BTV NEWS

សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក

សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្តពីព្រះបរមរតនកោដ្ឋក្នុងការពូនជ្រំទំនាក់ទំនងរវាងកម្ពុជា និងចិន

សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម

ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត

នយោបាយ និង ការអភិវឌ្ឍន៍

រយៈពេល១ខែនៃខែឧសភា កម្ពុជារកឃើញនិងរឹងអូសអាល់កុលក្លែងក្លាយជាង ៥៣តោន

ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្ម បានបញ្ជាក់ថា គិតក្នុងរយៈពេលពេញ១ខែឧសភា ឆ្នាំ២០២១នេះ បានរកឃើញ និងរឹបអូសនូវអាល់កុលក្លែងក្លាយ ឬមេតាណុលសរុបចំនួនប្រមាណជាង ៥៣តោន។នៅក្នុងបណ្តាញសង្គមហ្វេសប៊ុក អគ្គនាយកដ្ឋាន ក.ប.ប បានលើកឡើងថា ខណៈដែលជំងឺកូវីដ១៩ កំពុងបន្តរាលដាលនៅកម្ពុជា និងដោយមានការណែនាំ ចង្អុលបង្ហាញពីឯកឧត្តមរដ្ឋមន្ត្រី ប៉ាន សូរស័ក្តិ អគ្គនាយកដ្ឋានក.ប.ប បានចុះប្រតិបត្តិការបង្ក្រាបអាល់កុលក្លែងក្លាយនៅតាមផ្សារ ហ្វាម៉ាស៊ី ឱសថស្ថាន ឬតាមកន្លែងលក់ថ្នាំពេទ្យនានាយ៉ាងហោច ៨លើក ដោយមានអាល់ក្លែងក្លាយសរុបជាង ៥៣តោន ស្មើនឹងប្រមាណ ៥៣,០០០លីត្រ ក្នុងនោះរឹបអូសច្រើនជាងគេនៅរាជធានីភ្នំពេញ និងខេត្តព្រៃវែង ក្រចេះ កោះកុង ត្បូងឃ្មុំ ស្ទឹងត្រែង ព្រះវិហារ ឧត្តរមានជ័យ សៀមរាប និងខេត្តបន្ទាយមានជ័យ។ទាក់ទិនករណីនេះ ក.ប.ប បានអំពាវនាវដល់ប្រជាពលរដ្ឋដែលជាអាជីវករលក់ដុំ លក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់ សូមប្រកបរបរអាជីវកម្មប្រកបដោយការទទួលខុសត្រូវ ប្រកាន់ខ្ជាប់នូវក្រមសីលធម៌ និងសុចរិតភាព ដោយគិតពីសុខុមាលភាពរបស់ប្រជាពលរដ្ឋខ្ពស់ជាងផលចំណេញរបស់ខ្លួន។ ក.ប.ប បានអំពាវនាវថែមទៀតទៅដល់សាធារណជនដែលជាអ្នកប្រើប្រាស់ សូមពិនិត្យនិងជ្រើសរើសផលិតផលដែលមានស្លាកសញ្ញា និងប្រភពត្រឹមត្រូវ ច្បាស់លាស់ មុននឹងសម្រេចចិត្តជាវអាល់កុល ឬជែល យកមកប្រើប្រាស់ក្នុងគោលបំណងសម្លាប់មេរោគ។ សូមបញ្ជាក់ថា អាល់កុល ឬអេតាណុល គឺជាសារធាតុដែលគេយកមកប្រើសម្រាប់សម្លាប់មេរោគ ពិសេសក្នុងដំណាក់កាលដែលជំងឺកូវីដ-១៩ កំពុងរីករាលដាលខ្លាំង ធ្វើឲ្យតម្រូវការប្រើប្រាស់មានការកើនឡើងខ្ពស់ ជាហេតុនាំឱ្យមានបុគ្គលឆ្លៀតឱកាសមួយចំនួន បានបន្លំយកសារធាតុមេតាណុល មកលក់ជូនប្រជាពលរដ្ឋដើម្បីយកទៅសម្លាប់មេរោគ ឬធ្វើជាសារធាតុផ្សំសម្រាប់ផលិតជែលសម្លាប់មេរោគជាដើម។ សារធាតុគីមីមេតាណុល គឺជាសារធាតុពុល ដែលគេច្រើនប្រើធ្វើជាសារធាតុសម្រាប់រំលាយ។ ការប្រើប្រាស់មេតាណុលធ្វើជាសារធាតុសម្លាប់មេរោគ មិនត្រឹមតែមិនមានប្រសិទ្ធភាពក្នុងការសម្លាប់មេរោគប៉ុណ្ណោះទេ តែថែមទាំងបណ្តាលឲ្យប៉ះពាល់ដល់សុខភាពរបស់អ្នកប្រើ ដូចជាបណ្តាលឱ្យរលាកស្បែក រលាកភ្នែក ឈឺក្បាល វិលមុខ ស្រវាំងភ្នែក ងងុយដេក បាត់បង់ស្មារតី ក្អួតចង្អោរ រំខានដល់ការរំលាយអាហារ ឬអាចបណ្តាលឱ្យស្លាប់បានប្រសិនបើយកទៅលាយជាមួយស្រា ហើយបរិភោគលើសកម្រិត៕ អត្ថបទ៖ ឈិត បូរ៉ាវី

