BTV NEWS

ស្ពានមិត្តភាពកម្ពុជា-ចិន មេគង្គក្រចេះ នឹងបើកជូនពលរដ្ឋឆ្លងកាត់ចាប់ពីថ្ងៃទី១មេសា ឆ្នាំ២០២៦តទៅ

សម្តេចតេជោ ហ៊ុន សែន ដឹកនាំកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដើម្បីសម្រេចលើរបៀបវារៈចំនួន៧

បេក្ខជន និងសកម្មជនគណបក្សភ្លើងទៀនចំនួន៤នាក់នៅស្រុកកណ្តាលស្ទឹង ចូលរួមជីវភាពនយោបាយ ជាមួយគណបក្សប្រជាជនកម្ពុជា

ស្ថានីយប្រព្រឹត្តកម្មទឹកកខ្វក់ក្រុងកំពង់ឆ្នាំងតម្លៃជាង ១៩លានដុល្លារ ត្រូវបានសម្ពោធដាក់ឲ្យប្រើប្រាស់ជាផ្លូវការនៅថ្ងៃនេះ

នយោបាយ និង ការអភិវឌ្ឍន៍

លោក Trump ឈ្នះរឿងក្ដីដកឈ្មោះចេញពីសន្លឹកឆ្នោតរដ្ឋ Colorado នៅតុលាការកំពូលអាមេរិក

តុលាការកំពូលរបស់សហរដ្ឋអាមេរិក បានប្រគល់ជ័យជម្នះដ៏ធំមួយដល់លោក ដូណាល់ ត្រាំ (Donald Trump) កាលពីថ្ងៃចន្ទ (០៤ មីនា) ដោយរារាំងរដ្ឋនានាពីការដកសិទ្ធិបេក្ខជនការិយាល័យសហព័ន្ធ ក្រោមបទប្បញ្ញត្តិធម្មនុញ្ញពាក់ព័ន្ធនឹងការបះបោរ និងច្រានចោលការដកឈ្មោះលោក ត្រាំ ចេញពីសន្លឹកឆ្នោតរដ្ឋ ខូឡូរ៉ាដូ (Colorado)។ក្រុមយុត្តិធម៌បានបដិសេធជាឯកច្ឆ័ន្ទលើការសម្រេចកាលពីថ្ងៃទី១៩ ខែធ្នូ ដោយតុលាការកំពូលនៃរដ្ឋ ខូឡូរ៉ាដូ ក្នុងការដកឈ្មោះអតីតប្រធានាធិបតីរូបនេះចេញពីសន្លឹកឆ្នោតនៃការបោះឆ្នោតបឋមរបស់បក្សសាធារណរដ្ឋនៅថ្ងៃអង្គារ (០៦ មីនា) បន្ទាប់ពីរដ្ឋនេះបានរកឃើញថាវិសោធនកម្មទី១៤ នៃរដ្ឋធម្មនុញ្ញអាមេរិក បានដកសិទ្ធិលោកពីការកាន់តំណែងសាធារណៈម្តងទៀត។ក្រុមយុត្តិធម៌បានកំណត់ថាមានតែសភាប៉ុណ្ណោះដែលអាចអនុវត្តបទប្បញ្ញត្តិរដ្ឋធម្មនុញ្ញប្រឆាំងនឹងអ្នកកាន់តំណែងសហព័ន្ធ និងបេក្ខជន។ សេចក្តីសម្រេចនេះត្រូវបានដាក់ចេញនៅមុនថ្ងៃ ស៊ុបភើ ធ្យូសដេ (Super Tuesday) ដែលជាថ្ងៃបោះឆ្នោតបឋមដ៏ធំរបស់បេក្ខជនប្រធានាធិបតីអាមេរិក ខណៈរដ្ឋភាគច្រើនធ្វើការប្រកួតប្រជែងជ្រើសរើសតាមគណបក្ស។ជ័យជម្នះលើរឿងក្ដីរបស់លោក ត្រាំ នេះបានកើតឡើងរយៈពេលប្រាំថ្ងៃបន្ទាប់ពីក្រុមយុត្តិធម៌បានយល់ព្រមសម្រេចលើការទាមទារអភ័យឯកសិទ្ធិរបស់លោក ត្រាំ ពីការកាត់ទោសលើការចោទប្រកាន់ទាក់ទងនឹងការព្យាយាមបង្វែរលទ្ធផលឆ្នោតឆ្នាំ២០២០ ដែលលោកប្រធានាធិបតី ចូ បៃដិន បានទទួលជ័យជម្នះ ៕

