនុស្សជាតិ»។

លោកបានរិះគន់គោលនយោបាយអន្តោប្រវេសន៍ ពាណិជ្ជកម្ម និងអាកាសធាតុរបស់អឺរ៉ុប ប៉ុន្តែខ្លឹមសារទូទៅនៃសុន្ទរកថាដែលត្រូវបានតាមដានយ៉ាងដិតដល់គឺខុសគ្នាយ៉ាងខ្លាំងពីអនុប្រធានាធិបតី JD Vance នៅក្នុងព្រឹត្តិការណ៍ដូចគ្នាកាលពីឆ្នាំមុន ក្នុងអំឡុងពេលលោកបានស្តីបន្ទោសក្រុមមេដឹកនាំទ្វីបអឺរ៉ុប។ ភាពតានតឹងរវាងអាមរិកនិងអឺរ៉ុបមានចាប់ពីពាណិជ្ជកម្ម ដល់ដែនដីហ្គ្រីនលែន។ 

លោកស្រី Ursula von der Leyen ប្រធានគណៈកម្មការអឺរ៉ុបបាននិយាយថា លោកស្រី មានទំនុកចិត្តយ៉ាងខ្លាំង ចំពោះការអត្ថាធិប្បាយរបស់លោក Rubio។

លោក Rubio ដែលជាប្រមុខការទូតជាន់ខ្ពស់បំផុតរបស់រដ្ឋបាលលោក Trump បាននិយាយថា វាមិនមែនជា «គោលដៅ ឬបំណងប្រាថ្នារបស់ពួកលោក» ក្នុងការបញ្ចប់ភាពជាដៃគូអន្តរអាត្លង់ទិកនោះទេ ដោយបន្ថែមថា សម្រាប់ពួកលោកជាជនជាតិអាមេរិក ផ្ទះរបស់ពួកលោកអាចស្ថិតនៅក្នុងអឌ្ឍគោលខាងលិច ប៉ុន្តែពួកលោកនឹងនៅតែជាកូនរបស់អឺរ៉ុបជានិច្ច៕