បារាំង សន្យាផ្តល់ហិរញ្ញប្បទានដល់កម្ពុជាពី១០០ ទៅ១២០លានអ៊ឺរ៉ូក្នុងមួយឆ្នាំ

ភ្នំពេញ ៖ រដ្ឋាភិបាលបារាំង សន្យាបង្កើនទំហំហិរញ្ញប្បទានសហប្រតិបត្តិការ សម្រាប់កម្ចីសម្បទានក្នុងរង្វង់ពី ១០០ ទៅ ១២០ លានអឺរ៉ូ ក្នុងមួយឆ្នាំ ដើម្បីគាំទ្រដល់កិច្ចសហប្រតិបត្តិការលើគ្រប់វិស័យនៅកម្ពុជា។ការសន្យានេះ ធ្វើឡើង នៅកិច្ចប្រជុំ ពិគ្រោះយោបល់កម្រិតគោលនយោបាយលើកទី៤ ដោយមានការចូលរួមដោយឯកឧត្តម វង្សី វិស្សុត រដ្ឋមន្ដ្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ លោក R–mi GENEVEY តំណាងទីភ្នាក់ងារបារាំងសម្រាប់ការអភិវឌ្ឍ AFD និងលោកជំទាវ Eva NGYEN BINH ឯកអគ្គរដ្ឋទូតនៃសាធារណបារាំង ប្រចាំនៅព្រះរាជាណាចក្រកម្ពុជា ដែលដឹកនាំ ដោយ តាមរយៈ Video Conference នៅថ្ងៃទី ៣១ ខែ ឧសភា ឆ្នាំ ២០២១។តំណាងភាគីបារាំង បញ្ជាក់ថា បារាំងនឹងបន្តខិតខំប្រឹងប្រែង ប្រមូលហិរញ្ញប្បទានឥតសំណងពីសហគមអឺរ៉ុប ជួយកម្ពុជា និងពីប្រភពផ្សេងៗទៀតឱ្យបានច្រើន ស្របទៅតាមពេលវេលា បច្ចុប្បន្ន ក៏ដូចជានៅពេលក្រោយកូវីដ-១៩។ ជាការឆ្លើយតប ឯកឧត្តម វង្សី វិស្សុត ថ្លែងថា ប្រទេសបារាំងមិនត្រឹមតែជាមិត្ត ភក្តិ និងជាបណ្តាប្រទេសឈានមុខគេ ដែលចូលរួមចំណែកក្នុងការនាំមកនូវសន្តិភាពសម្រាប់ប្រទេសកម្ពុជាប៉ុណ្ណោះទេ គឺថែមទាំងជាដៃគូអភិវឌ្ឍន៍ដ៏សំខាន់ក្នុងការផ្តល់ការគាំទ្រទាំងផ្នែកបច្ចេកទេស និងហិរញ្ញវត្ថុ បន្ទាប់ពីកិច្ចព្រមព្រៀងសន្តិភាពទីក្រុងប៉ារីស។ ផ្អែកលើមូលដ្ឋាននេះ កម្ពុជាបានទទួលហិរញ្ញប្បទានសហប្រតិបត្តិការ ជាបន្តបន្ទាប់ប្រមាណ ៨៦៧លានអឺរ៉ូ ក្នុងនោះឥណទានសម្បទានរបស់រដ្ឋ មានទឹកប្រាក់ ៥០៧ លានអឺរ៉ូ។ ហិរញ្ញប្បទានទាំងនេះ បាននិងកំពុងរួមចំណែកយ៉ាងសកម្មដល់ការទ្រទ្រង់ការអភិវឌ្ឍ និងការជំរុញកំណើនសេដ្ឋកិច្ច ស្របតាមកម្មវិធី និងគោលនយោបាយសំខាន់ៗ របស់រាជរដ្ឋាភិបាលកម្ពុជា ពីមួយអាណត្តិទៅមួយអាណត្តិ។ ឯកឧត្តម បន្តថា ស្ថិតនៅក្នុងស្ថានភាពបច្ចុប្បន្ន ការរីករាលដាលជំងឺកូវីដ-១៩ បានបង្កជាវិបត្តិយ៉ាងធ្ងន់ធ្ងរប៉ះ ពាល់ដល់ដំណើរការសេដ្ឋកិច្ច និងសង្គម រួមទាំងសុខភាពសាធារណៈ ការរំខានដល់ខ្សែចង្វាក់ផលិតកម្ម ការបាត់បង់ការងារ និងការធ្លាក់ចុះនៃសេដ្ឋកិច្ចពិភពលោក ក្នុងនោះ សម្រាប់កម្ពុជាក៏បានរងនូវការរីករាលដាលជំងឺនេះផងដែរ។ ប្រការនេះ បានធ្វើឱ្យផលិតផលសរុបក្នុងស្រុកនៅក្នុងឆ្នាំ២០២០ បានធ្លាក់ចុះប្រមាណ ៣,០% ក្នុងនោះការនាំចេញបានធ្លាក់ចុះប្រមាណ -១,១% ឱនភាពថវិកាកើនឡើងដល់ ៩,២៥% ។ឯកឧត្តម វង្សី វិស្សុត បន្តលើកឡើងថា សេដ្ឋកិច្ចរបស់យើងនឹងងើបឡើងវិញនៅឆ្នាំ២០២១ ប៉ុន្តែការងើបឡើងនេះ នៅមានភាពមិនប្រាកដប្រជាកម្រិតខ្ពស់នៅឡើយ ប្រសិនបើការរាតត្បាតជំងឺកូវីដ-១៩ ក្នុងព្រឹត្តិការណ៍ ២០ កុម្ភៈ មានកម្រិតនៃផលប៉ះពាល់នៅតែខ្ពស់ និងមានជម្រៅជ្រៅ ហើយកម្មវិធីចាក់វ៉ាក់សាំងមិនអាចសម្រេចបានឆាប់រហ័ស៕អត្ថបទ៖ សុន រ៉ាឌី

មកដល់ពេលនេះភ្នំពេញ មិនត្រូវបានប្រកាសបិទឡើងវិញនោះទេ

ភ្នំពេញ ៖ អភិបាលរាជធានី បានធ្វើការច្រានចោលនូវព័ត៌មានដែលថា នឹងបិទរាជធានីភ្នំពេញឡើងវិញ ដោយសារតែមានអ្នកឆ្លងជំងឺកូវីដ-១៩ ច្រើននៅឡើយនោះ។ឯកឧត្ដម ឃួង ស្រេង អភិបាលរាជធានីភ្នំពេញ បានបញ្ជាក់នៅយប់ថ្ងៃទី៣១ ខែឧសភានេះថា មកដល់ពេលនេះ អាជ្ញាធររាជធានីភ្នំពេញ គ្មានការប្រកាសថា នឹងបិទទីក្រុងឡើងវិញនោះទេ ។ អាជ្ញាធរពាក់ព័ន្ធ រួមជាមួយក្រសួងសុខាភិបាល បាននឹងកំពុងបន្ដប្រយុទ្ធប្រឆាំងយ៉ាងសកម្មជាទីបំផុត ជាមួយជំងឺកូវីដ-១៩ ដែលកំពុងមានការឆ្លងរីករាលដាលនៅក្នុងប្រទេសកម្ពុជា។អភិបាលរាជធានីភ្នំពេញ បានថ្លែងថា ប៉ុន្មានថ្ងៃនេះ មានការចែកចាយព័ត៌មានថា អាជ្ញាធរនឹងបិទរាជធានីភ្នំពេញឡើងវិញ ដូច្នេះឯកឧត្ដម បានបញ្ជាក់ថា រហូតមកដល់ពេលនេះ មិនទាន់មានគោលការណ៍ពីរាជរដ្ឋាភិបាល ដើម្បីបិទខ្ទប់ភូមិសាស្ដ្ររាជធានីភ្នំពេញនោះទេ ។ជាមួយគ្នានេះ អភិបាលរាជធានីភ្នំពេញ បានបង្ហាញនូវការសោកស្ដាយចំពោះការចែកចាយព័ត៌មាន ដែលមិនទាន់មានការសម្រេចច្បាស់លាស់ ពាក់ព័ន្ធការបិទរាជធានីភ្នំពេញ ឡើងវិញនេះ ដែលធ្វើឱ្យប្រជាពលរដ្ឋមានការយល់ច្រឡំ។សូមបញ្ជាក់ថា ប៉ុន្មានថ្ងៃចុងក្រោយនេះ ចំនួនអ្នកឆ្លងជំងឺកូវីដ១៩ នៅទូទាំងប្រទេសហាក់មានការកើនឡើងវិញ ខណៈរាជធានីភ្នំពេញ ក៏កើននូវចំនួនអ្នកឆ្លងដូចគ្នានេះដែរ ជាហេតុធ្វើឱ្យរដ្ឋបាលរាជធានីភ្នំពេញ បានកែសម្រួលវិធានការចំពោះតំបន់មួយចំនួន ដែលត្រូវបានដាក់ជាតំបន់លឿង ទៅជាតំបន់លឿងទុំវិញ ដើម្បីទប់ស្កាត់ការឆ្លងរីករាលដាល ទន្ទឹមនឹងនេះ ក៏លេចចេញព័ត៌មានថា ដោយសារការឆ្លងច្រើនរាល់ថ្ងៃនេះហើយ ដែលអាជ្ញាធរនឹងបិទរាជធានីភ្នំពេញវិញ។ ទោះជាយ៉ាងណាព័ត៌មានពិត គឺអភិបាលរាជធានីបានធ្វើការច្រានចោលនូវព័ត៌មាននេះ។ដោយឡែកចំពោះផ្សារ គឺនៅបន្តផ្អាកដំណើរការមិនរៀបរយដដែល សម្រាប់ផ្សាររដ្ឋ គឺអនុញ្ញាតលក់ដូរតែម្ហូបអាហារប៉ុណ្ណោះ៕អត្ថបទ ៖ ប្រាក់ វ៉ាន់ដា