បេសកជនពិសេសអាមេរិក៖សង្គ្រាមនៅព្រំដែនលីបង់ និងអ៊ីស្រាអែល នឹងមិនអាចទប់ស្កាត់បានទេ

បេសកជនពិសេសអាមេរិក លោក Amos Hochstein បាននិយាយកាលពីថ្ងៃចន្ទថា បទឈប់បាញ់នៅ តំបន់ហ្កាហ្សា នឹងមិននាំឲ្យមានការបញ្ចប់ដោយស្វ័យប្រវត្តិចំពោះអរិភាពនៅទូទាំងព្រំដែន ភាគខាងត្បូងនៃប្រទេសលីបង់ ហើយលោកបានព្រមានអំពីហានិភ័យពីការកើនឡើងនៃជម្លោះនេះ។លោក Hochstein កំពុងបំពេញទស្សនកិច្ចនៅទីក្រុងបេរូត ( Beirut) ជាផ្នែកនៃកិច្ចខិតខំប្រឹងប្រែងការទូត ដើម្បីបញ្ចប់ការបាញ់ប្រហារគ្នារយៈពេល៤ ខែរវាងក្រុមហេបូឡា និងអ៊ីស្រាអែល ដែលបានកើតឡើងស្របគ្នានឹងសង្រ្គាមហ្កាហ្សា។នេះគឺជាជម្លោះដ៏អាក្រក់បំផុតនៅទូទាំងព្រំដែនភាគខាងត្បូងនៃប្រទេសលីបង់ ចាប់តាំងពីសង្រ្គាមឆ្នាំ ២០០៦ ដែលបង្កឲ្យមានការភ័យខ្លាចនៃការប្រឈមមុខដាក់គ្នា កាន់តែធំឡើង។លោកបានប្រាប់អ្នកយកព័ត៌មាន បន្ទាប់ពីជួបជាមួយប្រធានសភានៃប្រទេសលីបង់ Nabih Berri ដែលស្និទ្ធនឹងហេសបូឡាថា៖«ការកើនឡើងនៃអំពើហិង្សា គឺគ្មានផលប្រយោជន៍របស់នរណាម្នាក់ឡើយ ហើយមិនមានអ្វីជាសង្គ្រាមមានដែនកំណត់ទេ»។លោក Hochstein បានបញ្ជាក់ថា ការប៉ះទង្គិចគ្នានៅតាមព្រំដែន បានកើនឡើងក្នុងប៉ុន្មានសប្តាហ៍ថ្មីៗនេះ។លោកបានបន្ថែមថា៖«បទឈប់បាញ់បណ្តោះអាសន្ន គឺមិនគ្រប់គ្រាន់ទេ។ សង្គ្រាមមានដែនកំណត់ គឺមិនអាចទប់ស្កាត់បានទេ»។អនុប្រធានសភាលីបង់ លោក Elias Bou Saab បានប្រាប់សារព័ត៌មានរ៉យទ័រថា លោកជឿថា ពេលវេលានៃដំណើរទស្សនកិច្ចរបស់លោក Hochstein បានបង្ហាញពីវឌ្ឍនភាពក្នុងកិច្ចខិតខំប្រឹងប្រែងជុំវិញបទឈប់បាញ់ហ្កាហ្សា។

គណបក្សប្រជាជនកម្ពុជា ប្រកាសទទួលយកលទ្ធផលផ្លូវការ នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥

គណបក្សប្រជាជនកម្ពុជានៅថ្ងៃទី៥ ខែមីនា ឆ្នាំ២០២៤នេះ បានចេញសេចក្តីថ្លែងការណ៍ ប្រកាសជាឱឡារិក ដោយគោរព និងទទួលយកលទ្ធផលនៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែលគណៈកម្មាធិការជាតិរៀបចំការបោះឆ្នោតបានប្រកាសនៅថ្ងៃទី៥ ខែមីនានេះ។គណបក្សប្រជាជនកម្ពុជា បានចាត់ទុកថា ការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ កាលពីថ្ងៃទី ២៥ ខែកុម្ភៈ ឆ្នាំ ២០២៤ បានប្រព្រឹត្តទៅស្របតាមរដ្ឋធម្មនុញ្ញនៃព្រះរាជាណាចក្រកម្ពុជា នៅក្នុងបរិយាកាសនយោបាយប្រកបដោយលក្ខណៈសេរី មានសន្តិសុខ សុវត្ថិភាព សណ្តាប់ធ្នាប់ល្អ គ្មានអំពើហិង្សា និងការគំរាមកំហែង ដែលបានធានានូវលក្ខណៈសេរី ត្រឹមត្រូវ និងយុត្តិធម៌នៃការបោះឆ្នោត។ គណបក្សប្រជាជនកម្ពុជាលើកឡើងថា គ្រប់គណបក្សនយោបាយដែលបានចុះបញ្ជី គណបក្សឈរឈ្មោះបោះឆ្នោត និងចុះបញ្ជីបេក្ខជនឈរឈ្មោះ សុទ្ធតែបានធ្វើសកម្មភាពដោយសេរី ហើយអ្នកបោះឆ្នោតគ្រប់រូបបានអនុវត្តយ៉ាងពេញលេញនូវសិទ្ធិសម្រេចចិត្តរបស់ខ្លួនក្នុងការបោះឆ្នោតនេះ ស្របតាមរដ្ឋធម្មនុញ្ញ និងច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា។ តាមរយៈព្រឹត្តិការណ៍ជាប្រវត្តិសាស្ត្រដ៏មានសារៈសំខាន់នេះ បានឆ្លុះបញ្ចាំងឱ្យឃើញច្បាស់ថា លទ្ធិប្រជាធិបតេយ្យនៅកម្ពុជាមានភាពចាស់ទុំ ហើយកាន់តែត្រូវបានពង្រឹងឡើងតាមគន្លងនីតិរដ្ឋ ក្នុងបរិការណ៍ដែលព្រះរាជាណាចក្រកម្ពុជាមានសន្តិភាព និងឯកភាពជាតិពេញលេញ ប្រជាជនកំពុងរស់នៅយ៉ាងសុខដុមរមនា និងសម្រេចបានសមិទ្ធផលថ្មីៗទៀត ក្នុងការអភិវឌ្ឍសង្គមជាតិ។គណបក្សប្រជាជនកម្ពុជា ប្រកាសជាឱឡារិកនូវការគោរព និងទទួលយកលទ្ធផលផ្លូវការនៃការ បោះឆ្នោតជ្រើសតាំងសមាជិកព្រឹទ្ធសភា នីតិកាលទី៥ ដែល គ.ជ.ប បានប្រកាសនៅថ្ងៃទី៥ ខែមីនា ឆ្នាំ២០២៤នេះ។ លទ្ធផលនៃការបោះឆ្នោតនេះពិតជាបានឆ្លុះបញ្ចាំងទាំងស្រុងនូវឆន្ទៈដ៏ថ្លៃថ្លា និងមោះមុតរបស់ប្រជាជនកម្ពុជានៅទូទាំងប្រទេសក្នុងការថែរក្សាសន្តិភាព និងបន្តជំរុញការ អភិវឌ្ឍសេដ្ឋកិច្ច សង្គម ដើម្បីលើកស្ទួយជីវភាពរបស់ខ្លួន៕

ប្រភពទួរគី អះអាងថា លោកអេរដូហ្គែន និង លោកអាបាស គ្រោងនឹងពិភាក្សាគ្នាអំពីការផ្តល់ជំនួយដល់តំបន់ហ្កាហ្សា

