ប្រធានាធិបតីអាមេរិក លោក ដូណាល់ ត្រាំ បានប្រកាសថា ប្រេងចំនួន ៥០ លានបារ៉ែល កំពុងត្រូវបានដឹកជញ្ជូនពីប្រទេសវ៉េណេស៊ុយអេឡាទៅកាន់ទីក្រុង Houston រដ្ឋតិចសាស នៅសហរដ្ឋអាមេរិក។

ដោយថ្លែងទៅកាន់អ្នកគាំទ្ររបស់លោកនៅរោងចក្រដែកថែបមួយ នៅក្នុងរដ្ឋចចា (Georgia) លោក ត្រាំ បាននិយាយកាលពីថ្ងៃព្រហស្បតិ៍ថា៖«យើងមានទំនាក់ទំនងដ៏អស្ចារ្យជាមួយប្រទេសមួយឈ្មោះថា វ៉េណេស៊ុយអេឡា។ ពួកគេទទួលបានប្រេងច្រើន ហើយយើងក៏ទទួលបានដែរ។ ប៉ុន្តែយើងកំពុងជួយពួកគេច្រើនណាស់។ យើងបានយកប្រេងចំនួន ៥០ លានបារ៉ែលហើយ។ ឥឡូវនេះ ប្រេងទាំងនោះ ត្រូវបានដឹកតាមនាវាធំៗទៅកាន់ទីក្រុង Houston»។ 

នៅថ្ងៃទី ០៣ ខែមករា ទីក្រុងវ៉ាស៊ីនតោនបានប្រកាសពីប្រតិបត្តិការយោធាមួយ នៅទីក្រុងការ៉ាកាស ជាលទ្ធផលដែលទាហានអាមេរិក បានចាប់ខ្លួនមេដឹកនាំវ៉េណេស៊ុយអេឡា លោក នីកូឡាស ម៉ាឌូរ៉ូ ( Nicolas Maduro) និងភរិយារបស់លោក។ នៅថ្ងៃទី ០៥ ខែមករា គូស្វាមីភរិយានេះ បានបង្ហាញខ្លួននៅចំពោះមុខតុលាការសហព័ន្ធមួយនៅក្នុងសង្កាតភាគខាងត្បូងនៃទីក្រុងញូវយ៉ក។

ពួកគេត្រូវបានចោទប្រកាន់ពីបទពាក់ព័ន្ធនឹងការជួញដូរគ្រឿងញៀន។ ទាំងលោក ម៉ាឌូរ៉ូ និងភរិយារបស់លោក មិនបានសារភាពកំហុសទេ។ លោកស្រី Delcy Rodriguez ដែលធ្លាប់បម្រើការជាអនុប្រធានាធិបតី ក្រោមការដឹកនាំរបស់លោក ម៉ាឌូរ៉ូ បច្ចុប្បន្នកំពុងធ្វើជាប្រមុខរដ្ឋ នៅវ៉េណេស៊ុយអេឡា។

នៅថ្ងៃទី ០៦ ខែមករា មេដឹកនាំអាមេរិករូបនេះ បាននិយាយថា អាជ្ញាធរវ៉េណេស៊ុយអេឡា នឹងផ្ទេរប្រេងចន្លោះពី ៣០ លានទៅ ៥០លានបារ៉ែល ទៅសហរដ្ឋអាមេរិកសម្រាប់លក់ ដោយលោកផ្ទាល់នឹងត្រួតពិនិត្យប្រាក់ចំណូលពីប្រតិបត្តិការនេះ។ ក្រោយមកលោក ត្រាំ បានកត់សម្គាល់ថា ប្រទេសវ៉េណេស៊ុយអេឡានឹងប្រើប្រាស់ថវិកាដែលបានមកពីកិច្ចព្រមព្រៀងប្រេងថ្មីសម្រាប់តែទិញផលិតផលដែលផលិតនៅសហរដ្ឋអាមេរិកប៉ុណ្ណោះ៕