សម្តេចតេជោ អំពាវនាវដល់គ្រប់ក្រសួង ស្ថាប័ន អាជ្ញាធរមានសមត្ថកិច្ចត្រូវបង្កើនសិទ្ធិអំណាចកុមារ

ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវដល់ថ្នាក់ដឹកនាំ គ្រប់ក្រសួង ស្ថាប័ន អាជ្ញាធរ មានសមត្ថកិច្ច គ្រប់លំដាប់ថ្នាក់ ត្រូវបង្កើនសិទ្ធិអំណាចដល់កុមារ ជាពិសេសកុមារី និងសហគមន៍ ដើម្បីធ្វើឱ្យមានការផ្លាស់ប្តូរសំខាន់ៗ ដែលអាចដោះស្រាយឫសគល់ នៃការរើសអើង។តាមរយៈសាលិខិតរបស់សម្តេចតេជោ នាយករដ្ឋមន្ត្រី និង ជាប្រធានកិត្តិយសក្រុមប្រឹក្សាជាតិកម្ពុជា ដើម្បីកុមារ ក្នុងឱកាសខួបលើកទី៧២ ទិវាកុមារអន្តរជាតិ១មិថុនា ខួបលើកទី២០ ទិវាពិភពលោកប្រឆាំងពលកម្មកុមារ១២មិថុនា និងទិវាកុមារកម្ពុជាឆ្នាំ២០២១ សម្តេច បានវាយតម្លៃខ្ពស់ចំពោះថ្នាក់ដឹកនាំគ្រប់លំដាប់ថ្នាក់មន្ត្រីរាជការនៃក្រុមប្រឹក្សាជាតិកម្ពុជាដើម្បីកុមារ ក្រុមការងារដើម្បីកុមារក្រសួង ស្ថាប័ន ក្រុមប្រឹក្សាជាតិកម្ពុជា ដើម្បីកុមាររាជធានីខេត្ត កាកបាទក្រហមកម្ពុជា អង្គការមិនមែនរដ្ឋាភិបាលជាតិ អន្តរជាតិ ដៃគូអភិវឌ្ឍន៍ វិស័យឯកជន គ្រួសារនៅក្នុងសហគមន៍ រួមទាំងកុមារខ្លួនឯង ដែលបានយកអស់កម្លាំងកាយចិត្ត ប្រាជ្ញាស្មារតី និងធនធានប្រកបដោយការទទួលខុសត្រូវខ្ពស់ក្នុងការរួមចំណែកលើកកម្ពស់សិទ្ធិកុមារ ដើម្បីឲ្យពួកគេទទួលបានសិទ្ធិពេញលេញ ដូចមានចែងក្នុងច្បាប់ជាតិនិងអន្តរជាតិ។សម្ដេច ក៏បានអំពាវនាវនូវខ្លឹមសារ៩ចំណុច ឲ្យគ្រប់ក្រសួង ស្ថាប័ន ព្រមទាំងអាជ្ញាធរមានសមត្ថកិច្ច គ្រប់លំដាប់ថ្នាក់ ត្រូវបង្កើនសិទ្ធិអំណាចដល់កុមារ ជាពិសេសកុមារីនិងសហគមន៍ដើម្បីធ្វើឱ្យមានការផ្លាស់ប្ដូរសំខាន់ៗ ដែលអាចដោះស្រាយឫស នៃការរើសអើង ការផាត់ចេញពីសង្គម និងភាពរងគ្រោះ និងងាយរងគ្រោះរបស់កុមារ(កុមារី កុមារា ជាជនជាតិដើមភាគតិច កុមារមានពិការភាព)។ ជំរុញឲ្យមានការផ្លាស់ប្ដូរ ក្នុងការអនុវត្ត និងគោលនយោបាយនៅក្នុងកម្រិតមូលដ្ឋាន និងកម្រិតជាតិតាមរយៈសកម្មភាពចុះផ្ទាល់ក្នុងការចែករំលែកចំណេះដឹងបទពិសោធន៍ស្ដីពីតថភាពរបស់កុមារដែលកំពុងជួបប្រទះ។ សូមលើកទឹកចិត្តដល់កុមារ និងសហគមន៍ ដើម្បីត្រៀមខ្លួននឹងឆ្លើយតបទៅនឹងវិបត្តិព្រមទាំងជម្នះរាល់ការលំបាកនានា។គ្រប់ក្រសួង ស្ថាប័ន អាជ្ញាធរមានសមត្ថកិច្ច គ្រប់លំដាប់ថ្នាក់ គ្រួសារសហគមន៍ សូមចូលរួមគាំទ្រឲ្យកុមារទទួលបានការអភិវឌ្ឍប្រកបដោយសុវត្ថិភាព និង ជោគជ័យ ចាប់ពីពេលចាប់កំណើត រហូតដល់ពេញវ័យ ដោយបន្តពង្រឹងសេវាគាំពារ និងអភិវឌ្ឍន៍កុមារតូច អាហារូបត្ថម្ភ សុខភាពបន្តពូជយុវវ័យ ការបណ្ដុះបណ្ដាលជំនាញវិជ្ជាជីវៈ និងបំណិនជីវិត។ អាជ្ញាធរមានសមត្ថកិច្ចគ្រប់លំដាប់ថ្នាក់ គ្រួសារសហគមន៍ សូមចូលរួមលើកកម្ពស់ការបង្ការទប់ស្កាត់លុបបំបាត់ការជួញដូរមនុស្ស និង រូបភាពអាសអាភាសកុមារ តាមរយៈក្នុងប្រព័ន្ធអនឡាញ និងក្រៅប្រព័ន្ធអនឡាញ ក្នុងសហគមន៍ ដើម្បីធានាសុវត្ថិភាព ស្របតាមគោលការណ៍ ឧត្តមប្រយោជន៍របស់កុមារ។ ត្រូវចូលរួមលើកកម្ពស់ការយល់ដឹង និងផ្លាស់ប្ដូរឥរិយាបថសង្គម ក្នុងការប្រព្រឹត្តបែបវិជ្ជមាន ចំពោះកុមារនៅក្នុង សហគមន៍ ជាពិសេសផ្ដល់ឱកាសឲ្យកុមារចូលរួមក្នុងការផ្លាស់ប្ដូរសហគមន៍របស់ពួកគេ។ សូមពិនិត្យលទ្ធភាពក្នុងការវិនិយោគចំនួនមន្ត្រី ភ្នាក់ងារសង្គមកិច្ចនៅតាមឃុំនីមួយៗដើម្បីបង្កើតការ ផ្ដល់សេវាសង្គមកិច្ច ឱ្យកាន់តែកៀកទៅកុមារនិងសហគមន៍ ជាពិសេសកុមាររងគ្រោះ ដោយឪពុក ម្ដាយ ទុកចោល កុមារដែលមានរងអំពើហិង្សានិងការកេងប្រវ័ញ្ចគ្រប់រូបភាព។ គ្រប់ក្រសួង ស្ថាប័ន អាជ្ញាធរមានសមត្ថកិច្ច គ្រប់លំដាប់ថ្នាក់ ត្រូវបន្តជំរុញការរៀបចំ និងអនុវត្តប្រព័ន្ធកិច្ចការពារកុមារអោយមានលក្ខណៈ ប្រទាក់ ក្រឡា ជាពហុវិស័យ នៅក្នុងសហគមន៍ ជាពិសេសការជួយដល់កុមារគ្រប់វិស័យ។ គ្រប់ក្រសួង ស្ថាប័ន ព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់ត្រូវលើកកម្ពស់ការអភិវឌ្ឍធនធានមនុស្សតាមរយៈការបង្កើនការអប់រំ ផ្សព្វផ្សាយ ពង្រឹងកិច្ចការពារ និងពិនិត្យតាមដាន ការអនុវត្តសិទ្ធិកុមារ ពីថ្នាក់ជាតិដល់ថ្នាក់ ក្រោមជាតិ៕អត្ថបទ ៖ មុត សុទ្ធ