ប្រភពការទូតទួរគី បាននិយាយកាលពីថ្ងៃចន្ទថា លោកប្រធានាធិបតី តាយីប អេរដូហ្គែន (TAYYIP ERDOGAN) គ្រោងនឹងពិភាក្សាអំពីកិច្ចខិតខំប្រឹងប្រែងរបស់ប្រទេសទួរគីក្នុងការផ្តល់ជំនួយមនុស្សធម៌ទៅកាន់តំបន់ហ្កាហ្សាជាមួយប្រធានអាជ្ញាធរប៉ាឡេស្ទីន លោក ម៉ាខ្មូដ អាបាស (MAHMOUD ABBAS) ក្នុងអំឡុងពេលកិច្ចពិភាក្សានៅទីក្រុងអង់ការ៉ា ក្នុងសប្តាហ៍នេះ។ថ្លែងនៅក្នុងវេទិកាការទូតនៅប្រទេសទួរគីកាលពីចុងសប្តាហ៍ រដ្ឋមន្ត្រីការបរទេសរបស់អាជ្ញាធរប៉ាឡេស្ទីន លោក រីយ៉ាដ អាល់ ម៉ាលីគី (RIYAD-AL MALIKI) បានបញ្ជាក់ថា លោកអាបាស នឹងទៅបំពេញទស្សនកិច្ចនៅទីក្រុងអង់ការ៉ា នៅថ្ងៃអង្គារនេះ និងជួបលោកអេរដូហ្គែន។ប្រទេសទួរគី ដែលបានរិះគន់អ៊ីស្រាអែលយ៉ាងខ្លាំងចំពោះការវាយប្រហាររបស់ខ្លួនលើតំបន់ហ្កាហ្សា និងបានគាំទ្រវិធានការដើម្បីឲ្យមានការកាត់ទោសអំពើប្រល័យពូជសាសន៍ នៅតុលាការពិភពលោកនោះ បានអំពាវនាវម្តងហើយម្តងទៀតឲ្យមានបទឈប់បាញ់។ ប៉ុន្តែទីក្រុងអង់ការ៉ា មិនមានការចូលរួមផ្ទាល់ ក្នុងការចរចាបទឈប់បាញ់ទេ។មិនដូចសម្ព័ន្ធមិត្តលោកខាងលិច និងប្រទេសឈូងសមុទ្រមួយចំនួនទេ សមាជិកណាតូទួរគី មិនចាត់ទុកក្រុមហាម៉ាស ដែលជាក្រុមសកម្មប្រយុទ្ធប៉ាឡេស្ទីន ដែលគ្រប់គ្រងតំបន់ហ្កាហ្សា ហើយកាលពីថ្ងៃទី៧ ខែតុលា បានធ្វើការវាយប្រហារមួយនៅក្នុងទឹកដីអ៊ីស្រាអែល ដែលជំរុញឲ្យមានយុទ្ធនាការអ៊ីស្រាអែល ក្នុងនាមជាអង្គការភេរវកម្ម។ប្រភពការទូត បាននិយាយថា លោកអេរដូហ្គែន និង លោកអាបាស នឹងពិភាក្សាអំពីការវិវឌ្ឍថ្មីៗ នៅក្នុងតំបន់ហ្កាហ្សា ក៏ដូចជាស្ថានភាព នៅតំបន់វេសបែង (WEST BANK)។

ហ្វីលីពីន នឹងប្រឆាំងចិន ប្រសិនបើផលប្រយោជន៍ដែនសមុទ្រ មិនទទួលបានការយកចិត្តទុកដាក់

លោកប្រធានាធិបតីហ្វីលីពីន ហ្វើឌីណាន ម៉ាកូស ជូនៀរ (Ferdinand Marcos Jr) បាននិយាយកាលពីថ្ងៃចន្ទ ទី៤ ខែមីនា ថា ហ្វីលីពីន នឹងសហការជាមួយចិនក្នុងកិច្ចចរចាស្តីពីជម្លោះសមុទ្រចិនខាងត្បូង ប៉ុន្តែនឹងរុញបកទៅចិនវិញ នៅពេលអធិបតេយ្យភាព និងសិទ្ធិដែនសមុទ្ររបស់ខ្លួនមិនត្រូវបានអើពើទេនោះ។ថ្លែងនៅឯវេទិកាវិទ្យាស្ថាន Lowy ក្នុងដំណើរបំពេញទស្សនកិច្ចទៅកាន់ប្រទេសអូស្ត្រាលី លោក Marcos បាននិយាយថា លោកបានប្តេជ្ញាចិត្តក្នុងការធ្វើការជាមួយបណ្តាប្រទេសអាស៊ីអាគ្នេយ៍ និងប្រទេសចិនសម្រាប់ក្រមប្រតិបត្តិ (COC) ដែលបានពន្យារពេលជាយូរមកហើយនៅសមុទ្រចិនខាងត្បូង ស្របតាមច្បាប់អន្តរជាតិ។ លោកប្រធានាធិបតីហ្វីលីពីន រូបនេះ បាននិយាយ ខណៈលោកបានបញ្ជាក់ជាថ្មីថារូបលោកនឹងមិនប្រគល់ទឹកដីហ្វីលីពីនណាមួយទៅឲ្យមហាអំណាចបរទេសនោះទេ ថា កិច្ចខិតខំប្រឹងប្រែងទាំងនេះមិនត្រូវបានអនុវត្តដោយខ្វះចន្លោះនោះទេ។ បរិយាកាសអំណោយផលជាទីដែលភាពតានតឹងត្រូវបានគ្រប់គ្រងប្រកបដោយប្រសិទ្ធភាពគឺ មានសារៈសំខាន់ចំពោះភាពជោគជ័យនៃការចរចាសម្រាប់ក្រមប្រតិបត្តិ ។ ទំនាក់ទំនងរវាងប្រទេសជិតខាងហ្វីលីពីន និងចិន បានធ្លាក់ដុនដាបខ្លាំងភ្លាមៗបន្ទាប់ពីលោក Marcos ឡើងកាន់តំណែងកាលពីឆ្នាំ ២០២២ ចំពេលដែលជម្លោះ បានផ្ទុះឡើងម្តងហើយម្តងទៀតជុំវិញការអះអាងសិទ្ធិគ្រប់គ្រងតំបន់ដែនទឹកថ្មប៉ប្រះទឹក នៅសមុទ្រចិនខាងត្បូង នៅពេលដែលទីក្រុងម៉ានីល បានបង្កើតទំនាក់ទំនងការពារជាតិកាន់តែជិតស្និទ្ធជាមួយសហរដ្ឋអាមេរិក។ លោក Marcos បាននិយាយថាសម្ព័ន្ធភាពរបស់ហ្វីលីពីនជាមួយសហរដ្ឋអាមេរិកត្រូវបានបង្កើតដោយជម្រើសរបស់យើងផ្ទាល់ ហើយយើងបន្តពង្រឹងទំនាក់ទំនងនេះដោយជម្រើសរបស់យើងផ្ទាល់ដែរ៕

កិច្ចប្រជុំកំពូលអាស៊ាន៖ រដ្ឋមន្ត្រីការបរទេសអូស្ត្រាលីព្រមានពីជម្លោះដ៏ធំជាមួយប្រទេសចិន

រដ្ឋមន្ត្រីការបរទេសអូស្ត្រាលី លោកស្រី ផេននី វង្ស (Penny Wong) បានព្រមានខ្លាំងៗអំពីការកើនឡើងភាពប្រឈមនៃជម្លោះនៅក្នុងសមុទ្រចិនខាងត្បូង និងច្រកសមុទ្រតៃវ៉ាន់ លុះត្រាតែតំបន់នេះ ដើរតាមការទូត និងការការពារស្របច្បាប់ថ្មី។ការថ្លែងបែបនេះរបស់លោកស្រីកើតមាននៅថ្ងៃពិពីបើកកិច្ចប្រជុំអាស៊ានក្នុងទីក្រុង Melbourneនៅពេលលោកនាយរដ្ឋមន្ត្រី អង់តូនី អាល់បានី (Anthony Albanese) ទទួលស្វាគមន៍ក្រុមមរដឹកនាំអាស៊ី-អាគ្នេយ៍ ។ខណៈរបៀបវារៈនៃកិច្ចប្រជុំកំពូលនឹងផ្ដោតសំខាន់លើបញ្ហាសេដ្ឋកិច្ច អូស្ត្រាលី ក៏បារម្ភផងដែរអំពីបញ្ហាសន្តិសុខ ដូចជា សកម្មភាពយោធារបស់ប្រទេសចិន នៅក្នុងសមុទ្រចិនខាងត្បូងជាដើម ។ លោកស្រី វង្ស និយាយថាយើងបានដឹងថាជម្លោះដ៏ធំនៅក្នុងតំបន់របស់យើង នឹងបង្កគ្រោះមហន្តរាយដល់សហគមន៍ និងសេដ្ឋកិច្ច របស់យើង ខណៈមានជម្លោះដ៏ធ្ងន់ធ្ងររ៉ាំរ៉ៃ នៅក្នុបតំបន់ហ្កាហ្សា និងអ៊ុយក្រែន ។ភាពតានតឹងបានកើតឡើងនៅក្នុងសមុទ្រចិនខាងត្បូង រវាងប្រទេសចិន និងប្រទេសផ្សេងទៀតដូចជា ប្រទេសហ្វីលីពីន និងវៀតណាម។ ប្រទេសចិន បានសាងសង់មូលដ្ឋានយោធានៅលើកោះសិប្បនិម្មិតនៅក្នុងសមុទ្រនេះ។លោកស្រី បានព្រមានពីភាពប្រឈមកាន់តែធ្ងន់ធ្ងរនៃជម្លោះ ប៉ុន្តែពុំបានសំដៅដោយផ្ទាល់លើប្រទេសចិនទេ។ លោកស្រីបញ្ជាក់ថាយើងបានមើលឃើញការអះអាង និងសកម្មភាពដែលមិនសមស្របទៅនឹងច្បាប់អន្តរជាតិ ពិសេស អនុសញ្ញាស្ដីពីច្បាប់ដែនសមុទ្ររបស់អង្គការសហប្រជាជាតិ ដែលជាបទបញ្ជាស្របច្បាប់សម្រាប់សមុទ្រនិងមហាសមុទ្រ។យើងប្រឈមនឹងអស្ថិរភាព ការបង្កជម្លោះ និងសកម្មភពបង្ខិតបង្ខំ រួមទាំងការធ្វើនាវាចរណ៍នៅសមុទ្រនិងអាកាស ដែលគ្មានសុវត្ថិភាព៕

ពលរដ្ឋមានបណ្ណសមធម៌ អរគុណដល់រដ្ឋាភិបាល ចំពោះការព្យាបាលដោយពុំគិតថ្លៃនៅតាមមន្ទីរពេទ្យរដ្ឋ