សម្តេចហេង សំរិន ៖ កម្ពុជាបានគោរពយ៉ាងខ្ជាប់ខ្ជួននូវរដ្ឋធម្មនុញ្ញ អនុសញ្ញាស្តីពីកុមារ និងច្បាប់អន្តរជាតិនានា

ភ្នំពេញ ៖ សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានមានប្រសាសន៍ថា ប្រទេសកម្ពុជា បានគោរពយ៉ាងខ្ជាប់ខ្ជួននូវរដ្ឋធម្មនុញ្ញ អនុសញ្ញាស្តីពីកុមារ និងច្បាប់អន្តរជាតិពាក់ព័ន្ធក្នុងការឆ្លើយតបទៅ នឹងតម្រូវការរបស់កុមារ ពិសេសការលើកកម្ពស់សិទ្ធិសេរីភាព សេចក្តីថ្លៃថ្នូរ សមភាព និងសុវត្ថិភាពកុមារ ព្រមទាំងបានខិតខំទប់ស្កាត់ ប្រយុទ្ធប្រឆាំងរាល់អំពើហិង្សា ការរំលោភបំពានគ្រប់រូបភាព និងការជួញដូរពលកម្មក្នុងគ្រប់ទម្រង់មកលើកុមារផងដែរ។ថ្លែងតាមរយៈផេកហ្វេសបុកផ្ទាល់ នាព្រឹកថ្ងៃទី១ ខែមិថុនា ដែលជាថ្ងៃខួបលើកទី៧២ នៃទិវាកុមារអន្តរជាតិ សម្តេច ហេង សំរិន បានលើកឡើងថា «ថ្ងៃនេះជាខួបលើកទី៧២ នៃទិវាកុមារអន្តរជាតិហើយជារៀងរាល់ឆ្នាំកម្ពុជារួមនឹងដៃគូអភិវឌ្ឍន៍ជាតិនិងអន្តរជាតិ តែងប្រារព្ធពិធីមីទ្ទីងក្នុងទ្រង់ទ្រាយធំនៅគ្រប់កន្លែង ដើម្បីចូលរួមអបអរសាទរទិវាដ៏មានអត្ថន័យនេះ សំដៅជំរុញដល់ការអភិវឌ្ឍធនធានកុមារ ឱ្យក្លាយជាទំពាំងស្នងឫស្សី ប្រកបដោយសមត្ថភាព និងគុណភាព ប៉ុន្តែដោយសារវិបត្តិជាសកលនៃជំងឺរាតត្បាតកូវីដ-១៩ បានរារាំងមិនឱ្យយើងអាចប្រារព្ធពិធីជួបគ្នាដូចសព្វដងនោះទេ»។សម្តេចប្រធានរដ្ឋសភា បានបញ្ជាក់បន្ថែមទៀតថា« កម្ពុជាបានគោរពយ៉ាងខ្ជាប់ខ្ជួននូវរដ្ឋធម្មនុញ្ញ អនុសញ្ញាស្តីពីកុមារ និងច្បាប់អន្តរជាតិពាក់ព័ន្ធក្នុងការឆ្លើយតបទៅនឹងតម្រូវការរបស់កុមារ ពិសេសការលើកកម្ពស់សិទ្ធិសេរីភាព សេចក្តីថ្លៃថ្នូរ សមភាព និងសុវត្ថិភាពកុមារ ព្រមទាំងបានខិតខំទប់ស្កាត់ ប្រយុទ្ធប្រឆាំងរាល់អំពើហិង្សាការរំលោភបំពានគ្រប់រូបភាព និងការជួញដូរពលកម្មក្នុងគ្រប់ទម្រង់មកលើកុមារ»។យ៉ាងណាក៏ដោយសម្តេច ហេង សំរិន បានលើកឡើងផងដែរថា នៅក្នុងកាលៈទេសៈដែលកម្ពុជាកំពុងប្រឈមនឹងជំងឺកូវីដ-១៩នេះ សម្តេចប្រធានរដ្ឋសភាបានអំពាវនាវដល់មាតាបិតា អាណាព្យាបាល និងអ្នកពាក់ព័ន្ធទាំងអស់បន្តយកចិត្តទុកដាក់ មើលថែទាំកុមារឲ្យខ្លាំងក្លាមួយកម្រិតថែមទៀត ត្បិតអីពេលនេះពួកគេងាយនឹងប្រឈមបញ្ហាផ្សេងៗ ទាំងផ្លូវកាយនិងផ្លូវចិត្ត។ ការយកចិត្តទុកដាក់ ថែទាំ និងវិនិយោគលើកុមារនាថ្ងៃនេះ គឺដើម្បីអនាគតសង្គម និងប្រទេសជាតិយើងនាពេលអនាគត។សូមបញ្ជាក់ថា រាជរដ្ឋាភិបាលកម្ពុជា ជារៀងរាល់ឆ្នាំបានចូលរួមអបអរសាទរខួបទិវាកុមារអន្តរជាតិ ១មិថុនា និងទិវាពិភពលោកប្រឆាំងពលកម្មកុមារ១២មិថុនា និងទិវាកុមារផ្សេងៗទៀត ដែលជាសន្ធិសញ្ញារបស់អង្គការអន្តរជាតិបានចែង។ កម្ពុជាក្រោមការដឹកនាំរបស់សម្តេចតេជោ ហ៊ុន សែន បានលើកបង្ហាញនូវកិច្ចប្រឹងប្រែងជាច្រើនរបស់រាជរដ្ឋាភិបាលក្នុងការគាំពារ និងលើកកម្ពស់សិទ្ធិរបស់កុមារ។ ជាពិសេសសិទ្ធិទទួលបានការអប់រំ ដែលជាធាតុដ៏ចាំបាច់សម្រាប់ផ្តល់នូវចំណេះដឹង និងបង្កើតជាធនធានសម្រាប់សង្គមជាតិ។ជាងនេះទៅទៀត រាជរដ្ឋាភិបាលតែងតែយកចិត្តទុកដាក់ មានឆន្ទៈមោះមុត និងប្តេជ្ញាចិត្តខ្ពស់ក្នុងការលើកកម្ពស់សិទ្ធិកុមារ ហើយរាជរដ្ឋាភិបាលលើកទឹកចិត្តដល់ជនរួមជាតិជាពិសេសកុមារខ្លួនឯងផ្ទាល់ រួមគ្នាបន្តវិនិយោគកុមារនៅថ្ងៃនេះ នឹងបង្កើតបានធនធានមនុស្សដែលមានជំនាញប្រកបដោយសក្ដានុពលនាពេលអនាគត សំដៅធ្វើឱ្យសម្រេចបាននូវការអភិវឌ្ឍប្រកបដោយចីរភាពកម្ពុជាផងដែរ៕អត្ថបទ ៖ បាន ចក់

ខេត្តសៀមរាបរកឃើញពលរដ្ឋ ០៣នាក់ទៀតឆ្លងកូវីដ-១៩ ករណីឆ្លងសរុបក្នុងខេត្តនេះឡើងដល់១២១នាក់

សៀមរាប៖ រដ្ឋបាលខេត្តសៀមរាប បានប្រកាសថា រកឃើញពលរដ្ឋចំនួន ០៣នាក់បន្ថែមទៀតបានឆ្លងមេរោគកូវីដ-១៩នៅថ្ងៃនេះ ក្នុងនោះ មានពលរដ្ឋខ្មែរ ២នាក់ដែលទើបត្រឡប់មកពីប្រទេសថៃផងដែរ។ក្នុងសេចក្ដីប្រកាសព័ត៌មាននៅថ្ងៃនេះ រដ្ឋបាលខេត្តសៀមរាបបានបញ្ជាក់ថា ស្ត្រីម្នាក់អាយុ ៣២ឆ្នាំ ដែលមានអាសយដ្ឋាននៅស្រុកក្រឡាញ់ និងម្នាក់ទៀតមានលំនៅឋាននៅស្រុកពួក ត្រូវបានរកឃើញឆ្លងមេរោគកូវីដ-១៩នៅថ្ងៃនេះ បន្ទាប់ពីពួកគេវិលត្រឡប់មកពីប្រទេសថៃ។ចំណែកឯបុរសម្នាក់ទៀតអាយុ ៤៣ឆ្នាំ ដែលជាអ្នកភូមិទៅពីស្រុកស្ទោង ខេត្តកំពង់ធំនោះ ក៏ត្រូវបានរកឃើញឆ្លងមេរោគកូវីដ-១៩ផងដែរ។ទន្ទឹមគ្នានេះ រដ្ឋបាលខេត្តសៀមរាបក៏បានប្រកាសផងដែរថា អ្នកជំងឺកូវីដ-១៩ម្នាក់ទៀតជាស្ត្រីអាយុ ២៨ឆ្នាំ ត្រូវបានអនុញ្ញាតឱ្យវិលត្រឡប់ទៅផ្ទះសម្បែងវិញហើយនៅថ្ងៃនេះ បន្ទាប់ពីត្រូវបានព្យាបាលជាសះស្បើយ។គិតត្រឹមថ្ងៃនេះ ខេត្តសៀមរាបរកឃើញមនុស្ស ១២១នាក់បានឆ្លងកូវីដ-១៩នៅក្នុងខេត្តនេះ ក្នុងនោះអ្នកជំងឺកូវីដ-១៩ចំនួន ២នាក់បានស្លាប់បាត់បង់ជីវិត ហើយអ្នកជំងឺចំនួន ៦៧នាក់ទៀត ត្រូវបានព្យាបាលជាសះស្បើយ ខណៈអ្នកជំងឺចំនួន ៥៣នាក់ទៀត កំពុងស្ថិតក្រោមការព្យាបាលបន្តនៅឡើយ៕

ខេត្តព្រៃវែងរកឃើញពលរដ្ឋ ៦៥នាក់ទៀតឆ្លងកូវីដ-១៩ នាំឱ្យតួលេខសរុបនៅខេត្តនេះឡើងដល់ ៤៥៩នាក់ត្រឹមថ្ងៃនេះ

ព្រៃវែង៖ រដ្ឋបាលខេត្តព្រៃវែង បានប្រកាសថា មនុស្សរហូតដល់ ៦៥នាក់បន្ថែមទៀត ត្រូវបានរកឃើញឆ្លងមេរោគកូវីដ-១៩នៅថ្ងៃនេះ ដែលជាករណីព្រឹត្តិការណ៍សហគមន៍ ២០កុម្ភៈ និងករណីនាំចូលពីក្រៅប្រទេស។ក្នុងសេចក្ដីជូនដំណឹងនៅថ្ងៃនេះ រដ្ឋបាលខេត្តព្រៃវែងបញ្ជាក់ថា ករណីឆ្លងថ្មីទាំងនេះ ត្រូវបានរកឃើញលើស្ត្រីចំនួន ៥០នាក់ និងបុរស ៩នាក់។ចំណែកឯករណីឆ្លង ៦នាក់ទៀត រដ្ឋបាលខេត្តព្រៃវែងបញ្ជាក់ថា ត្រូវបានរកឃើញលើកុមារី ៣នាក់ និងកុមារ ៣នាក់ផងដែរ។រដ្ឋបាលខេត្តនេះ បានឱ្យដឹងថា មនុស្សរហូតដល់ ៤៥៩នាក់ហើយ ត្រូវបានរកឃើញឆ្លងមេរោគកូវីដ-១៩នៅក្នុងខេត្តព្រៃវែង ក្នុងនោះ អ្នកជំងឺកូវីដ-១៩ចំនួន ៥នាក់ បានស្លាប់បាត់បង់ជីវិត។គិតត្រឹមថ្ងៃនេះ អ្នកជំងឺសរុប ១៩៦នាក់ហើយ ត្រូវបានអនុញ្ញាតឱ្យចាកចេញពីមន្ទីរពេទ្យ ឬមណ្ឌលព្យាបាលជំងឺកូវីដ-១៩ បន្ទាប់ពីត្រូវបានព្យាបាលជាសះស្បើយ ខណៈអ្នកជំងឺចំនួន ២៥៨នាក់ទៀត កំពុងស្ថិតក្រោមការព្យាបាលបន្តនៅឡើយ៕