នៅព្រឹកថ្ងៃទី៤មីនាឆ្នាំ២០២៤នេះ ប្រជាពលរដ្ឋក្នុងខេត្តឧត្តរមានជ័យ ដែលមានបណ្ណសមធម៌ បានសម្តែងនូវការអរគុណចំពោះរាជរដ្ឋាភិបាលកម្ពុជា សម្រាប់ការមកទទួលសេវាពិនិត្យព្យាបាលជំងឺផ្សេងៗ នៅតាមមន្ទីររដ្ឋ ក៏ដូចជានៅតាមមណ្ឌលសុខភាព ក្នុងមូលដ្ឋាននានា ដោយពុំអស់ថ្លៃសេវាពិនិត្យព្យាបាលជំងឺ និងមានការយកចិត្តទុកដាក់គិតគូរខ្ពស់ ពីក្រុមគ្រូពេទ្យ ក្នុងការពិនិត្យព្យាបាលជំងឺដល់ពួកគាត់បានល្អប្រសើរផងដែរ។លោក ពូ សំ ដែលមកទទួលសេវាពិនិត្យព្យាបាលជំងឺនៅមន្ទីរបង្អែកខេត្តឧត្តរមានជ័យ បានសំម្តែងនូវក្តីសប្បាយរីករាយ និងអរគុណចំពោះរាជរដ្ឋាភិបាលកម្ពុជា ដែលបានផ្តល់បណ្ណសមធម៌ដល់រូបគាត់ដែលមានជីវភាពមកពីគ្រួសារក្រីក្ររួមទាំងពលរដ្ឋដទៃទៀត បានមកទទួលសេវាពិនិត្យព្យាលបាលជំងឺនៅមន្ទីរពេទ្យរដ្ឋដោយពុំអស់ថ្លៃសេវាអ្វីទាំងអស់។លោក បានឲ្យដឹងថា អស់រយៈពេលជិត២០ឆ្នាំមកហើយដែលរូបគាត់ពុំធ្លាប់បានមកពិនិត្យព្យាបាលជំងឺនៅមន្ទីររដ្ឋ ធ្លាប់តែពិនិត្យនៅតាមមណ្ឌលសុខភាព ក្នុងមូលដ្ឋានរបស់គាត់ បច្ចុប្បន្នមន្ទីរពេទ្យរដ្ឋក្នុងខេត្តឧត្តរមានជ័យ មានអគារថ្មីស្រស់ស្អាតប្រកបដោយបរិស្ថានល្អ និងមានឧបករណ៍បំពាក់ដោយគ្រឿងវេជ្ជសាស្រ្តទំនើបៗរួមទាំងក្រុមគ្រូពេទ្យមានភាពរាក់ទាក់រួសរាយចំពោះអ្នកជំងឺទូទៅមិនចាញ់មន្ទីរពេទ្យប្រទេសជិតខាងនោះឡើយ។យ៉ាងណាម៉ិញលោកវេជ្ជបណ្ឌិត អ៊ុក សុមេធា ប្រធានមន្ទីរពេទ្យបង្អែកខេត្តឧត្តរមានជ័យ បានឲ្យដឹងថា បន្ទាប់ពីមានអគារមន្ទីរពេទ្យថ្មីដែលមានលក្ខណៈស្តង់ដា សម្រាប់ពិនិត្យព្យាបាលជំងឺមានបំពាក់ដោយគ្រឿងសំភារៈវេជ្ជសាស្រ្តទំនើបៗសម្រាប់ព្យាបាលដែលជាអំណោយដ៏ថ្លៃថ្លារបស់សម្តេចតេជោ អតីតនាយករដ្ឋមន្រ្តី បច្ចុប្បន្នមានប្រជាពលរដ្ឋភាគច្រើនបានមកទទួលសេវាពិនិត្យព្យាបាលជំងឺ នៅមន្ទីរពេទ្យរដ្ឋមានការកើនឡើង ច្រើនជាងមុនៗ ដោយសារកន្លងមក យើងខ្វះនូវអគារសម្រាក និងពុំមានឧបករណ៍គ្រឿងវេជ្ជសាស្រ្តទំនើបៗសម្រាប់ពិនិត្យបាលជំងឺ។លោកវេជ្ជបណ្ឌិត បញ្ជាក់ថា សព្វថ្ងៃនេះនៅពេលយើងមានឧបករណ៍សម្ភារៈវេជ្ជសាស្រ្តទំនើបៗនោះពលរដ្ឋភាគច្រើនមួយចំនួនបែរងាកមករកទទួលសេវាពិនិត្យព្យាបាលជំងឺ នៅមន្ទីរពេទ្យរដ្ឋវិញ ជៀសរវាងការទៅពិនិត្យព្យាបាលជំងឺនៅឯប្រទេសជិតខាង ដោយត្រូវចំណាយថវិការពិនិត្យព្យាបាលជំងឺអស់ថវិកាច្រើន ព្រោះបច្ចុប្បន្នមន្ទីរពេទ្យរដ្ឋ មិនចាញ់មន្ទីរឯកជនប៉ុន្មាននោះទេ សម្រាប់ប្រទេសជិតខាងនោះ៕

ក្រុមហ៊ុនអាកាសចរណ៍ Air India និង ITA របស់អ៊ីតាលី បន្តជើងហោះហើរទៅអ៊ីស្រាអែល ក្នុងពេលមានជម្លោះ

ក្រុមហ៊ុនអាកាសចរណ៍ Air India និង ITA អ៊ីតាលី កាលពីថ្ងៃអាទិត្យ បានបន្តជើងហោះហើរ ទៅកាន់ប្រទេសអ៊ីស្រាអែល បន្ទាប់ពីពួកគេបានផ្អាកកាលពីខែតុលាឆ្នាំមុន ក្រោយការផ្ទុះឡើងជម្លោះរវាង អ៊ីស្រាអែល និងក្រុមហាម៉ាស។ ក្រុមហ៊ុនអាកាសចរណ៍ឥណ្ឌា បានបន្តជើងហោះហើរដោយផ្នែករបស់ខ្លួនឡើងវិញ នៅលើផ្លូវហោះហើររវាងអាកាសយានដ្ឋានអន្តរជាតិ អ៊ីនឌីរ៉ា ហ្គានឌី (Indira Gandhi) ក្នុងទីក្រុង Delhi និងអាកាសយានដ្ឋាន បេនហ្គូរីអន(Ben Gurion) ក្បែរទីក្រុង Tel Aviv ។ រហូតដល់មានជម្លោះ ផ្លូវហោះហើរនេះ រួមមានជើងហោះហើរទៅនិងមកប្រចាំសប្តាហ៍ចំនួន៦ជើង។ក្រុមហ៊ុនអាកាសចរណ៍អ៊ីតាលី បានបន្តប្រតិបត្តិការរបស់ខ្លួន ក្នុងប្រទេសអ៊ីស្រាអែល ដោយមានជើងហោះហើរប្រចាំសប្តាហ៍បីជើង រវាងអាកាសយានដ្ឋាន ហ្វីមីជីណូ(Fiumicino) ក្នុងទីក្រុងរ៉ូម(Rome) និងទីក្រុង Tel Aviv។ក្រុមហ៊ុនអាកាសចរណ៍ ITA អ៊ីតាលី បាននិយាយនៅក្នុងសេចក្តីថ្លែងការណ៍ថា ការចាប់ផ្តើមឡើងវិញនៃជើងហោះហើររវាងទីក្រុង Tel Aviv និងទីក្រុង Rome គឺអាចធ្វើទៅបានដោយសារកិច្ចសហប្រតិបត្តិការជាមួយអាជ្ញាធរអ៊ីតាលី និងអ៊ីស្រាអែល ហើយវាមានសារៈសំខាន់ជាយុទ្ធសាស្រ្តសម្រាប់ក្រុមហ៊ុនអាកាសចរណ៍ ITA Airways ខណៈក្រុមហ៊ុនពង្រឹងទំនាក់ទំនងពាណិជ្ជកម្ម សង្គម និងវប្បធម៌ រវាងទីផ្សារនៃប្រទេសទាំងពីរ។ ក្រុមហ៊ុនអាកាសចរណ៍ធំៗចំនួនបីផ្សេងទៀតគឺក្រុមហ៊ុនអាកាសចរណ៍ British Airways, ក្រុមហ៊ុនអាយប៊ីរៀ(Iberia)របស់អេស្បាញ និងក្រុមហ៊ុនអាកាសចរណ៍ហូឡង់ KLM កាលពីពេលថ្មីៗនេះ បានប្រកាសថាពួកគេ នឹងបន្តជើងហោះហើរ ទៅកាន់ប្រទេសអ៊ីស្រាអែល នៅថ្ងៃទី ១ ខែមេសា។