យុទ្ធនាការចាក់វ៉ាក់សាំង ១១១ថ្ងៃហើយ កម្ពុជាសម្រេចការចាក់វ៉ាក់សាំងជូនពលរដ្ឋបាន ២៦%នៃគោលដៅរាជរដ្ឋាភិបាល

ភ្នំពេញ៖ គណៈកម្មការចំពោះកិច្ចការចាក់វ៉ាក់សាងបង្ការជំងឺកូវីដ-១៩ បានឱ្យដឹងថា ប្រជាពលរដ្ឋដល់ទៅជាង ២លាន ៦២ម៉ឺននាក់ហើយ បានទទួលការចាក់វ៉ាក់សាំងនៅក្នុងយុទ្ធនាការចាក់វ៉ាក់សាំងទូទាំងប្រទេសជាង ១០០ថ្ងៃកន្លងមកនេះ។គណៈកម្មការចំពោះកិច្ចការចាក់វ៉ាក់សាំងបង្ការជំងឺកូវីដ-១៩ បានឱ្យដឹងបែបនេះនៅក្នុងរបាយការណ៍ប្រចាំថ្ងៃរបស់ខ្លួនទើបចេញនៅយប់នេះ។របាយការណ៍នោះ បានឱ្យដឹងថា ដំណើរការចាក់វ៉ាក់សាំងជូនប្រជាពលរដ្ឋទូទាំងប្រទេសម្រេចបាន ២៦.២៥ភាគរយនៃចំនួនប្រជាពលរដ្ឋ ១០លាននាក់ដែលរាជរដ្ឋាភិបាលកំណត់ចាក់វ៉ាក់សាំងនៅឆ្នាំនេះ។បើតាមរបាយការណ៍ដដែលនេះ ប្រជាពលរដ្ឋជាងជិត ២លាននាក់ហើយ បានទទួលវ៉ាក់សាំងទាំងពីរដូសរួចរាល់ហើយ។នៅក្នុងរយៈពេល ១១១ថ្ងៃកន្លងមកនេះ យុទ្ធនាការចាក់វ៉ាក់សាំងទូទាំងប្រទេស បានទទួលពលរដ្ឋស្ម័គ្រចិត្តចាក់វ៉ាក់សាំងដល់ទៅជាង ២លាន ៦៧ម៉ឺននាក់ ប៉ុន្តែ ប្រជាពលរដ្ឋជាង ៥ម៉ឺននាក់ មិនត្រូវបានអនុញ្ញាតឱ្យចាក់វ៉ាក់សាំងនោះឡើយដោយសារបញ្ហាសុខភាពរបស់ពួកគេ។កម្ពុជាបានចាប់ផ្ដើមយុទ្ធនាការចាក់វ៉ាក់សាំងជូនប្រជាពលរដ្ឋរបស់ខ្លួននៅទូទាំងប្រទេសដើម្បីបង្ការជំងឺកូវីដ-១៩ ចាប់តាំងពីថ្ងៃទី១០ ខែកុម្ភៈកន្លងមកនេះ ដោយដំណើរការបាន ១១១ថ្ងៃរួចមកហើយ៕

ប្រមុខរាជរដ្ឋាភិបាលកម្ពុជា ស្នើឡើងនូវទស្សនផ្ទាល់ខ្លួនចំនួន ០៦ចំណុច សម្រាប់រួមចំណែកដល់ការអភិវឌ្ឍបៃតង

ភ្នំពេញ៖ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានស្នើឡើងនូវទស្សនផ្ទាល់ខ្លួនចំនួន ៦ចំណុច ទៅមេដឹកនាំពិភពលោក ដើម្បីជំរុញការអភិវឌ្ឍបៃតង និងឈានទៅសម្រេចបានតាមគោលដៅសកលឆ្នាំ២០៣០ខាងមុខនេះ។ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបង្ហាញទស្សនៈផ្ទាល់ខ្លួនរបស់សម្ដេចទាំង ៦ចំណុចនេះ នៅក្នុងកិច្ចប្រជុំកំពូលលើកទី២ នៃវេទិកាភាពជាដៃគូសម្រាប់ការអភិវឌ្ឍបៃតង និងគោលដៅសកលឆ្នាំ២០៣០ ដែលត្រូវបានរៀបចំដោយប្រទេសកូរ៉េខាងត្បូងតាមរយៈប្រព័ន្ធអនឡាញនៅយប់នេះ។ក្នុងវេទិកានោះ សម្ដេចតេជោ ហ៊ុន សែន មានប្រសាសន៍ថា ការស្ដារឡើងវិញនូវការអភិវឌ្ឍបៃតងពីវិបត្តិជំងឺឆ្លងកូវីដ-១៩ មេដឹកនាំពិភពលោក គួរយកចិត្តទុកដាក់ជំរុញការបើកចំហពាណិជ្ជគម្មអន្តរជាតិឱ្យកាន់តែទូលំទូលាយ ដើម្បីជំរុញកំណើនពាណិជ្ជកម្ម និងសេដ្ឋកិច្ច។ប្រមុខរាជរដ្ឋាភិបាលកម្ពុជា ក៏បានលើកឡើងផងដែរនូវការពង្រឹង និងពង្រីកយន្តការសហប្រតិបត្តិការក្នុងតំបន់ និងអន្តរជាតិ ពាក់ព័ន្ធនឹងការអអភិវឌ្ឍប្រកបដោយចីរភាព និងការលើកកម្ពស់ការបញ្ច្រាបទស្សនទានបៃតងនៅក្នុងការអភិវឌ្ឍនៃវិស័យនានា។ដើម្បីជំរុញការអភិវឌ្ឍបៃតង សម្ដេចតេជោ ហ៊ុន សែន ក៏ឡើងផងដែរនូវយន្តការភាពជាដៃគូរវាងរដ្ឋ និងឯកជន ដែលសម្ដេចចាត់ទុកជាវិធីសាស្ត្រកៀរធរធនធានបន្ថែមសម្រាប់ធានាដល់សកម្មភាពទប់ស្កាត់ការប្រែប្រួលអាកាសធាតុ។សម្ដេចតេជោ ហ៊ុន សែន បានលើកឡើងផងដែរនូវការដាក់ចេញនូវគោលនយោបាយលើកទឹកចិត្ត ដើម្បីជំរុញវិស័យធុរកិច្ចឱ្យវិនិយោគលើធុរកិច្ចបៃតង ដូចជាបច្ចេកវិទ្យាបៃតង និងថាមពលកកើតឡើងវិញជាដើម។មេដឹកនាំកម្ពុជា បានបញ្ជាក់ថា ការអភិវឌ្ឍបៃតង ត្រូវការការជំរុញឱ្យមានការកសាងហេដ្ឋារចនាសម្ព័ន្ធបៃតង និងដោះស្រាយគម្លាតផ្នែកហេដ្ឋារចនាសម្ព័ន្ធមូលដ្ឋានតាមរយៈការលើកកម្ពស់ការវិនិយោគប្រកបដោយចីរភាព។ចំណែកឯចំណុចទី៦វិញ សម្ដេចតេជោ ហ៊ុន សែន បានលើកឡើងនូវការលើកកម្ពស់លទ្ធភាពកាត់បន្ថយ និងការបន្ស៊ាំខ្លួនទៅនឹងការប្រែប្រួលអាកាសធាតុតាមរយៈយន្តការអភិរក្សាធនធានធម្មជាតិ ការអភិវឌ្ឍទីក្រុង និងឧទ្យានបៃតង និងការអភិវឌ្ឍសមត្ថភាពស្ថាប័នខាងផ្នែកស្រាវជ្រាវ ដើម្បីឆ្លើយតបនឹងការប្រែប្រួលអាកាសធាតុ និងការគ្រប់គ្រងគ្រោះមហន្តរាយធម្មជាតិ៕