សមាជិកប្រទេសនាំចេញប្រេង OPEC + បន្ថែមពេលកាត់បន្ថយទិន្នផលប្រេងដល់ត្រីមាសទី២

សមាជិកអង្គការប្រទេសនាំចេញប្រេង OPEC+ បានប្រកាសកាលពីថ្ងៃអាទិត្យ ពីការបន្ថែមពេលកាត់បន្ថយទិន្នផលប្រេង នៅក្នុងត្រីមាសទីពីរ ដើម្បីគាំទ្រដល់ «ស្ថិរភាព និងតុល្យភាពទីផ្សារប្រេង»។ OPEC+ គឺជាក្រុមប្រទេសផលិតប្រេង ដែលរួមមានប្រទេសជាសមាជិកនៃអង្គការប្រទេសនាំចេញប្រេង (OPEC) និងសម្ព័ន្ធមិត្ត។ អង្គការ OPEC បាននិយាយកាលពីយប់ថ្ងៃអាទិត្យថា ទីស្នាក់ការរបស់ខ្លួន បានកត់សម្គាល់ពីសេចក្តីប្រកាសរបស់បណ្តាប្រទេសអង្គការ OPEC + មួយចំនួន ដែលបានបន្ថែមពេលកាត់បន្ថយដោយស្ម័គ្រចិត្តបន្ថែម សរុបចំនួន ២,២ លានបារ៉ែល ក្នុងមួយថ្ងៃ សម្រាប់ត្រីមាសទី ២ ឆ្នាំ ២០២៤។ ការកាត់បន្ថយនេះគឺយកចេញពីកូតា ដែលត្រូវបានបានអនុម័តនៅក្នុងកិច្ចប្រជុំថ្នាក់រដ្ឋមន្ត្រី អង្គការ OPEC+ នៅក្នុងខែមិថុនា ឆ្នាំ ២០២៣។ កាលពីខែវិច្ឆិកាឆ្នាំមុន ប្រទេសអារ៉ាប៊ីសាអូឌីត រុស្ស៊ី និងប្រទេសមួយចំនួនទៀតរបស់អង្គការ OPEC+ បានប្រកាសកាត់បន្ថយការផលិតដោយស្ម័គ្រចិត្ត ដែលសរុបប្រហែល ២,២លានបារ៉ែលក្នុងមួយថ្ងៃ សម្រាប់ត្រីមាសទីមួយនៃឆ្នាំនេះ។ ក្រសួងថាមពលរបស់ប្រទេសអារ៉ាប៊ីសាអូឌីត បាននិយាយកាលពីថ្ងៃអាទិត្យថា ប្រទេសដែលជាមេដឹកនាំអង្គការ OPEC នឹងបន្តកាត់បន្ថយការផលិតដោយស្ម័គ្រចិត្តរបស់ខ្លួនចំនួន ១ លានបារ៉ែល ក្នុងមួយថ្ងៃ រហូតដល់ចុងខែមិថុនា។ យោងតាមក្រសួងបានឱ្យដឹងថា ការផលិតប្រេងរបស់ប្រទេសនេះ នឹងមានប្រហែល ៩ លានបារ៉ែល ក្នុងមួយថ្ងៃ រហូតដល់ចុងត្រីមាសទីពីរ។ ប្រទេសរុស្ស៊ី ដែលជាសម្ព័ន្ធមិត្តឈានមុខគេរបស់អង្គការ OPEC ក៏បានប្រកាសកាត់បន្ថយដោយស្ម័គ្រចិត្តចំនួន ៤៧១.០០០បារ៉ែលក្នុងមួយថ្ងៃពីការផលិត និងការនាំចេញប្រេងឆៅរបស់ខ្លួនសម្រាប់ទីមាស ទី២ ដែលទាបជាងបន្តិចពីការកាត់បន្ថយចំនួន ៥០០.០០០បារ៉ែលក្នុងមួយថ្ងៃ នៅក្នុងតីមាសទី១។ ប្រទេស OPEC+ ផ្សេងទៀត រួមមានប្រទេសអ៊ីរ៉ាក់ អារ៉ាប់រួម គុយវ៉ែត កាហ្សាក់ស្ថាន អាល់ហ្សេរី និងប្រទេសអូម៉ង់ ក៏បានបន្ថែមពេលការកាត់បន្ថយការផលិតដោយស្ម័គ្រចិត្តរបស់ពួកគេទៅក្នុងត្រីមាសទី២ ផងដែរ។

ក្រុមហ៊ុន SunRice Group ចង់វិនិយោគលើការបង្កើតរោងចក្រកែច្នៃអង្ករ ពិសេសអង្ករសរីរាង្គ នៅកម្ពុជា ដើម្បីនាំចេញទៅកាន់ទីផ្សារក្រៅប្រទេស

នាព្រឹកថ្ងៃទី០៤ ខែមីនា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា បានអនុញ្ញាតឱ្យ លោក Paul Serra នាយកប្រតិបត្តិក្រុមហ៊ុន SunRice Group ចូលជួបសម្តែងការគួរសម និងពិភាក្សាការងារ ក្នុងឱកាសចូលរួមកិច្ចប្រជុំកំពូលពិសេស អាស៊ាន-អូស្រ្តាលី នៅទីក្រុងម៉ែលប៊ន ប្រទេសអូស្ត្រាលី។ក្នុងជំនួបនេះ លោកនាយកប្រតិបត្តិក្រុមហ៊ុន SunRice Group បានថ្លែងអំណរគុណយ៉ាងជ្រាលជ្រៅចំពោះសម្តេចធិបតី ដែលបានអនុញ្ញាតឱ្យរូបលោក និងសហការី បានចូលជួបសម្តែងការគួរសម និងពិភាក្សាការងារ។ លោកនាយកប្រតិបត្តិបានគោរពជម្រាបជូន សម្ដេចធិបតី ថា ក្រុមហ៊ុន SunRice Group ជាក្រុមហ៊ុនអូស្រ្តាលី ទី១ ដែលបាននាំអង្ករពីកម្ពុជាមកកាន់ប្រទេសអូស្រ្តាលី និងប្រទេសនូវ៉ែលសេឡង់។ ព្រមគ្នានេះដែរ លោកនាយកប្រតិបត្តិបានកត់សម្គាល់ឃើញថា កម្ពុជាមានសក្ដានុពលលើវិស័យកសិកម្ម ដោយអង្ករកម្ពុជាមានកេរ្តិ៍ឈ្មោះល្បីល្បាញលើសកលលោក ហើយកម្ពុជាក៏មានគុណសម្បត្តិប្រកួតប្រជែងខ្ពស់លើកម្លាំងពលកម្មវ័យក្មេង ស្ថិរភាពនៃតម្លៃអគ្គីសនី ជាមួយនឹងហេរដ្ឋារចនាសម្ព័ន្ធដឹកជញ្ជូនប្រទាក់ក្រឡា និងឡូជីស្ទីកល្អប្រសើរផងដែរ។ ផ្អែកលើសក្ដានុពលទាំងនេះ ក្រុមហ៊ុនលោកមានចំណាប់អារម្មណ៍ពង្រឹងនិងពង្រីកទំនាក់ទំនងបន្ថែមទៀតជាមួយកម្ពុជាលើវិស័យកសិកម្ម ដោយផ្តោតលើឧស្សាហកម្មកែច្នៃអង្ករ ក្នុងនោះក្រុមហ៊ុនបង្ហាញនូវបំណងវិនិយោគលើការបង្កើតរោងចក្រកែច្នៃអង្ករ ពិសេសអង្ករសរីរាង្គ សម្រាប់នាំចេញទៅក្រៅប្រទេស។ ជាការឆ្លើយតប សម្តេចធិបតី បានសម្តែងនូវការស្វាគមន៍ ចំពោះបំណងរបស់ក្រុមហ៊ុននៅក្នុងពង្រីកសកម្មភាពវិនិយោគរបស់ខ្លួននៅកម្ពុជាលើឧស្សាហកម្មកែច្នៃអង្ករ សម្រាប់បម្រើឱ្យការនាំចេញ ហើយសម្ដេចធិបតីក៏បានបញ្ជាក់ជូនក្រុមហ៊ុនថា វិស័យកសិកម្ម គឺជាវិស័យអាទិភាពមួយ ដែលរដ្ឋាភិបាលបានយកចិត្តទុកដាក់ ហើយបច្ចុប្បន្ននេះ រាជរដ្ឋាភិបាលបានដាក់ចេញនូវគោលនយោបាយដាក់ពង្រាយមន្ត្រីជំនាញកសិកម្មនៅតាមមូលដ្ឋានឃុំ សង្កាត់ទូទាំងប្រទេស ដើម្បីគាំទ្រដល់ប្រជាកសិករដល់មូលដ្ឋាន លើផ្នែកបច្ចេកទេស សំដៅបង្កើនផលិតភាពផលិតផលកសិកម្មនៅតាមមូលដ្ឋាន។ បន្ថែមពីនេះ សម្ដេចធិបតី ក៏បានបញ្ជាក់ជូនលោកនាយកប្រតិបត្តិក្រុមហ៊ុនអំពីការយកចិត្តទុកដាក់របស់រាជរដ្ឋាភិបាលលើការពង្រីកហេដ្ឋារចនាសម្ព័ន្ធដឹកញ្ជូននិងប្រព័ន្ធឡូជីស្ទីក និងគោលនយោបាយអភិវឌ្ឍន៍វិស័យថាមពលអគ្គិសនីនៅកម្ពុជា ដោយសម្ដេចធិបតីបានសង្កត់ថា រាជរដ្ឋាភិបាល ក៏បាននិងកំពុងផ្ដោតអាទិភាពលើការប្រើប្រាស់ថាមពលស្អាត និងថាមពលកកើតឡើងវិញផងដែរដេីម្បីគាំទ្រដល់សកម្មភាពធុរកិច្ច និងពាណិជ្ជកម្មនៅកម្ពុជាកាន់តែមានសមត្ថភាពប្រកួតប្រជែង និងផ្តល់ភាពងាយស្រួលក្នុងការតភ្ជាប់ ក៍ដូចជាកាត់ថ្លៃដឹកជញ្ជូន។ សម្តេចធិបតី ក៍បានលេីកទឹកចិត្តឱ្យក្រុមហ៊ុនទស្សនកិច្ចនៅកម្ពុជាដេីម្បីស្វែងរកឱកាសវិនិយោគបន្ថែមទៀត ដោយសារជាមួយក្រសួងស្ថាប័នពាក់ព័ន្ធរបស់កម្ពុជា ៕

បណ្ដាញសង្គម

ព័ត៌មានថ្មីៗ

គណៈកម្មាធិការសិទ្ធិមនុស្សកម្ពុជា ស្នើ OHCHR ធ្វើរបាយការណ៍សិទ្ធិមនុស្សអំពីប្រទេសកម្ពុជា ឆ្លុះបញ្ចាំងពីការពិតជាក់ស្ដែង