សម្តេចតេជោ ហ៊ុន សែន ឧបត្ថម្ភថវិកាជូនទៅខេត្តជាប់ព្រំដែនកម្ពុជា-ថៃ និងវៀតណាម ចំនួន ២៤ខេត្ត

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឧបត្ថម្ភថវិកាបន្ថែមចំនួន ៣៣៥០លានរៀល (៣,៣៥០,០០០,០០០រៀល) ជូនទៅបណ្តាខេត្តជាប់ព្រំដែនកម្ពុជា-ថៃ និងវៀតណាម ចំនួន ២៤ខេត្ត ដើម្បីរៀបចាំចាត់ចែងធ្វើចត្តាឡីស័ក ចាប់ពីថ្ងៃទី៣១ ខែឧសភា រហូតដល់ថ្ងៃទី៦ ខែមិថុនា ឆ្នាំ២០២១។ បើយោងតាមការបញ្ជាក់របស់លោកជំទាវ វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានក្រុមការងារប្រតិបត្តិការបច្ចេកទេស និងផ្គត់ផ្គង់នៃគណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ-១៩ ប្រាប់BTV ព័ត៌មាននាល្ងាចថ្ងៃទី៣១ ខែឧសភា ឆ្នាំ២០២១នេះថា ដោយទទួលបានការយកចិត្តទុកដាក់ខ្ពស់ពីសម្តេចតេជោ ហ៊ុន សែន និងទទួលបានការឧបត្ថម្ភថវិកាបន្ថែម ជូនបណ្តាខេត្តចំនួន២៤ ដូចខាងក្រោម១.ខេត្តបាត់ដំបង ទទួលបានថវិកា ៣២០លានរៀល២.ខេត្តបន្ទាយមានជ័យ ទទួលបានថវិកា ៣៣០លានរៀល៣.ខេត្តឧត្តរមានជ័យ ទទួលបានថវិកា ៧០លានរៀល៤.ខេត្តប៉ៃលិន ទទួលបានថវិកា ៩០លានរៀល៥.ខេត្តកោះកុង ទទួលបានថវិកា ១០លានរៀល៦.ខេត្តពោធិ៍សាត់ ទទួលបានថវិកា ២៨០លានរៀល៧.ខេត្តព្រះវិហារ ទទួលបានថវិកា ៤០លានរៀល៨.ខេត្តកណ្តាល ទទួលបានថវិកា ២០០លានរៀល៩.ខេត្តស្វាយរៀង ទទួលបានថវិកា ៤០លានរៀល១០.ខេត្តព្រៃវែង ទទួលបានថវិកា ៥០០លានរៀល១១.ខេត្តត្បូងឃ្មុំ ទទួលបានថវិកា ១០០លានរៀល១២.ខេត្តក្រចេះ ទទួលបានថវិកា ៣០លានរៀល១៣.ខេត្តរតនគិរី ទទួលបានថវិកា ១០លានរៀល១៤.ខេត្តមណ្ឌលគិរី ទទួលបានថវិកា ១០លានរៀល១៥.ខេត្តកំពត ទទួលបានថវិកា ២០លានរៀល១៦.ខេត្តតាកែវ ទទួលបានថវិកា ៧០លានរៀល១៧.ខេត្តកំពង់ចាម ទទួលបានថវិកា ៥៥០លានរៀល១៨.ខេត្តកំពង់ឆ្នាំង ទទួលបានថវិកា ៨០លានរៀល១៩.ខេត្តកែប ទទួលបានថវិកា ១០លានរៀល២០.ខេត្តកំពង់ស្ពឺ ទទួលបានថវិកា ៣០០លានរៀល២១.ខេត្តកំពង់ធំ ទទួលបានថវិកា ១៥០លានរៀល២២.ខេត្តស្ទឹងត្រែង ទទួលបានថវិកា ១០លានរៀល២៣.ខេត្តព្រះសីហនុ ទទួលបានថវិកា ៦០លានរៀល២៤.ខេត្តសៀមរាប ទទួលបានថវិកា ៧០លានរៀល។ ដោយឡែកសម្រាប់ខេត្តជាប់ព្រំដែនកម្ពុជា-ថៃ-វៀតណាម ទាំង២៤ខេត្តនេះ មានអ្នកកំពុងធ្វើចត្តាឡីស័ក ចំនួនសរុប ៨១៥២៦នាក់៕ អត្ថបទ៖ រដ្ឋា

បណ្ដាញសង្គម

ព័ត៌មានថ្មីៗ

សម្ដេចធិបតី ហ៊ុន ម៉ាណែត ថ្លែងអំណរគុណដល់បងប្អូនមហាគ្រួសារខ្មែរ ដែលបានជួបជុំគ្នាជាលើកទីពីរ ជាសារលើកទឹកចិត្តដ៏ធំធេងទៅដល់វីរកងទ័ពជួរមុខ

ប្រតិភូគណៈចលនាសាសនិកឥស្លាមកម្ពុជា នាំយកអំណោយឧបត្ថម្ភជូនកងកម្លាំងជួរមុខ ដែលកំពុងឈរជើងការពារព្រំដែន ខេត្តព្រះវិហារ

ឯកឧត្តម ឌិត ទីណា អញ្ជើញបើកកិច្ចប្រជុំបូកសរុបសកម្មភាព និងលទ្ធផលការងារមូលដ្ឋានខេត្តបន្ទាយមានជ័យ

កូនប្រុសពៅសម្ដេចធិបតី ហ៊ុន ម៉ាណែត ទទួលបានមេដាយមាសសិស្សឆ្នើម លើការប្រកួតគណិតវិទ្យាអន្តរជាតិ ចំណាត់ថ្នាក់លេខមួយ ៣ឆ្នាំជាប់គ្នា

ក្រុមការងារគ្រូពេទ្យស្ម័គ្រចិត្តឯកឧត្តម ហ៊ុន ម៉ានី បន្តចុះពិនិត្យ ព្យាបាលជំងឺ ជូនប្រជាពលរដ្ឋដោយឥតគិតថ្លៃ នៅឃុំតាសាល ស្រុកឱរ៉ាល់ ខេត្តកំពង់ស្ពឺ

ចិនប្តេជ្ញាចាត់វិធានការកាន់តែតឹងរ៉ឹង ប្រឆាំងនឹងការរត់ពន្ធរ៉ែយុទ្ធសាស្ត្រ

មន្ត្រីជាន់ខ្ពស់ក្រសួងធម្មការនិងសាសនាណែនាំដល់យុវជនត្រូវធ្វើអំពើល្អនិងខិតខំរៀនសូត្រដើម្បីបន្តការពារនិងអភិវឌ្ឍន៍ជាតិ

លោក Zelenskyy៖ រុស្ស៊ីបាញ់មីស៊ីលជាង ៣០គ្រាប់ និងយានដ្រូន ៣០០គ្រឿង អំឡុងការវាយប្រហារលើអ៊ុយក្រែន

មនុស្សយ៉ាងតិច ១៩នាក់ រងរបួសដោយសារការផ្ទុះកាំជ្រួចនៅកន្លែងតាំងពិព័រណ៍ ភាគខាងលិចអាល្លឺម៉ង់

កុងហ្គោ និងក្រុមឧទ្ទាម M23 ចុះហត្ថលេខាលើកិច្ចព្រមព្រៀងឈប់បាញ់ នៅកាតា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

រយៈពេល១ខែនៃខែឧសភា កម្ពុជារកឃើញនិងរឹងអូសអាល់កុលក្លែងក្លាយជាង ៥៣តោន

បារាំង សន្យាផ្តល់ហិរញ្ញប្បទានដល់កម្ពុជាពី១០០ ទៅ១២០លានអ៊ឺរ៉ូក្នុងមួយឆ្នាំ

មកដល់ពេលនេះភ្នំពេញ មិនត្រូវបានប្រកាសបិទឡើងវិញនោះទេ

សម្តេចតេជោ អំពាវនាវដល់គ្រប់ក្រសួង ស្ថាប័ន អាជ្ញាធរមានសមត្ថកិច្ចត្រូវបង្កើនសិទ្ធិអំណាចកុមារ

ខេត្តសៀមរាបរកឃើញពលរដ្ឋ ០៣នាក់ទៀតឆ្លងកូវីដ-១៩ ករណីឆ្លងសរុបក្នុងខេត្តនេះឡើងដល់១២១នាក់

ខេត្តព្រៃវែងរកឃើញពលរដ្ឋ ៦៥នាក់ទៀតឆ្លងកូវីដ-១៩ នាំឱ្យតួលេខសរុបនៅខេត្តនេះឡើងដល់ ៤៥៩នាក់ត្រឹមថ្ងៃនេះ

យុទ្ធនាការចាក់វ៉ាក់សាំង ១១១ថ្ងៃហើយ កម្ពុជាសម្រេចការចាក់វ៉ាក់សាំងជូនពលរដ្ឋបាន ២៦%នៃគោលដៅរាជរដ្ឋាភិបាល

ប្រមុខរាជរដ្ឋាភិបាលកម្ពុជា ស្នើឡើងនូវទស្សនផ្ទាល់ខ្លួនចំនួន ០៦ចំណុច សម្រាប់រួមចំណែកដល់ការអភិវឌ្ឍបៃតង

សម្តេចតេជោ ហ៊ុន សែន ឧបត្ថម្ភថវិកាជូនទៅខេត្តជាប់ព្រំដែនកម្ពុជា-ថៃ និងវៀតណាម ចំនួន ២៤ខេត្ត

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

រយៈពេល​១​ខែ​នៃ​ខែឧសភា កម្ពុជា​រកឃើញ​និង​រឹង​អូស​អាល់កុល​ក្លែងក្លាយ​ជាង ៥៣​តោន​

បារាំង​ សន្យា​ផ្តល់​ហិរញ្ញប្បទាន​ដល់​កម្ពុជា​ពី​១០០​ ទៅ​១២០​លាន​អ៊ឺ​រ៉ូ​ក្នុង​មួយឆ្នាំ

មកដល់ពេលនេះ​ភ្នំពេញ​ មិនត្រូវ​បានប្រកាស​បិទ​ឡើងវិញ​នោះទេ​

សម្តេច​តេ​ជោ អំពាវនាវ​ដល់​គ្រប់​ក្រសួង ស្ថាប័ន អាជ្ញា​ធរមាន​សមត្ថកិច្ច​ត្រូវ​បង្កើន​សិទ្ធិអំណាច​កុមារ

ខេត្ត​សៀមរាប​រក​ឃើញ​ពលរដ្ឋ​ ០៣​នាក់​ទៀត​ឆ្លង​កូវីដ-១៩ ករណី​ឆ្លង​សរុប​ក្នុង​ខេត្ត​នេះ​ឡើង​ដល់​១២១​នាក់

សម្តេច​តេ​ជោ ហ៊ុន សែន ឧបត្ថម្ភ​ថវិកា​ជូន​ទៅ​ខេត្ត​ជាប់​ព្រំដែន​កម្ពុជា​-​ថៃ និង​វៀតណាម ចំនួន ​២៤​ខេត្ត​

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍

រយៈពេល១ខែនៃខែឧសភា កម្ពុជារកឃើញនិងរឹងអូសអាល់កុលក្លែងក្លាយជាង ៥៣តោន

បារាំង សន្យាផ្តល់ហិរញ្ញប្បទានដល់កម្ពុជាពី១០០ ទៅ១២០លានអ៊ឺរ៉ូក្នុងមួយឆ្នាំ

មកដល់ពេលនេះភ្នំពេញ មិនត្រូវបានប្រកាសបិទឡើងវិញនោះទេ

សម្តេចតេជោ អំពាវនាវដល់គ្រប់ក្រសួង ស្ថាប័ន អាជ្ញាធរមានសមត្ថកិច្ចត្រូវបង្កើនសិទ្ធិអំណាចកុមារ

ខេត្តសៀមរាបរកឃើញពលរដ្ឋ ០៣នាក់ទៀតឆ្លងកូវីដ-១៩ ករណីឆ្លងសរុបក្នុងខេត្តនេះឡើងដល់១២១នាក់

សម្តេចតេជោ ហ៊ុន សែន ឧបត្ថម្ភថវិកាជូនទៅខេត្តជាប់ព្រំដែនកម្ពុជា-ថៃ និងវៀតណាម ចំនួន ២៤ខេត្ត