ក្រុមហ៊ុន Lukoil ប្រកាសប្រធានសក្តិ នៅឯតំបន់ប្រេង នៅអ៊ីរ៉ាក់ ក្រោយមានទណ្ឌកម្ម

ប្រភព៖ ស៊ីរីបានកម្ចាត់ផែនការរបស់ក្រុម ISIS ដែលប៉ងយកជីវិតរបស់ប្រធានាធិបតី

កម្ពុជាទាក់ទាញភ្ញៀវទេសចរពីប្រទេសអីរ៉ុង ខណៈអ៊ីរ៉ុងមានប្រជាជន ៩២លាននាក់ លំដាប់ទី២ ក្នុងតំបន់មជ្ឈិមបូព៌ា

វិមានក្រឹមឡាំង៖ ការរៀបចំយ៉ាងសកម្ម កំពុងដំណើរការ សម្រាប់ទស្សនកិច្ចរបស់លោក Putin នៅឥណ្ឌា

អារ៉ាប់រួមច្រានចោលការចូលរួមជាមួយកម្លាំងរក្សាស្ថិរភាពហ្កាហ្សា សម្រាប់ពេលនេះ និងគាំទ្រកិច្ចប្រឹងប្រែងសន្តិភាព

រដ្ឋសភារៀបចំសិក្ខាសាលា ដើម្បីរៀបចំសេចក្តីព្រាងច្បាប់ ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ ២០២៦

ឯកឧត្តមបណ្ឌិត ធន់ វឌ្ឍនា ៖ ការពន្យារពេលដោះលែងវីរកងទ័ពកម្ពុជា ១៨រូប គឺខ្វះការគោរពចំពោះកិច្ចព្រមព្រៀងសន្តិភាពកម្ពុជា-ថៃ ប្រធានអាស៊ាន និងប្រធានាធិបតី ដូណាល់ ត្រាំ

ក្រុមការងារ អ.ន.ក ចុះពិនិត្យការជីកស្រះទឹក និងស្ថាបនាប្រឡាយទឹក ជូនអតីតយុទ្ធជន នៅភូមិព្រៃសិន ខេត្តបាត់ដំបង

លោក Orban៖ ហុងគ្រីមាននូវកិច្ចព្រមព្រៀងខែលហិរញ្ញវត្ថុជាមួយទីក្រុងវ៉ាស៊ីនតោន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

នយោបាយ និង ការអភិវឌ្ឍន៍

លោក Trump ឈ្នះរឿងក្ដីដកឈ្មោះចេញពីសន្លឹកឆ្នោតរដ្ឋ Colorado នៅតុលាការកំពូលអាមេរិក

បេសកជនពិសេសអាមេរិក៖សង្គ្រាមនៅព្រំដែនលីបង់ និងអ៊ីស្រាអែល នឹងមិនអាចទប់ស្កាត់បានទេ

គណបក្សប្រជាជនកម្ពុជា ប្រកាសទទួលយកលទ្ធផលផ្លូវការ នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥

ប្រភពទួរគី អះអាងថា លោកអេរដូហ្គែន និង លោកអាបាស គ្រោងនឹងពិភាក្សាគ្នាអំពីការផ្តល់ជំនួយដល់តំបន់ហ្កាហ្សា

ហ្វីលីពីន នឹងប្រឆាំងចិន ប្រសិនបើផលប្រយោជន៍ដែនសមុទ្រ មិនទទួលបានការយកចិត្តទុកដាក់

កិច្ចប្រជុំកំពូលអាស៊ាន៖ រដ្ឋមន្ត្រីការបរទេសអូស្ត្រាលីព្រមានពីជម្លោះដ៏ធំជាមួយប្រទេសចិន

ពលរដ្ឋមានបណ្ណសមធម៌ អរគុណដល់រដ្ឋាភិបាល ចំពោះការព្យាបាលដោយពុំគិតថ្លៃនៅតាមមន្ទីរពេទ្យរដ្ឋ

ក្រុមហ៊ុនអាកាសចរណ៍ Air India និង ITA របស់អ៊ីតាលី បន្តជើងហោះហើរទៅអ៊ីស្រាអែល ក្នុងពេលមានជម្លោះ

សមាជិកប្រទេសនាំចេញប្រេង OPEC + បន្ថែមពេលកាត់បន្ថយទិន្នផលប្រេងដល់ត្រីមាសទី២

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ​ និង ការអភិវឌ្ឍន៍

លោក Trump ឈ្នះរឿងក្ដីដកឈ្មោះចេញពីសន្លឹកឆ្នោតរដ្ឋ Colorado នៅតុលាការកំពូលអាមេរិក

បេសកជនពិសេសអាមេរិក៖សង្គ្រាមនៅព្រំដែនលីបង់ និងអ៊ីស្រាអែល នឹងមិនអាចទប់ស្កាត់បានទេ

គណបក្សប្រជាជនកម្ពុជា ប្រកាសទទួលយកលទ្ធផលផ្លូវការ នៃការបោះឆ្នោតជ្រើសតាំងសមាជិកព្រឹទ្ធសភា នីតិកាលទី៥

ប្រភពទួរគី អះអាងថា លោកអេរដូហ្គែន និង លោកអាបាស គ្រោងនឹងពិភាក្សាគ្នាអំពីការផ្តល់ជំនួយដល់តំបន់ហ្កាហ្សា

ហ្វីលីពីន នឹងប្រឆាំងចិន ប្រសិនបើផលប្រយោជន៍ដែនសមុទ្រ មិនទទួលបានការយកចិត្តទុកដាក់

កិច្ចប្រជុំកំពូលអាស៊ាន៖ រដ្ឋមន្ត្រីការបរទេសអូស្ត្រាលីព្រមានពីជម្លោះដ៏ធំជាមួយប្រទេសចិន

ពលរដ្ឋមានបណ្ណសមធម៌ អរគុណដល់រដ្ឋាភិបាល ចំពោះការព្យាបាលដោយពុំគិតថ្លៃនៅតាមមន្ទីរពេទ្យរដ្ឋ

ក្រុមហ៊ុនអាកាសចរណ៍ Air India និង ITA របស់អ៊ីតាលី បន្តជើងហោះហើរទៅអ៊ីស្រាអែល ក្នុងពេលមានជម្លោះ

សមាជិកប្រទេសនាំចេញប្រេង OPEC + បន្ថែមពេលកាត់បន្ថយទិន្នផលប្រេងដល់ត្រីមាសទី២

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នយោបាយ និង ការអភិវឌ្ឍន៍